ވެރިކަން ލިބުނު ކަމުގައި ވިޔަސް ކުރިޔަށް އޮތީ ފަސޭހަ ދުވަސްވަރެއް ނޫން: އަބްދުރަހީމް
އިންތިޚާބު ކާމިޔާބު ވުމާއިއެކު ޕީޕީއެމް އަދި ޕީއެންސީއިން ފެށި ދަތުރު ނިމުނީ ނޫންކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުއްﷲ (އަދުރޭ) ވިދާޅުވެއްޖެއެވެ.
އަދުރޭ މިފަދައިން
ވިދާޅުވެފައި ވަނީ މިއަދު ޕީޕީއެމް ޕީއެންސީއިން ހިތަދޫގައި ބޭއްވި ޖަލްސާގައި
ވާހަކަފުޅު ދައްކަވަމުންނެވެ.
އަދުރޭގެ މި ވާހަކަފުޅުގައި އެބޭފުޅާ ވަނީ ޕީޕީއެމް
ޕީއެންސީއަށް ކުރިމަތިވާ އެންމެހާ ކަމެއްގައި ހިތްވަރާއިއެކު ތިބި އެންމެހާ
ފަރާތްތަކަށް ޝުކުރު އަދާ ކުރައްވާފައެވެ.
"އެ ބޭފުޅުން ދެއްކެވި ހިތްވަރުގެ ނަތީޖާއަކީ އަޅުގަނޑުމެންގެ ދަތުރު އަޅުގަނޑުމެން ގަސްތު ކުރި މިސްރާބުން ކައްސާ ނުލައި ކުރިއަށް ގެންދެވުނުކަން.އޭގެ ނަތީޖާއަކީ މިދެންނެވި އަމާޒަށް އަޅުގަނޑުމެން ފެށި ދަތުރުގައި މިއަދު ހަމަޖެހުމާއި އެކީގައި އަޅުގަނޑުމެންނަށް ހިމޭން ކަމުގެ އަލި ވުން."
އަދުރޭ ވިދާޅުވިއެވެ.
މިހާ ހިސާބަށް އާދެވުނު އިރު ނުހަނު އުނދަގޫ ހާލަތްތަކާއި ކުރިމަތި ލާން ޖެހުނު ކަމަށާއި، ކުރިއަށް ދިއުމަށް ނުހަނު ބޮޑެތި ގޮންޖެހުން ތަކާއި ކުރިމަތި ލާންޖެހުނު ކަމަށެވެ.
އިންތިޚާބު ކާމިޔާބު ކޮށް ވެރިކަން ލިބުނު ކަމުގައި ވިޔަސް ކުރިޔަށް އޮތީ ފަސޭހަ ދުވަސްވަރެއް ނޫންކަމަށާއި، ދެންވެސް އޮތީ އުނދަގޫ ކަމަށް އެބޭފުޅާ ފާހަގަ ކުރެއްވިއެވެ.
އެހެންނަމަވެސް މި ދުވަސްތައް ފަސޭހަ ދުވަސްތަކަކަށް ބަދަލު ކުރުމުގެ އިޚްތިޔާރު އޮތީ ދިވެހި ރައްޔިތުންގެ އަތްމަތީގައި ކަމަށާއި އެގޮތަށް ކަންކުރެވޭނީ ރައްޔިތުން ހޮއްވެވި ސަރުކާރުގެ މެޖޯރިޓީއެއް އޮތް ރައްޔިތުންގެ މަޖިލީހެއް ހޮއްވެވުންކަމަށް އަދުރޭ ވިދާޅުވިއެވެ.
މަޖިލިސް އިންތިޚާބުގެ ޕްރައިމަރީ ކާމިޔާބު ކުރާ ކޮންމެ ބޭފުޅަކަށް ވެސް ގޮނޑި ހޯދައިދިނުމަށް ޓަކައި ކުރަންޖެހޭ ހުރިހާ މަސައްކަތެއް ޕީޕީއެމް ޕީއެންސީއިން ކޮށްދޭނެ ކަމުގެ ޔަގީންކަން އަދުރޭ މި ޖަލްސާގައި ވާހަކަފުޅުދައްކަވަމުން ވަނީ ދެއްވާފައެވެ.
ޕީޕީއެމް ޕީއެންސީއިން ރާއްޖޭގެ އެކި ކަންކޮޅުތަކަށް ކުރަމުންގެންދާ މި ދަތުރަކީ މިއަހަރުގެ ރިޔާސީ އިންތިޚާބު ޑރ.މުހައްމަދު މުއިއްޒު ކާމިޔާބު ކުރެއްވުމާއި ގުޅިގެން ކުރައްވާ ދަތުރުތަކެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
