އިނގިރޭސި ޕްރިމިއާ ލީގްގައި ރޭ ސަންޑަލޭންޑް ބަލިކޮށް މޮޅުވުމުގެ ސިލްސިލާ އާސެނަލުން ދަމަހައްޓައިފިއެވެ.

ސަންޑަލޭންޑްގެ ދަނޑުގައި ކުޅުނު މިމެޗް އާސެނަލުން ކާމިޔާބުކުރީ 2-0 ގެ ނަތީޖާއިންނެވެ. މެޗްގައި އާސެނަލަށް ގޯލް ހުޅުވާލަދިނީ، 58 ވަނަ މިނެޓް ތެރޭގައި ބްރޫނޯ ގިމަރޭސް އެވެ. މިއީ އޭނާ އާސެނަލަށް ކާމިޔާބުކޮށްދިން ފުރަތަމަ ގޯލެވެ. އޭގެ ކުރިން ސަންޑަލޭންޑަށް ވަނީ ޕެނަލްޓީއެއްވެސް ލިބިފައެވެ. އެއީ އާސެނަލްގެ އެޒްރީ ކޮންސާ، ސަންޑަލަންޑްގެ ޑެން ބަލާޑް ހިފެހެއްޓުމާ ގުޅިގެން ރެފްރީ ދިން ޕެނަލްޓީ އެކެވެ. ނަމަވެސް އާސެނަލްގެ ކީޕަރު ޑޭވިޑް ރާޔާ ވަނީ މި ޕެނަލްޓީ ދިފާއުކޮށްފައެވެ.

މެޗުގެ ފަހުކޮޅު ސަންޑަލަންޑުން ނަތީޖާ ހަމަހަމަކުރުމަށް ވަރުގަދަ ހަމަލާތަކެއް އުފެއްދިއެވެ. ނަމަވެސް، އާސެނަލްގެ ކީޕަރު ރާޔާ ވަނީ ނޯޑީ މުކިއޭލޭ ފޮނުވާލި ނުރައްކާތެރި އެ ހަމަލާއެއް ދިފާއުކޮށްފައެވެ. އާސެނަލުން މެޗުގެ ނަތީޖާ ކަށަވަރުކުރީ އިތުރު ވަގުތުގެ ތެރޭގައި ބުކާޔޯ ސަކާ ކާމިޔާބުކުރި ޕެނަލްޓީންނެވެ. މި ޕެނަލްޓީއަކީ ރެއިނިލްޑޯ މަންޑާވާ، ސަކާއަށް ކުރި ފައުލަކާ ގުޅިގެން ލިބުނު ޕެނަލްޓީއެކެވެ. މި ފައުލާ ގުޅިގެން ރެއިނިލްޑޯއަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލާފައެވެ.

ސަންޑަލޭންޑް މެޗުން ލިބުނު މޮޅާއެކު އާސެނަލް މިހާރު އޮތީ ތާވަލުގެ އެއްވަނައިގައި ތިން ޕޮއިންޓުގެ ލީޑަކާއެކުގައެވެ. ދެވަނައިގައި އޮތް މެންޗެސްޓާ ސިޓީ މިއަދު މެންޗެސްޓާ ޔުނައިޓެޑާ ދެކޮޅަށް ނުކުންނާނެއެވެ.