އިނގިރޭސި ފުޓްބޯޅަ ސީޒަން ހުޅުވުމުގެ ގޮތުން ކުޅުނު ކޮމިޔުނިޓީ ޝީލްޑް މެޗް މެންޗެސްޓަރ ސިޓީ ބަލިކޮށް އާސެނަލް ކާމިޔާބުކޮށްފިއެވެ. 

ކާޑިފްގައި ކުޅުނު މިމެޗް އާސެނަލުން ކާމިޔާބުކުރީ 3-0 ގެ ނަތީޖާއިންނެވެ. މެޗު ފަށައިގެން ފުރަތަމަ މިނެޓު ނުވަނީސް، އާސެނަލްއިން ވަނީ ލަނޑެއް ޖަހައި ސިޓީ ސިއްސުވާލާފައެވެ. މެޗުގެ 23 ވަނަ ސިކުންތުގައި މައިލްސް ލޫވިސް-ސްކެލީ ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ ރިކާޑޯ ކަލަފިއޯރީއެވެ. މިއީ ސިޓީގެ އާ ކޯޗު އެންޒޯ މަރެސްކާގެ އިރުޝާދުގެ ދަށުން އެ ޓީމުން ކުޅުނު ފުރަތަމަ ރަސްމީ ފުރަތަމަ މެޗެވެ.

އާސެނަލްގެ ދެވަނަ ލަނޑު ފެނިގެންދިޔައީ ފުރަތަމަ ހާފު ނިމެން އުޅެނިކޮށެވެ. މި ސީޒަނުގައި އެ ޓީމާ ގުޅުނު ކްރިސްޓޯސް ޒޯލިސް ނަގައިދިން ހުރަހަކުން ކައި ހާވާޓްޒް ފޮނުވާލި ހަމަލާ، ގޯލަށް ވަދެފައިވަނީ، ސިޓީގެ ގޯލްކީޕަރު ޖިއަންލުއިޖީ ޑޮނަރުއްމާ އަތުގައި ޖެހިފައެވެ. މެޗްގައި ފެނިގެންދިޔަ އާސެނަލްގެ ތިންވަނަ ލަނޑު ޖަހައިދިނީ، ދެވަނަ ހާފު ފަށައިގެން ތިންވަނަ މިނެޓުގައި ކެޕްޓަން މާޓިން އޮޑެގާޑެވެ.

މި މެޗުގައި ސިޓީގެ ޑިފެންސްލައިނާއި ގޯލްކީޕަރު ޑޮނަރުއްމާގެ ފަރާތުން ގިނަ ގޯސްތަކެއް ފެނިގެންދިޔައިރު، އާސެނަލްއަށް ލަނޑު ޖަހާނެ އިތުރު ފުރުސަތުތަކެއްވެސް ލިބުނެވެ. ވަކިން ހާއްސަކޮށް ބުކާޔޯ ސަކާއަށް ލިބުނު ރަނގަޅު ދެ ފުރުސަތެއް ފާހަގަކޮށްލެވެއެވެ

އާސެނަލްގެ މި ކާމިޔާބީއަކީ 91 އަހަރަށްފަހު ޖެހިޖެހިގެން ދެވަނަ ފަހަރަށް ލީގު ތަށި ހޯދުމަށް އެ ޓީމުން ކުރާ މަސައްކަތަށް ލިބުނު ވަރުގަދަ ހިތްވަރެކެވެ.