ރައީސް ޔާމީން ހިޔާ ސަރަހައްދަށް ވަޑައިގަންނަވަނީ!
ޕްރޮގްރެސިވް ކޮންގްރެސް ކޯލިޝަންގެ ލީޑަރު ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ޒައާމަތުގައި ހުޅުމާލޭގެ ދެވަނަ ފިޔަވަހީގެ ގޮތުގައި ބޮޑުބައެއް ހިއްކަވާ އަޅުއްވާދެއްވި ހިޔާ ފްލެޓުތަކުގައި ދިރިއުޅުއްވާ ރައްޔިތުންނާއި ބައްދަލުކުރެއްވުމަށް ހިޔާ ސަރަހައްދަށް ވަޑައިގަތުމަށް ރައީސް ޔާމީން ނިންމަވައިފި އެވެ.
ރައީސް ޔާމީން ބައިވެރިވެވަޑައިގަންނަވާ ވަރަށް ޚާއްސަ ޖަލްސާއެއް 3 ނޮވެމްބަރުވާ ހުކުރު ދުވަހުގެރޭ ހިޔާ ސަރަހައްދުގައި ބޭއްވުމަށް ވަނީ ނިންމާފައެވެ.
ރައީސް ޔާމިނުގެ މައްޗަށް އާރަށު މުއާމަލާތާއި ގުޅުވާ ކޮށްފައިވާ ހުކުމަށް ދިން ލުޔާއެކު އެމަނިކުފާނު ގެންދަަވަނީ ސަޕޯޓަރުންނާއި ބައްދަލުކުރައްވަމުން ނެވެ.
އެ ލުއި އެމަނިކުފާނަށް ލިބިވަޑައިގެންފައިވަނީ ރައީސް ޔާމީން ރައީސް އިބްރާހިމް މުހައްމަދު ޞާލިހަށް ގުޅުއްވާ ކުރެއްވި އިލްތިމާސްތަކަށްފަހުގައިކަން ފާހަގަކޮށްލެވެއެވެ. އެ ލުއާއެކު މާލެ ސަރަހައްދުގައި ހިމެނޭ މާލެ ހުޅުމާލެ ވިލިމާލެއަށް ވަޑައިގެން ރައްޔިތުންނާއި ބައްދަލުކުރައްވާ ޖަލްސާތަކުގައި ބައިވެރިވުމުގެ ފުރުސަތު އެމަނިކުފާނަށް ލިބިވަޑައިގަންނަވާނެ އެވެ.
އެގޮތުން އެމަނިކުފާނަށް ލިބިލެއްވި ލުޔާއެކު މީގެ ދެ ރޭ ކުރިން ޕީޕީއެމް އޮފީހުގައި ޕީޕީއެމް ޖަގަހަ ޖަލްސާއެއް ބާއްވާފައިވާއިރު، ރައީސް ޔާމީން ވަނީ އެ ޖަލްސާގައި ވާހަކަފުޅުވެސް ދައްކަވާފައެވެ.
އެ ޖަލްސާގައި ވާހަކަދައްކަވަމުން ރައީސް ޔާމީން ވަނީ އެމަނިކުފާނު މިނިވަންކުރުމަށް މަސައްކަތްޕުޅު ކުރެއްވި އަދި އެމަނިކުފާނުގެ ހައްގުގައި އަޑުއުފުއްލެވި އެންމެހާ ފަރާތްތަކަށް ޝުކުރުއަދާކުރައްވާފަ އެވެ.
ގަވައިދާއި ޚިލާފަށް ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމުގެ މަސައްކަތާއި ގެއްލިފައިވާ ކަނޑުގެ ސަރަހައްދު ހޯދުމުގެ މަސައްކަތް ޚާއްސަ އިސްކަމެއް ދީގެން ކުރައްވަން ޖެހޭނެކަމަށް އެމަނިކުފާނު ވިދާޅުވި އެވެ.
އޭގެ އިތުރުން އެމަނިކުފާނު ވަނީ ޑރ މުއިއްޒުގެ ސަރުކާރު ފެއިލްވިޔަ ނުދެއްވާ، ނަތީޖާތައް ހާސިލްކޮށްދިނުމުގައި މަސައްކަތްކުރައްވާނެ ކަމަށް ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
