ޗައިނާގެ ރައީސް ޝީ ޖިންޕިންގް އަންނަ މަހު އިންޑިޔާގެ ނިއު ދިއްލީގައި ބޭއްވުމަށް ހަމަޖެހިފައިވާ ބްރިކްސް ސަމިޓުގައި ބައިވެރިވެވަޑައިގަންނަވަން އިންޑިއާއަށް ވަޑައިގަންނަވާނީ ބޮޑު ވަފުދަކާއެކު ކަމަށް ބެލެވޭ ކަމަށް ސަރަހައްދީ މީޑިއާތަކުން ރިޕޯޓުކޮށްފިއެވެ. މިއީ ފާއިތުވި 7 އަހަރުގެ ތެރޭގައި ޝީ އިންޑިޔާއަށް ކުރައްވާ ފުރަތަމަ ދަތުރުފުޅަށް ވާއިރު، މިއީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަވަމުންދާކަމުގެ ނިޝާނެއް ކަމަށް މުހައްލިލުން ބުނެއެވެ.

ސެޕްޓެމްބަރު 12 އިން 13 އަށް ބޭއްވުމަށް ހަމަޖެހިފައިވާ މި ސަމިޓުގައި ޝީ ބައިވެރިވެވަޑައިގަތުމަކީ 2020 ވަނަ އަހަރު އިންޑިޔާ އާއި ޗައިނާގެ ސަރަހައްދީ ރޮނގުގައި ހިނގި ނުރައްކާތެރި ކުރިމަތިލުންތަކަށްފަހު ދެ ގައުމުގެ ގުޅުން ހަމައަކަށް އަޅުވައި، ގުޅުން ބަދަހިކުރުމަށް ކުރެވޭ މަސައްކަތްތަކުގެ މުހިންމު ހަރުފަތެކެވެ. މަސްދަރުތަކުން ބުނާ ގޮތުގައި، ޗައިނާގެ އޮފިޝަލުން މިހާރު ދަނީ ދިއްލީގެ ހޮޓާތަކާއި ސެކިއުރިޓީ އިންތިޒާމުތައް ހަމަޖެއްސުމުގެ މަސައްކަތް ކުރަމުންނެވެ.

މި ދަތުރުފުޅުގައި ޝީއާއެކު 400 އަށްވުރެ ގިނަ އޮފިޝަލުންގެ ބޮޑު ވަފުދެއް ބައިވެރިވާނެ ކަމަށް ބެލެވެއެވެ. މިއީ 2019 ވަނަ އަހަރު ޝީ އިންޑިޔާއަށް ކުރެއްވި ދަތުރުފުޅުގައި ބައިވެރިވި 200 ވަރަކަށް އޮފިޝަލުންނާ އަޅާބަލާއިރު ދެގުނަ ބޮޑު އަދަދެކެވެ. ދެ ގައުމުގެ އޮފިޝަލުން މި ސަމިޓުގެ ތެރެއިން ބޯޑަރުގެ މައްސަލަތަކާއި ސަރަހައްދީ ސަލާމަތާއި ބެހޭ މައްސަލަތަކާމެދު މަޝްވަރާކޮށް، ގުޅުން އިތުރަށް ބަދަހިކުރެވޭނެ ގޮތްތަކާމެދު ވާހަކަދައްކާނެ ކަމަށް ބެލެވެއެވެ.

މިކަމާ ގުޅިގެން ޗައިނާގެ ހާރިޖީ ވުޒާރާއިން ބުނެފައިވަނީ ބްރިކްސްގެ އެއްބާރުލުމަށް ޗައިނާއިން ވަރަށް ބޮޑު އިސްކަމެއް ދޭ ކަމަށާއި، މިއަހަރުގެ ރިޔާސަތު ބަލަހައްޓާ އިންޑިޔާއަށް ސަމިޓު ކާމިޔާބުކަމާއެކު ބޭއްވުމަށް އެއްބާރުލުން ދޭނެ ކަމަށެވެ. ނަމަވެސް، ޝީގެ ދަތުރުފުޅުގެ އެންމެ ފަހުގެ ތަފްސީލުތައް އަދި ރަސްމީކޮށް ކަށަވަރުވެފައި ނުވާކަމަށް އެ ވުޒާރާއިން ވަނީ ބުނެފައެވެ.