ގދ. ތިނަދޫގައި މަސައްކަތްކުރަމުންދާ އިންޑިއާގެ މުދައްރިސުންނާއި ސިއްހީ ދާއިރާގެ މުވައްޒަފުންގެ ކަންބޮޑުވުންތައް އޮޅުންފިލުވުމަށްޓަކައި، އިންޑިއާ ހައިކޮމިޝަނުގެ ކައުންސެލަރ މުކަރުޖީ އެ ފަރާތްތަކާ ބައްދަލުކުރައްވައިފިއެވެ.
މިދިޔަ އޯގަސްޓް މަހުގެ 23 ވަނަ ދުވަހު ތިނަދޫގައި ކުރިއަށްދިޔަ މި 'އޯޕަން ހައުސް' ބައްދަލުވުމުގައި، އެ ރަށުގައި ވަޒީފާ އަދާކުރާ އިންޑިއާގެ ގިނަ އަދަދެއްގެ މުވައްޒަފުން ބައިވެރިވިއެވެ. މި ބައްދަލުވުމުގެ މައިގަނޑު މަގްސަދަކީ އެ ފަރާތްތަކަށް ދިމާވާ އެކި ގޮންޖެހުންތަކާއި ކަންބޮޑުވުންތައް ގާތުން ބަލައި، އެކަންކަމަށް ހައްލު ހޯދައިދިނުމެވެ.
މި ބައްދަލުވުމުގައި ކައުންސެލަރ މުކަރުޖީ ވަނީ އިންޑިއާ ސަރުކާރުން ދިވެހިރާއްޖެއާ ގުޅިގެން ކުރިއަށްގެންދާ ތަރައްގީގެ އެކި މަޝްރޫއުތަކާއި، މުޖުތަމައުގެ ފައިދާއަށް ހިންގާ ހަރަކާތްތަކާ ބެހޭ މައުލޫމާތު ބައިވެރިންނާ ހިއްސާކުރައްވާފައެވެ. އަދި އިންޑިއާގެ ރައްޔިތުންނަށް ދިމާވާ ދަތިތަކަށް ހައްލު ހޯދައިދިނުމުގައި ދިވެހި ސަރުކާރާއެކު ގާތުން މަސައްކަތް ކުރަމުންދާކަމުގެ ޔަގީންކަންވެސް އޭނާ ދެއްވިއެވެ.
މިފަދަ ބައްދަލުވުންތަކަކީ ރާއްޖޭގެ އެކި ސަރަހައްދުތަކުގައި މަސައްކަތްކުރާ އިންޑިއާގެ ރައްޔިތުންނާ ގުޅުން ބަދަހިކުރުމަށް އިންޑިއާ ހައިކޮމިޝަނުން ސިލްސިލާކޮށް ބާއްވަމުން އަންނަ ބައްދަލުވުންތަކެކެވެ.
Advertisement
This content is created and paid for by advertisers and does not involve Voice Journalists
