އިސްރާއީލުން އަނެއްކާވެސް ޣައްޒާގެ ހޮސްޕިޓަލްތަކަށް އަމާޒު ކޮށް ހަމަލާ ދޭން ފަށައިފި

އަނިޔާވެރި  އިސްރާއީލުގެ ސިފައިން  ޓެންކް ޝެލްތަކާއި މިސައިލްތައް ބޭނުންކޮށްގެން ޣައްޒާ އާއި އުތުރު ޣައްޒާގެ 14 ހޮސްޕިޓަލަކަށް ބޮމުގެ ހަމަލާތަކެއް ދީފިއެވެ.

އެންމެ ބޮޑަށް ހަމަލާ އަމާޒު ކޮށްފައިވަނީ ކަމާލް އަދުވާން، ޝިފާ މެޑިކަލް ކޮމްޕްލެކްސް، އަދި އަލްމުއަމަލާނީ ހޮސްޕިޓަލަށެވެ.

ފަލަސްތީނުގެ ނިއުސް އެޖެންސީތަކުން ބުނާ ގޮތުގައި ގެދޮރު ގެއްލިފައިވާ 10،000 އަށް ވުރެ ގިނަ މީހުން ވަނީ ރައްކާތެރިކަމަށްޓަކައި ކަމާލް އަދުވާން ހޮސްޕިޓަލްގެ ހިމާޔަތް ހޯދާފައެވެ. މި ހޮސްޕިޓަލުގެ ގޭޓު ކައިރިއަށް ބޮމުގެ ހަމަލާތައް އަމާޒު ކުރުމުގެ ސަބަބުން  4 މީހަކު ޝަހީދުވެ، އިތުރު 9 މީހަކު ޒަޚަމްވެފައިވެއެވެ.

އިތުރަށް ނިއުސް އެޖެންސީ ތަކުން ބުނި ގޮތުގައި އިސްރާއީލުން މިހާރު ޣައްޒާއަށް ދެމުންދާ ބޮމުގެ ހަމަލާތަކުގެ ސަބަބުން އެހޮސްޕިޓަލުގެ އެތެރެއާއި ބޭރުގައި 35 ހަށިގަނޑު ވަޅު ނުލެވި އެބަހުއްޓެވެ.

އިސްރާއީލު ސިފައިން ވަނީ ޣައްޒާގެ އަލް މުއަމަލާނީ ހޮސްޕިޓަލް ކައިރީގައި ހުރި އިމާރާތްތަކަށް ހަމަލާ އަމާޒު ކޮށްފައެވެ.

އިއްޔެ، ޣައްޒާގައި ހުންނަވާ ހެލްތު މިނިސްޓްރީގެ ތަރުޖަމާނު ވަނީ އިސްރާއީލުން ދިން ވަރުގަދަ ބޮމުގެ ހަމަލާތަކުގެ މަގުސަދަކީ ހޮސްޕިޓަލްތައް ހިދުމަތް ކަނޑާލުން ކަމަށް ބުނެފައެވެ.

އިސްރާއީލުގެ އަސްކަރިއްޔާއިން ވަނީ ފަލަސްތީނުގެ ބައެއް ޑޮކްޓަރުން ޝަހީދުކޮށްލުމަށް މަސައްކަތްކޮށްފަ އެވެ. މީގެ އިތުރުން ޝިފާ މެޑިކަލް ކޮމްޕްލެކްސްގެ ޖެނެރަލް ޑިރެކްޓަރު ޑރ.މުހައްމަދު އަބޫ ސަލާމާ ހިމެނޭ ގޮތަށް 35 ޑޮކްޓަރުން ހައްދު ފަހަނަ އަޅާފައިވާ އިސްރާއީލުން ވަނީ ހައްޔަރުކޮށްފައެވެ.

އިސްރާއީލުން ފަލަސްތީނުގެ ޣައްޒާއަށް ދެމުން ގެންދާ ހަމަލާތަކަށް މަހަކަށް ވުރެ ގިނަ ދުވަސް ވެފައި ވާއިރު، މިހާތަނަށް އެހަމަލާތަކުގައި 15،523 އަށް ވުރެ ގިނަ މީހުން ޝަހީދުވެ، 41،316 އަށް ވުރެ ގިނަ މީހުން ވަނީ ޒަޚަމްވެފައިއެވެ.