އިދިކޮޅު އެމްޑީޕީގެ ޗެއާޕާސަންގެ ނައިބު (މާލީ) މަގާމަށް އެ ޕާޓީގެ ކުރީގެ ނާއިބު ރައީސް މުހައްމަދު ޝިފާޒް (ބާރަށު ޝިއްޕެ) އަައްޔަނުކުރަން ފެންނަ ކަމަށް ގައުމީ މަޖިލީހުން ފާސްކޮށްފި އެވެ.
އެމްޑީޕީގެ ޗެއާޕާސަންގެ ނައިބުގެ މަގާމު ހުސްވީ ކުރީން އެ މަގާމުގައި ހުރި އަހުމަދު އަބްދުﷲ (ތަކަންދޫ އަހްމަދު) މަގާމުން އިސްތިއުފާ ދިނުމުންނެވެ. އަހްމަދު އިސްތިއުފާ ދިނީ އެމްޑީޕީގެ ރިޔާސީ ޓިކެޓް ހޯއްދެވުމަށް އެ ޕާޓީގެ ކުރީގެ ރައީސް އަބްދުﷲ ޝާހިދު ފެއްޓެވި ކެމްޕެއިނަށް ހުސްވުމުގެ ގޮތުންނެވެ.
އެމްޑީޕީގެ ގައުމީ މަޖިލީސް މިރޭ އެއްވެ ޕާޓީގެ ޗެއާޕާސަންގެ ނައިބު (މާލީ) މަގާމަށް ޝިފާޒް އަައްޔަނުކުރަން ފެނޭތޯ ނެގި ވޯޓްގައި 30 މެންބަރުން ވަނީ ފެންނަ ކަމަށް ވޯޓް ދީފަ އެވެ. ގައުމީ މަޖިލީހުގަައި ބައިވެރިވީ 34 މެންބަރުންނެވެ.
ޝިފާޒަކީ އެމްޑީޕީގެ ނާއިބު ރައީސަކަށް ހުރުމަށް ފަހު އެ ޕާޓީން ވަކިވެ ދަ ޑިމޮކްރެޓްސްއާ ގުޅުނު ބޭފުޅެކެވެ. ފަހުން ރައީސް ނަޝީދުގެ އަރިހުގައި އަލުން އެމްޑީޕީއާ ގުޅުނީ އެވެ.
ޝިފާޒްގެ ބަދަލުގައި އެ މަގާމަށް ކުރީގެ ޑިފެންސް މިނިސްޓަރު އަދި އެމްޑީޕީގެ ކުރީގެ ޗެއާޕާސަން މާރިޔާ ދީދީ ގެނައުމަށް ވެސް ބަޔަކު ކެމްޕެއިން ކުރި އެވެ. ނަމަވެސް ރަސްމީ ސިފައެއްގައި އެކަން ނުުހިނގަ އެވެ.
