ރިސޯޓްތަކުން ލިބޭ އާމްދަނީގެ 40 އިންސައްތަ ބޭންކުތަކަށް މާރުކުރި ނަމަވެސް، ރިސޯޓް މުވައްޒަފުންގެ މުސާރަ ދޭންވާނީ ޑޮލަރުން ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ރިސޯޓުތަކަށް ލިބޭ އާމްދަނީގެ 40 އިންސައްތަ ޑޮލަރު، ރާއްޖޭގެ ބޭންކުތައް މެދުވެރިކޮށް ދިވެހި ރުފިޔާއަށް މާރުކުރަން ލާޒިމްވާ ގޮތަށް ޤާނޫނަށް ގެނެވުނު އިސްލާހް ރައީސް މުޢިއްޒު ވަނީ މިއަދު ތަސްދީގު ކުރައްވާފައެވެ. 

ބިލު ތަސްދީގު ކުރެއްވުމަށްފަހު ވާހަކަދައްކަވަމުން ރައީސް ވިދާޅުވީ، ބޭރު ފައިސާއާ ބެހޭ ގާނޫނަށް އެ ގެނެވުނު އިސްލާހަކީ މުހިންމު އިސްލާހެއް ކަމަށެވެ. އަދި އެ އިސްލާހްގެ ސަބަބުން ގެސްޓްހައުސް ވިޔަފާރިކުރާ ފަރާތްތަކުން މާރުކުރަންޖެހޭ އަދަދަށް ބަދަލު ނާންނާނެ ކަމަށެވެ.

ރައީސް ވިދާޅުވީ އެ އިސްލާހްގެ ސަބަބުން އަސާސީ ކަންކަމަށް ކުރާ ޚަރަދުތަކަށް އޭގެ ފައިދާ ވާނެ ކަމަށެވެ. 

ރައީސް ވިދާޅުވީ މާރުކުރާ ޕަސެންޓޭޖް އިތުރުކުރުމުން އޭގެ ފައިދާ ކުރާނީ ރައްޔިތުންނަށް ކަމަށާ، އެގޮތުން ކުދި އަދި މެދުފަންތީގެ ވިޔަފާރިތަކަށް އެއިން ފަސޭހަތަށް ލިބިގެންދާނެ ކަމަށެވެ. 

މި ބަދަލާއެކު ރިސޯޓްތަކުގެ ބޭފުޅުންގެ ފަރާތުން ކަންބޮޑުވުން ފާޅުކުރެއްވިކަން ފާހަގަކުރައްވައި ރައީސް ވިދާޅުވީ، އެ ބަދަލު ގެނެވުނީ ގިނަ ދިރާސާތަކެއް ކުރުމަށްފަހުގައި ކަމަށާ، އެކަން ކުރީ ހިސާބު ކިތާބު ބަލައި، މައުލޫމާތުތައް އެއްކޮށްގެން ކަމަށެވެ. 

މިއާއެކު ރައީސް ވަނީ ރިސޯޓް ތަކުގެ މުވައްޒަފުންގެ މުސާރަ ޑޮލަރުން ދިނުން ހުއްޓާލައިގެން ނުވާނެ ކަމަށާ، 40 އިންސައްތަ މާރު ކުރުމަކީ އެކަމަށް އޮތް އުޒުރެއް ނޫން ކަމަށް ވިދާޅުވެފައެވެ.

އެހެންކަމުން ހުރިހާ ރިސޯޓްތަކުންވެސް ގާނޫނަށް ތަބާވެ ރައްޔިތުންގެ ހެވާއި ލާބައަށްޓަކައި ކުރާ އެފަދަ ކަންކަމުގައި އެބޭފުޅުންގެ ޒިންމާ އަދާކުރެއްވުމަށް ރައީސް އެދިވަޑައިގެންނެވިއެވެ.