ފާއިތުވި ހަފުތާގެ ތެރޭގައި ރާއްޖޭގެ އެކި ކަންކޮޅުތަކުގައި ކުއްލި ނުރައްކަލުގެ 29 ހާދިސާއެއް ހިނގައިގެން އެމްއެންޑީއެފުން އެހީތެރިކަން ފޯރުކޮށްދީފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން 'އެކްސް' ގައި އާންމުކުރި ތަފާސްހިސާބުތައް ދައްކާ ގޮތުގައި، މި ހާދިސާތައް ހިނގާފައިވަނީ މިދިޔަ އޮގަސްޓް މަހުގެ 30 އިން ފެށިގެން މި ސެޕްޓެމްބަރު މަހުގެ 5 ވަނަ ދުވަހުގެ ނިޔަލަށެވެ.

އެމްއެންޑީއެފްގެ ސަރަހައްދީ ކޮމާންޑްތަކަށް ބަލާއިރު، އެންމެ ގިނަ އަދަދަކަށް ހާދިސާތައް ރިޕޯޓްކޮށްފައިވަނީ މާލެ ސަރަހައްދުންނެވެ. އެގޮތުން:

މާލެ އޭރިއާ ކޮމާންޑް: 26 ހާދިސާ

ސަދަން އޭރިއާ ކޮމާންޑް: 2 ހާދިސާ

ނޮދަން އޭރިއާ ކޮމާންޑް: 1 ހާދިސާ

މި މުއްދަތުގައި ރިޕޯޓްކުރެވުނު މައްސަލަތަކުގެ ތެރޭގައި އެންމެ ގިނައީ އަލިފާނުގެ ހާދިސާތަކެވެ. އެގޮތުން އަލިފާނުގެ 12 ހާދިސާއެއް މިދިޔަ ހަފުތާގައި ހިނގާފައިވެއެވެ. ދެވަނައަށް އެންމެ ގިނައިން ރިޕޯޓްކޮށްފައިވަނީ ނުރައްކާތެރި މާއްދާތަކާ ގުޅުންހުރި ހާދިސާތައް ނުވަތަ ހަޒްމެޓްގެ 11 ހާދިސާއެކެވެ.

މީގެ އިތުރުން، ބަލިމީހުން ކުއްލި ފަރުވާއަށް ގެންދިއުމަށް ކުރިއަށްގެންދިޔަ 4 މެޑިކަލް އިވެކުއޭޝަނަކާއި، ފުރާނައާއި މުދާ ސަލާމަތްކުރުމަށް ހިންގި މީހުން ސަލާމަތްކުރުމުގެ (ރެސްކިއު) 2 ހާދިސާއެއްގައި ވެސް ސިފައިން ވަނީ ހަރަކާތްތެރިވެ އެހީތެރިކަން ފޯރުކޮށްދީފައެވެ.