ޑެލިވަރކޮށްދެއްވާނީ ކަންކަން ކުރާނެ، މައްސަލަތަކަށް ހައްލު ހޯދައިދޭނެ އަދި ނަތީޖާ ނެރޭނެ ތަޖުރިބާކާރު ސަރުކާރެއް ކަމަށް ކުރީގެ ފޮރިން މިނިސްޓަރު އަބްދުالله ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ 'އެކްސް' އެކައުންޓުގައި ކުރެއްވި ޕޯސްޓެއްގައެވެ.

އައްޑޫ ސިޓީ ދަތުރުގެ ތެރެއިން ކުރެއްވި މި ޕޯސްޓުގައި ޝާހިދު ވަނީ، އައްޑޫގެ އެކި ރަށްތަކުން ހިނިތުންވުމާއެކު އޭނާގެ ޓީމަށް ދެއްވަމުން ގެންދަވާ ތާޢީދާއި ލޯތްބަށް ޝުކުރު އަދާކުރައްވާފައެވެ.

އަދި ”ހަމައެކަނި ސުރުޚީއެއްގެ ގޮތުގައި“ އޮންނަ އައްޑޫގެ ތަރައްޤީ އާއި މުޅި ދެކުނުގެ މުސްތަޤްބަލު ބަދަލުކޮށްލާނީ ރައްޔިތުންގެ ޚިޔާލާއި މަޝްވަރާ، އަދި ފަންނީ ލަފަޔާއެކު ހިތްވަރުގަދަ މަސައްކަތުން ކަމަށްވެސް ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ޝާހިދު މިހާރު ވަނީ ރަސްމީކޮށް އިޢުލާން ކުރައްވާފައެވެ. މި ނިންމެވުމާއެކު އޭނާ ވަނީ އެމްޑީޕީގެ ރައީސްކަމުގެ މަޤާމުންވެސް އިސްތިއުފާ ދެއްވާފައެވެ.

ނިމިދިޔަ އެމްޑީޕީ ސަރުކާރުގައި ފޮރިން މިނިސްޓަރުކަން ކުރެއްވި ޝާހިދު، ރިޔާސީ ޕްރައިމަރީގައި ވާދަކުރައްވާނެކަން އިޢުލާނު ކުރެއްވީ ކެމްޕެއިން ފެށުމުގެ ގޮތުން އައްޑޫ ސިޓީގައި ބޭއްވި ހާއްސަ ޖަލްސާއެއްގައެވެ.

އައްޑޫ ސިޓީގެ ސިޔާސީ ބައެއް އިސް ބޭފުޅުންނާއި ގިނަ އަދަދެއްގެ އާންމުން ބައިވެރިވި އެ ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ، އެމަނިކުފާނު ހުންނެވީ އެމްޑީޕީގެ އާންމު މެންބަރުންނާއެކު ވެވަޑައިގަންނަވަން ޖެހިވަޑައިގެންނެވި ކޮންމެ ގުރުބާނީއަކަށް ވެސް ފުރިހަމައަށް ތައްޔާރަށް ކަމަށެވެ.

އެ ޖަލްސާގައި ޝާހިދުގެ އަރިހުގައި ރައްޔިތުންގެ މަޖިލީހުގެ އެމްޑީޕީ ޕީޖީ ގުރޫޕްގެ ލީޑަރު އިބްރާހިމް ނާޒިލް އާއި، ނާޒިލްގެ އަނބިކަނބަލުން އަދި ކުރީގެ މެންބަރު ހިސާން ހުސައިންގެ އިތުރުން އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ބައިވެރިވެވަޑައިގެންނެވިއެވެ. މީގެއިތުރުން ރައްޔިތުންގެ މަޖިލީހުގެ މިހާރާއި ކުރީގެ އެމްޑީޕީގެ ބައެއް މެންބަރުންނާއި، އައްޑޫ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާ ވެސް އެ ޖަލްސާގައި ބައިވެރިވެވަޑައިގެންނެވިއެވެ.