ހއ. ބާރަށު ފުޓްބޯޅަ ދަނޑު ތަރައްޤީކުރުމާއި ހއ. ތުރާކުނު ފުޓްބޯޅަ ދަނޑުގައި ލައިޓިން ސިސްޓަމް ހަރުކޮށް ރޮސްޓްރަމް ހެދުމުގެ ދެ މަޝްރޫޢެއް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ މިއަދު ހަވާލުކޮށްފިއެވެ.

ކުޅިވަރާ ބެހޭ ވުޒާރާގައި މިއަދު ބޭއްވި ރަސްމިއްޔާތެއްގައި މި ދެ މަޝްރޫޢުގެ އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ވަޒީރު ޢަބްދުﷲ ރާފިޢުއެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ޖަމްޝީދެވެ.

އެމްޓީސީސީން ބުނީ ބާރަށު މަޝްރޫޢުގެ ތެރެއިން އެ ރަށު ދަނޑުގެ ސަބްބޭސް ތައްޔާރުކޮށް ޕިޗު ހަދައި ބައުންޑަރީ ފާރު ރާނައި ފެންސު ޖެހުމާއި ލައިޓިން ސިސްޓަމް ހަރުކުރުމުގެ އިތުރުން ޓާރފް އެޅުމުގެ މަސައްކަތް ކުރާނެ ކަމަށެވެ. މި މަޝްރޫޢަކީ 13.64 މިލިއަން ރުފިޔާއަށް 200 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ. ބާރަށަކީ 2,147 މީހުންގެ އާބާދީއެއް އޮންނަ ދިވެހި ތާރީޚާ ގުޅިފައިވާ ރަށެކެވެ.

ތުރާކުނުގެ މަޝްރޫޢުގައި ހިމެނެނީ އެ ރަށު ފުޓްބޯޅަ ދަނޑުގައި ލައިޓިން ސިސްޓަމެއް ޤާއިމުކޮށް ރޮސްޓްރަމެއް ބިނާކުރުމެވެ. މި މަސައްކަތް 7.82 މިލިއަން ރުފިޔާއަށް 250 ދުވަހުގެ ތެރޭގައި ނިންމުމަށް ވަނީ ކަނޑައެޅިފައެވެ. ރާއްޖޭގެ އެންމެ އުތުރުގައި އޮންނަ ތުރާކުނުގެ އާބާދީއަކީ 427 މީހުންނެވެ.