އެފްއޭއެމް ފުޓްސަލް އެޓޮލް ޗެމްޕިއަންޝިޕްގެ ހދ. އަތޮޅު ފައިނަލުގައި ރޭ ނައިވާދޫގެ މައްޗަށް 2-0 ގެ ނަތީޖާއަކުން ކުރި ހޯދައި ހަނިމާދޫން އަތޮޅު ޗެމްޕިއަންކަން ކާމިޔާބުކޮށްފިއެވެ.
ފައިނަލް މެޗުގެ ކުރީކޮޅު ބޯޅަ ހިފަހައްޓައި ގިނަ ފުރުޞަތުތައް އުފެއްދީ ނައިވާދޫންނެވެ. ނަމަވެސް ހަނިމާދޫގެ ޑިފެންސް ލައިނުން އެ ހަމަލާތައް ހުއްޓުވައި ގޯލު ވައްދަން ޖާގަ ނުދީ ހިފެހެއްޓީ ވަރުގަދަ ކުޅުމެއް ދައްކައިގެންނެވެ. ހަނިމާދޫގެ ފުރަތަމަ ގޯލު ކާމިޔާބުކުރީ ނޫރުﷲ ތޯހާއެވެ. އެ ގޯލު ޖެހީ ޢަލީ ޙުސައިން ދަގަނޑޭ ވަރަށް ހުސްކޮށް ދިން ބޯޅައަކުންނެވެ. ދެވަނަ ލަނޑު ކާމިޔާބުކޮށްދިނީ ތަޖުރިބާކާރު ކުޅުންތެރިޔާ މުޙައްމަދު ޚާލިދް (ކައްޓާ) އެވެ.
ހަނިމާދޫގެ ޑިފެންސުގައި އަބޫބަކުރު ޞިއްދީޤް (ބަކުރު) މުހިންމު ދައުރެއް އަދާކުރިއިރު ގޯލުގައި ހުރި ޢަބްދުﷲ މުޙައްމަދު (ޓޯނީ) ވަނީ މެޗު ފެށުނީއްސުރެ ނިމެންދެން ފާހަގަކޮށްލެވޭ ސޭވްތަކެއް ކޮށްދީފައެވެ. ޓޯނީ ވަނީ ނައިވާދޫއަށް ލިބުނު ޕެނެލްޓީ ވެސް ދިފާއުކޮށްފައެވެ. ފައިނަލް މެޗުގެ މޭން އޮފް ދަ މެޗުގެ މަޤާމު ލިބުނީ ޓޯނީއަށެވެ.
ޓޯނީ ވަނީ މުޅި މުބާރާތުގެ އެންމެ މޮޅު ގޯލްކީޕަރުގެ މަޤާމާއި އެންމެ މޮޅު ފަސް ކުޅުންތެރިންގެ ތެރޭގައި ވެސް ހިމެނިފައެވެ. ޗެމްޕިއަންކަން ހޯދި ހަނިމާދޫގެ އިތުރުން ފައިނަލުން ބަލިވި ނައިވާދޫ ވެސް ވަނީ މުބާރާތުގެ ޒޯން ބުރަށް ދަތުރުކޮށްފައެވެ.
Advertisement
This content is created and paid for by advertisers and does not involve Voice Journalists
