ތިލަމާލެ ބްރިޖްގެ މަސައްކަތް ކުރުމަށްޓަކައި އިތުރު ޕްލެޓް ފޯމެއް ގެނެސްފި

މާލެ-ވިލިނގި-ގުޅީފަޅު ގުޅުވާލާ، ތިލަމާލެ ބްރިޖް ގެ މަސައްކަތް ކުރުމަށްޓަކައި "މަހަރާޖާ" ކިޔާ އިތުރު ޕްލެޓްފޯމެއް ގެނެސް މަސައްކަތް ފަށައިފިއެވެ.

ބަރުދަނުގައި 650 ޓަނު ހުންނަ 350 ޓަނުގެ ބަރު އުފުލުގެ ގާބިލްކަން ލިބިފައިވަ މި ޕްލެޓްފޯމު ބޭނުންކޮށްގެން މާލެ އާއި ވިލިމާލެއާ ދެމެދު 24 ޕައިލެއްގެ މަސައްކަތް ކުރުމަށް ވަނީ ހަމަޖެހިފައެވެ.

މީގެ ކުރިންވެސް ވަނީ ތިލަމާލެ ބްރިޖްގެ މަސައްކަތް ކުރުމަށްޓަކައި ރުމެއިލާ ނަމަކަށް ކިޔާ ޕްލެޓްފޯމެއް ގެނެސް ބްރިޖްގެ މަސައްކަތް ކުރިއަށް ގެންގޮއްސައެވެ.

އަދި ހަމަ މީގެ އިތުރުން ބްރިޖު މަޝްރޫއުގައި މޫދުގެ ތިލަ ހިސާބުތަކުގެ ޕައިލިންގެ މަސައްކަތްކުރަނީ "މަހަރާނީ" ނަމަކަށް ކިޔާ ޕްލެޓްފޯމެކެވެ.

މި މަޝްރޫއުގެ ދަށުން މާލޭގައި އެއްގަމުގައި ޖަހަން ޖެހޭ ތަނބުތަކުގައި މަސައްކަތް ނިމި، ސުޕަސްޓްރަކްޗާގެ މަސައްކަތް ފެށުމަށް ވާން ޖެހޭ ތައްޔާރީތައް އަންނަނީ ވަމުންނެވެ.

އިންޑިއާގެ 100 މިލިއަން ޑޮލަރުގެ ހިލޭ އެހީ އާއި 400 މިލިއަން ޑޮލަރުގެ ލޯނު ފައިސާއިން ކުރިއަށް ގެންދަ މި މަޝްރޫއު ތަފާތު ސަބަބުތަކާހުރެ ލަސްވަމުންދާތީ އިދިކޮޅު ފަރާތްތައް އަންނަނީ މި ބްރިޖް މި ސަރުކާރަށް ނޭޅޭނެ ކަމުގައި ބުނެ ފާޑުކިޔަމުންނެވެ.