"ކެންޑިޑެސީ މުއްދަތު އިތުރުކޮށްފި ނަމަ ގާނޫނުގައި ބުނާ ތާރީހަށް ރައީސުލްޖުމްހޫރިއްޔާ އިންތިހާބު ނުކުރެވޭނެ"

ކުރީގެ ރައީސް، އަދި އިދިކޮޅު ރިޔާސީ ކެންޑިޑޭޓް އަބްދުالله ޔާމީނަށް ޕީޕީއެމްގެ ރިޔާސީ ކެންޑިޑޭޓަށް ވުމުގެ ފުރުސަތު ގެއްލޭ ހާލަތެއްގައި، އެ ޕާޓީން އެހެން ކެންޑިޑޭޓެއް ނެރެން އިތުރު ވަގުތު ދީފި ނަމަ ގާނޫނުގައި ބުނާ މުއްދަތަށް ރައީސުލްޖުމްހޫރިއްޔާގެ މަގާމަށް މީހަކު އިންތިހާބު ކުރަން ހުރަސް އެޅިދާނެ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

ޔާމީންގެ ކެންޑިޑެންސީ ބަލައިނުގަންނަން އިލެކްޝަންސް ކޮމިޝަން (އީސީ) އިން ނިންމުމުން ސުޕްރީމް ކޯޓަށް ހުށަހެޅި މައްސަލައިގައި މިވަގުތު ކުރިއަށްދާ އިރު، އެ މައްސަލައަށް ޕީޕީއެމް އިން ތަދައްހުލުވެ، އެ ޕާޓީން އެދުނީ ރައީސް ޔާމީނަށް ކުރިމަތިނުލެވޭނެ ކަމަށް ސުޕްރީމް ކޯޓުން ނިންމާ ހާލަތެއްގައި، ޕީޕީއެމް އަށް އިތުރު ކެންޑިޑޭޓަކު ހުށަހެޅުމުގެ ފުރުސަތު ދިނުމަށް ކެންޑިޑެސީގެ މުއްދަތު އިތުރު ކުރުމަށް އަމުރެއް ނެރެދިމަށެވެ.

އެހެން ނަމަވެސް ޕީޕީއެމްގެ އެ ހުށަހެޅުމަށް ޖަވާބު ދެއްވަމުން އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ކެންޑިޑޭޓުންގެ ފޯމު ހުށަހަޅަން އިތުރު ވަގުތު ދީފިނަމަ، ގާނޫނުގައި ބުނާ މުއްދަތަށް، ގާނޫނުގައި ބުނާ ހައްގުތައް ކެންޑިޑޭޓުންނަށް ލިބިދީގެން، އިންތިހާބުގެ ކަންކަން ގެންދިޔުމަށް ހުރަސްއެޅޭނެ ކަމަށެވެ.

"އެއީ އާއްމު ގާނޫނުގައި ބުނާ ގޮތުން ކެންޕެއިން ކުރުމަށް ބޭނުންވާ 30 ދުވަސް، މިހާރު ކެންޑިޑެސީއަށް ހުޅުވާލެވިފައިވާ މުއްދަތު އިތުރު ކޮށްފި ނަމަ، ނުލިބޭނެކަން. އަދި އިންތިހާބު ބާއްވާ ދުވަސް އިތުރަށް ފަސްކޮށްފި ނަމަ މުޅި ވޯޓާސް ލިސްޓް އަލުން އެކުލަވާލައި މުޅި އިންތިހާބު އަލުން ތަރުތީބުކުރަން ޖެހުމަކީ، ގާނޫނުގައި ބުނާ މުއްދަތަށް، ގާނޫނު އަސާސީގައި ބުނާ މުއްދަތަށް ރައީސުލްޖުމްހޫރިއްޔާ އަކު އިންތިހާބުކުރުމަށް ހުރަސް އެޅިދާނެ ކަމެއް،"

އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ

ރައީސް ޔާމިނުގެ ކެނޑިޑެސީ ފޯމު ޕީޕީއެމުން އިލެކްޝަންސް ކޮމިޝަނަށް ހުށައެޅީ އޮގަސްޓު 1 ގަ އެވެ. ހަމަ އެދުވަހު އީސީން ވަނީ ރައީސް ޔާމިނުގެ ކެނޑިޑެސީ ފޯމު ބަލައިނުގަތުމަށް ނިންމާފަ އެވެ. ސަބަބެއްކަމަށް އީސީން ބުނެފައިވަނީ އެމަނިކުފާނަކީ މިވަގުތު ޖަލު ހުކުމެއް ތަންފީޒު ކުރައްވަމުން ގެންދަވާ ފަރާތަކަށް ވުމެވެ.

އެ މައްސަލައިގެ އިސްތިއުނާފު ސްޕްރީމް ކޯޓުގައި ކުރިއަށްދާއިރު، އެ މައްސަލަ ރައީސް ޔާމިނާއި ދެކޮޅަށް ނިމިއްޖެ ނަމަ, އެ މަނިކުފާނުގެ ބަދަލުގައި ޕީއެންސީގެ ފަރާތުން މާލެ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު އިންތިހާބުގައި ވާދަކުރައްވަން ޕީއެންސީން ވަނީ ނިންމާފައެވެ.

އަންނަ މަހު ނުވައެއްގައި އޮންނަ ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ފޯމު ހުށަހެޅުމުގެ ސުންގަޑި އަންނަ ހޯމަ ދުވަހަށް ހަމަވާނެ އެވެ. އެހެންކަމުން ސުޕްރީމް ކޯޓުގެ ނިންމުން އެއެއަށްވުރެ ފަސްވެއްޖެ ނަމަ ޕީޕީއެމް އަށް އިތުރު ކެންޑިޑޭޓަކު ހުށައެއްނޭޅޭނެ އެވެ. ޕީޕީއެމްގެ އިތުރު ކެންޑިޑޭޓަކު ހުށަހެޅުމުގެ ފުރުސަތަށް އިދިކޮޅުން އެދުނީ އެހެންވެ އެވެ.