އެޗްޑީސީއިން ހުޅުމާލެ ދެވަނަ ފިޔަވަހީގައި ވަގުތީ މާރުކޭޓެއް ހަދަނީ

މިދިޔަ އަހަރެކޭ އެއްފަދައިން ރަމަޟާން މަހަށް ހުޅުމާލެ ދެވަނަ ފިޔަވަހީގެ ހިޔާ ސަރަހައްދުގައި ވަގުތީ މާރުކޭޓެއް ހެދުމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ނިންމާފިއެވެ.

އެގޮތުން އެ ކޯޕަރޭޝަނުން ނެރިފައިވާ އިއުލާނެއްގައި ވަނީ 18 ގޮޅިއެއް މި ސަރަހައްދުން ދިނުމަށް ހަމަޖެހިފައިވާކަމަށާއި މީގެން 9 ގޮޅިއެއް ޙާއްސަ ކުރެވިފައިވަނީ ހިޔާ ސަރަހައްދުގައި ދިރިއުޅޭ ފަރާތްތަކަށް ކަމަށެވެ. އަދި ބާކީ 9 ގޮޅި އާއްމުކޮށް ހުޅުވާލެވި އިއުލާން ކުރެވިގެންދާނެ ކަމަށެވެ.

މިއީ ރަމަޟާން މަހާއި ގުޅިގެން ހިޔާގައި ދިރިއުޅޭ ރައްޔިތުންނަށް ފަސޭހައިން ކާބޯތަކެތި ލިބޭނެ މަގުފަހިކޮށްދިނުމަށް ކުރާ މަސައްކަތެއް ކަމަށް އެޗްޑީސީ އިން ބުނެފައިވެއެވެ.

އެގޮތުން ރަމަޟާން މަހަކީ ގިނަ އަދަދަކަށް މިފަދަ ޙިދުމަތްތަކަށް އޮންނަ ޑިމާންޑް ބޮޑުވާ މަހަކަށް ވެފައި، މިކަމުގެ ސަބަބުން ހިޔާ ސަރަހައްދުގައި ދިރިއުޅޭ ރައްޔިތުންނަށް ލިބޭ ލާބައާއި ފައިދާއަށް އެޗްޑީސީގެ ފަރާތުން މިހާރު ވާނީ މާލެ ސިޓީ ކައުންސިލަށް ދެވަނަ ފިޔަވަހިން ވަގުތީ މާރުކޭޓެއް ހުޅުވުމަށް ބިން ހަމަޖައްސައި ދީފައިކަން އިއުލާނުގައި ވަނީ ފާހަގަކޮށްފައެވެ.

މީގެ އިތުރުން، ވިނަރެސް އިމާރާތުގެ ކޮމާޝަލް ބްލޮކްއާއި އެސްޓީއޯގެ ޚިދުމަތްތައް ފޯރުކޮށްދިނުމަށް ޔުނިޓެއް ކަނޑައެޅި މިދިޔަ މަހު ވަނީ ހަވާލު ކުރެވިފައިކަމަށް ވެސް އެކޯޕަރޭޝަނުން ބުނެފައިވެއެވެ.

މިއާއިއެކު ރައްޔިތުންގެ ލާބައާއި މަންފާއަށް ކުރެވޭ ކޮންމެ ކަމަކީ ވެސް އެޗްޑީސީއިން ބަލައިގަންނަ ކަމަކަށް ވެފައި މިފަދަ ކަންކަމަށް އެ ކޯޕަރޭޝަންގެ އެއްބާރުލުން ހުރިހާ މުައްސަސާތަކަކަށް ވެސް ލިބޭނެ ކަމުގެ ޔަޤީންކަން ވަނީ އަރުވައިފައެވެ.