ސަރުކާރު ބައިކުރަން ޖެހުމަކީ ސަރުކާރު ރަނގަޅަށް ނުހިންގޭ ސަބަބު: ޑރ ޝަހީމު

މަލްޓިޕާޓީ ޑިމޮކްރަސީ ރާއްޖެއަށް ތަޢާރަފުވި ފަހުން އުފެދުނު ސަރުކާރުތައް ރަނގަޅަށް ނުހިންގި، ރާއްޖޭގެ ސިޔާސީ ހަމަޖެހުން ގެއްލުމުގެ އެންމެ ބޮޑު ސަބަބަކީ ސަރުކާރު ބައިކުރަން ޖެހުންކަމަށް ކުރީގެ އިސްލާމިކް މިނިސްޓަރު އަދި ޕީޕީއެމްގެ އެޑްވައިޒަރު ޑރ މުޙައްމަދު ޝަހީމު އަލީ ސައީދު ވިދާޅުވެއްޖެ އެވެ.

ޑރ ޝަހީމު މިފަދައިން ވިދާޅުވެފައިވަނީ މިއަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބުގައި ދެވަނަ ބުރަކަށް ނުގިސް އެއްބުރުން ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު އިންތިޚާބުކުރުމަށް ގޮވާލާ ނައިފަރުގައި ބޭއްވި ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.

ޑރ ޝަހީމު ވިދާޅުވީ ރާއްޖޭގެ ސިޔާސީ މަޝްރަހުގައި ހިނގާފައިވާ ކަންތައްތަކަށް ބަލާއިރު، އަދި ރާއްޖޭގައި ސިޔާސީ ހަމަޖެހުން ގެއްލި ސަރުކާރުތަކަށް އެކަށީގެންވާ ގޮތެއްގައި ޚިދުމަތްތައް ފޯރުކޮށްނުދެވި ސަރުކާރު ނުހިންގޭ ސަބަބުތަކަށް ބަލާއިރު، އެކަން އެފަދައިން ވަނީ އަންނަ ކޮށްމެ ސަރުކާރަކަށް ސަރުކާރު ބައިކުރަން ޖެހުމުގެ ސަބަބުން ކަމަށެވެ.

އެމަނިކުފާނު މިފަދައިން ވިދާޅުވެފައިވާއިރު 2008 ވަނަ އަހަރުން ފެށިގެން އުފެދުނު ކޮންމެ ސަރުކާރެއް ވެސް އުފެދުނީ ގިނަ ޕާޓީތަކެއް އެކުވެ ކޯލިޝަން ހަދައިގެންނެެވެ. އެހެން ނަމަވެސް ތަފާތު ސަބަބުތަކާއި ހުރެ ވަކި ހިސާބަކުން ކޯލިޝަން ރޫޅާލަން ޖެހެއެވެ. ކޯލިޝަނާއެކު ވެރިކަމަށް އައިސް ކޯލިޝަން ދެމެހެއްޓި ހަމައެކަނި ސަރުކާރަކީ ރައީސް އިބްރާހިމް މުޙައްމަދު ޞާލިހުގެ ސަރުކާރުކަން ފާހަގަކޮށްލެވެއެވެ.

އެހެން ނަމަވެސް، ކޯލިޝަން ޕާޓުނަރުންނަށް ވީ ވައުދުތައް ނުފުއްދާ ވާހަކައާއި، ސަރުކާރުގެ ހިންގުން ދޯހަޅިވެފައިވާ ވާހަކަތައް ކޯލިޝަން ޕާޓުނަރުން ދަނީ ދައްކަމުންނެވެ. އަދި ވެރިކަން ބަދަލުކުރަން ޖެހޭކަމަށް ކޯލިޝަންގައި ތިބި ބައެއް ބޮޑެތި ޕާޓީތަކުން ބުނަމުންދާއިރު، މި ރިޔާސީ އިންތިޚާބުގައި އެ ޕާޓީތައް ވަކިން ނިކުމެ ވާދަކުރަމުންދާކަން ވެސް ފާހަގަކޮށްލެވެ އެވެ.

އެކަންކަމަށް ރިއާޔަތްކޮށް ޑރ ޝަހީމު ވިދާޅުވީ ވެރިކަން ހަވާލުކުރައްވަން ވާނީ ކަމަށް ޤާބިލު، ތައުލީމީ ހުނަރުވެރި ޓީމަކަށް ކަމަށެވެ. މިއަހަރުގެ ރިޔާސީ އިންތިޚާބަށް ބަލާލާއިރު ވެރިކަމަށް އެންމެ ޤާބިލު ޓީމު އޮތީ ޕްރޮގްރެސިވް ކޮންގްރެސް ކޯލިޝަނުގައިކަން ޑރ ޝަހީމު ފާހަގަކުރެއްވި އެވެ. އަދި އެމަނިކުފާނުވަނީ ގިނަ ބުރުތަކަށް މި އިންތިޚާބު ދިގު ދެންމުގެ ބަދަލުގައި އެއްބުރުން ޑރ މުއިއްޒު އިންތިޚާބު ކުރުމަށް އެދިވަޑައިގެންފަ އެވެ.

"މީ ކީއްކުރަން ދެވަނަ ބުރަކަށް ދާން ޖެހޭ އިންތިޚާބެއް މީ؟ މީ ދެވަނަ ބުރަކަށް ދާން ޖެހޭ އިންތިޚާބެއް ނޫނޭ. ތިޔަބޭފުޅުން ބައްލަވާ ދިވެހިރާއްޖޭގެ ލޮބުވެތި ރައްޔިތުން ވިސްނާ ވަޑައިގަންނަވާ، ފިކުރު ހިންގަވާ.. ބައްލަވާ އަޅުގަނޑުމެން 2008 އިން ފެށިގެން މި ކުރި ތަޖުރިބާ.. މި ތަނުގައި މި އޮތް ޕޮލިޓިކަލް ސްޓެބިލިޓީއާއި ދޭތެރޭ ވިސްނާ ވަޑައިގަންނަވާ.. އެއްވެސް ސަރުކާރަކަށް ގައުމު ހިންގާކަށް ފުރުސަތެއް ނުލިބޭ ސަރުކާރު ބަހާލަން ޖެހުމުގެ ސަބަބުން"

ޑރ މުހައްމަދު ޝަހީމު އަލީ ސައީދު

ޑރ ޝަހީމު އިތުރަށް ވިދާޅުވީ މި ޤައުމުގެ މިސްރާބު ރަނގަޅުކުރެވޭނެ ހަމައެކަނި ބޭފުޅަކު ޑރ މުއިއްޒު ކަމަށެވެ. އެހެންކަމުން މި އިންތިޚާބުގައި ޑރ މުއިއްޒަށް ކާމިޔާބު ކޮށްދިނުމަށް ޒުވާނުންނާއި، ދޮށީ އުމުރުގެ ބޭފުޅުންނާއި، ކަމުވޮށިގެންވާ ފަރާތްތައް މަސައްކަތްކޮށްދެއްވާނެ ކަމުގެ ފުރިހަމަ ޔަގީންކަން އޮތް ކަމަށާއި، މި ގައުމު އޮޔާދާން އެ ބޭފުޅުން ދޫކޮށްނުލައްވާނެކަމުގެ ޔަގީންކަން ވެސް އޮތްކަމަށް ޑރ ޝަހީމު ވިދާޅުވި އެވެ.