ޓެރިފްތަކަކީ އިތުބާރުކުރެވޭ ޕާޓްނަރުންނާއެކު ވިޔަފާރިފުޅާކުރަން ލިބޭ ފުރުސަތެއް: ބްރެޒިލް ސަފީރު

އެމެރިކާގެ ރައީސް ޑޮނަލްޑް ޓްރަމްޕް އިއުލާންކުރެއްވި ޓެރިފްތަކަކީ، އިތުބާރުކުރެވޭ ޤައުމުތަކާއެކު ވިޔަފާރިކުރަން ލިބޭ ފުރުސަތެއްކަމަށް ބްރެޒިލުން އިންޑިއާއަށް ކަނޑައަޅާފައި ހުންނަވާ ސަފީރު ކެނެތު ފީލިޒް ހަޒިންސްކީ ވިދާޅުވެއްޖެއެވެ.

ސަފީރު ވިދާޅުވީ އެމެރިކާއަށް އެތެރެކުރާ މުދަލުން ނަގަން ފެށި ބޮޑެތި ޓެރިފްތަކަކީ ގޮންޖެހުމެއްކަމަށާއި، ހަމައެއާއެކު އެއީ ފުރުސަތުތަކެއް ފަހިވެގެންދާވެސް ކަމެއްކަމަށެވެ. އަދި އިތުބާރުކުރެވޭ އެހެން ގައުމުތަކާއެކު ކުރެވޭ ވިޔަފާރި އިތުރުކުރުމަކީ އޭގެން ފުރުސަތެއްކަމަށް އޭނާ ވިދާޅުވިއެވެ.

ބްރެޒިލްއާއި އިންޑިއާއިން ފަހަކަށް އައިސް ވިޔަފާރީގެ ގުޅުން ބަދަހިކުރުމަށް ދަނީ މަސައްކަތްކުރަމުންނެވެ. ދާދިފަހުން އިންޑިއާގެ ބޮޑުވަޒީރު ނަރެންދްރަ މޯދީއާއި، ބްރެޒިލްގެ ރައީސް ލުއިޒް އިނާޝިއޯ ލޫލާ ޑަ ސިލްވާ ވަނީ ފޯނުން ގުއްވާ މަޝްވަރާތައް ކުރައްވާފައެވެ. އަދި މި މަޝްވަރާތައް ވަރަށް ކާމިޔާބުކަމަށް ބްރެޒިލްގެ ސަފީރު ހަޒިންސްކީ ވިދާޅިވިއެވެ.

މިދިޔަ މަހު މޯދީ ވަނީ ބްރެޒިލްއަށް ދަތުރުފުޅެއްވެސް ކުރައްވާފައެވެ. މި ދަތުރުފުޅުގައިވެސް ދެގައުމުގެ މެދުގައި ގުޅުން ބަދަހިކުރުމާއި ބެހޭ މުހިއްމު މަޝްވަރާތަކެއް މޯދީ ކުރެއްވިއެވެ.

ބްރެޒިލްއާއި އިންޑިއާއިން އެމެރިކާއަށް އެތެރެކުރާ މުދަލުން 50 އިންސައްތައިގެ ޓެރިފެއް ނެގުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ނިންމަވާފައެވެ. އެމެރިކާއަށް އެތެރެކުރާ މުދަލުން ނަގާ ޓެރިފް ބޮޑުކުރުމާއިއެކު އިންޑިއާއިން ދަނީ ވިޔަފާރީގެ އެހެން ބައިވެރިން ހޯދުމުގެ މަސައްކަތްކުރަމުންނެވެ. އަދި ދާދިފަހުން އިނގިރޭސިވިލާތާއެކު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފައިވާއިރު، އެހެން ބައެއް ގައުމުތަކާއެކުވެސް ވިޔަފާރީގެ އެއްބަސްވުންތައް ގާއިމްކުރުމަށް އެގައުމުން ދަނީ މަސައްކަތްކުރަމުންނެވެ.

އެމެރިކާއާއެކުވެސް އެއްބަސްވުމެއް ހެދޭތޯ އިންޑިއާއިން މަސައްކަތްކުރިއެވެ. އެހެންނަމަވެސް އިންޑިއާގެ ދަނޑުވެރިކަމުގެ ސިނާޢަތުގެ ތެރެއަށް އެމެރިކާގެ ވިޔަފާރިތަކަށް ވަންނަން ފުރުސަތު ދޭން އިންޑިއާއިން ބޭނުން ނުވުމުން މި މަޝްވަރާތައް އަދިވެސް ކޮޅެއްގައެއް ނުޖެހެއެވެ. މޯދީ ވިދާޅުވީ އެމަނިކުފާނުގެ ސިޔާސަތަކީ 'ފުރަތަމަ ދަނޑުވެރިން' ކަމަށާއި، ދަނޑުވެރިން ކާންބޯން ކުރާ މަސައްކަތުގެ ތެރެއަށް ބޭރުގެ ބަޔަކަށް އައިސް ވަންނަން ފުރުސަތު ނުދެވޭނެ ކަމަށެވެ.