"މިނިވަން ގައުމެއް ގޮތުގައި އޮވެގެން، ތަރައްގީ ކުރިއަށް ގެންދިއުމުގެ ގާބިލިއްޔަތު ގާސިމްގެ އެބަހުރި"
ތަރައްގީގެ މަރުހަލާގައި މިނިވަން ގައުމެއް ގޮތުގައި އޮވެގެން ކުރިއަށް ގެންދިއުމުގެ ގާބިލިއްޔަތު ގާސިމްގެ އެބަހުރިކަމަށާއި ގާސިމްއާއި މިއަދު ގުޅިވަޑައިގަތީ އެކަމުގެ ފުރިހަމަ އިތުބާރު ގާސިމްގެ ހުންނެވިކަން އެނގިވަޑައިގެން ކަމުގައި މިއަދު ޖުމްހޫރީ ޕާޓީއާއި ގުޅިވަޑައިގެންނެވި، ޑރ މަހުމޫދު ޝައުގީ ވިދާޅުވެއްޖެއެވެ.
ޖުމްހޫރީ ޕާޓީގެ މައި އިދާރާ ކުނޫޒްގައި އޮތް ބައްދަލުވުމުގައި އެ ޕާޓީއަށް ސޮއިކުރައްވާ ޑރ ޝައުގީ ދެއްކެވި ވާހަކަފުޅުގައި ވިދާޅުވީ، ދިވެހިރާއްޖޭގެ ތަރައްގީގެ ދުވެލި ހަމައަކަށް އަޅުވައި ރަނގަޅުކުރެވޭނެ ވަރުގެ ކޮންފިޑެންސް ގާސިމްގެ ކިބައިގައި ހުންނެވިކަމުގެ ޔަގީންކަން އެ ބޭފުޅާގެ އެ އޮތްކަމުގައެވެ.
ރާއްޖެ ތަރައްގީ ކުރެވޭނީ އެކަމުގެ ފަންނީ ގާބިލް މީހުންގެ އެހީތެރިކަމުން ކަމުގައި ވިދާޅުވެ ޝައުގީ ވިދާޅުވީ އެކަން ކުރުމުގެ ގާބިލްކަން ގާސިމްގެ އެބް ހުރި ކަމުގައެވެ.
" ގާސިމްއަކީ ވަރަށް ގިނަ ފަންނީ އިލްމީ އަދި ގާބިލް ބޭފުޅުން ގޮވައިގެން މަސައްކަތް ކުރައްވައިފައި ހުންނެވި ބޭފުޅެއް، އަދި އެފަދަ ބޭފުޅުންގެ އެހީތެރިކަން ހޯދަވައިގެން މަސައްކަތް ކުރުމުގެ ގާބިލްކަން ހުރި ލީޑަރެއް"
ޝައުގީ ވިދާޅުވިއެވެ.
މީގެ އިތުރުން ޝައުގީ ވިދާޅުވީ ގާސިމްގެ މެނިފެސްޓޯ އެކުލަވާލުމުގައި އަމަލީ ގޮތުން ބައިވެރިވެ ވަޑައިގެންނެވުނު ކަމަށާއި އެކަމުންވެސް ގައުމާމެދު ގާސިމްގެ ތަސައްރަފު ހުރިވަރު ސާފުވެގެން ހިނގައްޖެ ކަމުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
