ހަނގުރާމަ މެދު ކަނޑާލުމުގެ މަޝްވަރާތައް ހުއްޓާލައިިފި

ފަލަސްތީނުގެ ޣައްޒާ އަށް އިސްރާއިލުން ދެމުންދާ އަނިޔާވެރި ހަމަލާތައް މެދުކަނޑާލުމަށް އިސްރާއީލާއި ޤަތަރާއި މެދު ކުރިއަށް ދިޔަ މަޝްވަރާތައް އިސްރާއީލުން ހުއްޓާލައިިފިއެވެ.

އިސްރާއީލުން ހޮނިހިރު ދުވަހު ބުނީ ޣައްޒާގައި ހިނގަމުންދާ ހަނގުރާމަތައް ނިމުމަކަށް ގެނައުމާ ގުޅޭ ގޮތުން ގަތަރުގައި ކުރަމުންދާ މަޝްވަރާތަކުގައި "ޑެޑް އެންޑް" އަކަށް އައިސްފައިވާ ކަމަށެވެ. އަދި އިސްރާއީލުން މި މަޝްވަރާތަކަށް ޤަތަރަށް ދިޔަ ޓީމު އެނބުރި އެގައުމަށް އައުމަށް އިސްރާއީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ ވަނީ އަމުރުކޮށްފައެވެ.

މިކަމާއި ބެހޭގޮތުން އިސްރާއީލުން ނެރުނު ބަޔާނެއްގައި ބުނީ ހަމާސް ޖަމާއަތަށް ފޯރުކޮށްދީފައިވާ ލިސްޓުގައި ހިމެނޭ ހުރިހާ އަންހެނުންނާއި ކުޑަކުދިން ދޫކޮށްލުމަށް ހިމެނޭ އެއްބަސްވުމާއި އެއްގޮތަށް އެ ޖަމާއަތުން އަމަލު ކޮށްފައިނުވާތީ ހަނގުރާމަ މެދުކަނޑާލުމަށް ކުރަމުން ދިޔަ މަޝްވަރާތައް ހުއްޓުމަކަށް ގެނުމަށް އެގައުމުގެ ބޮޑުވަޒީރު ނިންމީ ކަމަށެވެ.

ތިން ވަނަ ފަހަރަށް ހަނގުރާމައިގެ މެދުކަނޑާލުމަށް ޤަތަރުން މަސައްކަތް ކުރި ނަމަވެސް އިސްރާއިލުން އެއްބާރުލުން ނުދިނުމަށް ނިންމުމުގެ ސަބަބުން އެމަސައްކަތް ވަނީ ހުއްޓާލަންޖެހިފައެވެ. 
އަލަށް ކުރުމަށް ހަމަޖެހިފައިވާ މަޝްވަރާތަކުގައި ބޮޑަށް އަލިއަޅުވާލާފައިވަނީ ރަހީނު ކޮށްފައިވާ އަންހެނުންނާއި ކުޑަކުދިން ގެ އިތުރުން ހަނގުރާމަ އާއި ގުޅުމެއް ނެތް ރަހީނުން ދޫކޮށްލުމާއި ހަނގުރާމަ ހުއްޓާލުމުގެ މަޝްވަރާތަކާއި ބެހޭ ގޮތުން ކަމަށް ރޮއިޓާސް ނޫސް އެޖެންސީން ބުނެ އެވެ.

ހަނގުރާމަ މެދުކަނޑާލުމަށް އެއްބަސްވި މުއްދަތު ހަމަ ވުމާއި އެކު އަނިޔާވެރި އިސްރާއީލުން ވަނީ ފަލަސްތީނު ޣައްޒާއަށް ހަމަލާދޭންފަށާފައެވެ.