ދިވެހިރާއްޖޭގެ ތަރައްޤީއަށާއި އިންޖިނިއަރިންގ ދާއިރާއަށް ދިވެހި އިންޖިނިއަރުންނާއި، އެ ދާއިރާގައި ޝާމިލުވާ ފަރާތްތަކުން ކުރަމުންދާ ބުރަ މަސައްކަތުގެ އަގުވަޒަންކުރުމުގެ ގޮތުން ދޭ "އިންޖިނިއަރސް އެވޯޑު 2026" އަށް ކުރިމަތިލުމަށް ދީފައިވާ ފުރުސަތުގެ މުއްދަތު އިތުރުކޮށްފި އެވެ.

މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުން މިއަދު ބުނީ އެ ފުރުސަތު މި މަހުގެ 27 ވަނަ ދުވަހުގެ 2:00 ގެ ނިޔަލަށް އިތުރުކޮށްފައިވާ ކަމަށެވެ.

މިނިސްޓްރީން ކުރި އިޢުލާނެއްގައި ބުނެފައިވަނީ، ދިވެހިރާއްޖޭގެ އިޤްތިޞާދު ކުރިއެރުވުމުގައި އިމާރާތްކުރުމުގެ ސިނާއަތަކީ ވަރަށް މުހިންމު ދައުރެއް އަދާކުރާ ސިނާއަތެއް ކަމަށެވެ. އެހެންކަމުން، މި ދާއިރާއިން ފާހަގަކޮށްލެވޭ ޚިދުމަތްތައް ކުރައްވާ ފަރާތްތަކަށް ހިތްވަރު ދިނުމުގެ ގޮތުން މިއަހަރު ޖުމްލަ 10 ގިންތިއަކުން އެވޯޑު ދިނުމަށް ވަނީ ހަމަޖެހިފައެވެ.

މި އަހަރު އެވޯޑު ދިނުމަށް ކަނޑައަޅާފައިވާ ގިންތިތަކަކީ:

* އިންޖިނިއަރ އޮފް ދަ އިޔާ 

* ލައިފްޓައިމް އެޗީވްމަންޓް އެވޯޑް 

* ޔަންގް އިންޖިނިއާ އެވޯޑް 

* ވިމެން އިން އިންޖިނިއަރިން އެވޯޑް

* އިންޖިނިއަރިން އިނޮވޭޝަން، ޓެކްނޮލޮޖީ، އެޑިއުކޭޝަން އެންޑް ރިސާރޗް އެވޯޑް

* ސަސްޓެއިނަބިލިޓީ ޗެމްޕިއަން އެވޯޑު

* އިންޖިނިއަރިން ކޮންސަލްޓަންޓް/ ކޮންސަލްޓަންސީ ފާރމް އޮފް ދަ އިޔާ އެވޯޑު

* ސްޓޫޑަންޓް އިނޮވޭޓާ އެވޯޑު 

* ކޮމިއުނިޓީ އިމްޕެކްޓް އެވޯޑު 

* ކޮންޓްރެކްޓާ އޮފް ދަ އިޔާ އެވޯޑް