"ރަސޫލާ (ޞޢވ) ސުވަރުގެ ވަޑައިގެންނެވީ މި ދުނިޔެ، އެހެން ދުނިޔެއަކަށް ބަދަލު ކުރައްވާފައި!"

ނަބީކަމާއި ރަސޫލުކަން ޚަތިމު ކުރެއްވި އަހަރެމެންގެ ލޮބުވެތި މާތް ރަސޫލާ މުޙައްމަދު ޞައްލައްالله ޢަލައިހި ވަސައްލަމް މި ދުނިޔެ ދޫކުރެއްވީ އެކަލޭފާނާއި ހަވާލު ކުރެވުނު ޒިންމާ ފުރިހަމައަށް އަދާ ކުރައްވައި، މި ދުނިޔެ އެހެން ދުނިޔެ އަކަށް ބަދަލު ކުރައްވާފައި ކަމަށް މިއަދުގެ ޚުތުބާގައި ބުނެފިއެވެ.

"ކީރިތި ރަސޫލާ ޞައްލައްالله ޢަލައިހި ވަސައްލަމް ދުނިޔޭގެ އަލިކަން ދެކެވަޑައިގެންނެވި މައްސަރު"، މި މައުޟޫއަށް މިއަދު އިއްވި ޚުތުބާގައި ވަނީ، އެކަލޭގެފާނު ދުނިޔޭގެ އަލިކަން ދެކެވަޑައިގެންނެވުމުން ފެށިގެން ރަސޫލު ކަމާއި ގެން ފޮނުއްވުމާއި އަދި ދުނިޔެ ދޫކުރެއްވުމާއި ހަމައަށްވެސް ހަޔާތްޕުޅުގައި ހިނގައި ދިޔަ ބައެއް ކަންކަމާއި، އޭރުގެ މުޖުތަމަޢު ގައި ކަންކަން ހިނގަމުންއައި ގޮތަށް އަލިއަޅުވާލާފައެވެ.

އެގޮތުން ޚުތުބާގައި ބުނީ، ރަސޫލާ ޞައްލައްالله ޢަލައިހި ވަސައްލަމް ދުނިޔޭގެ އަލިކަން ދެކެވަޑައިގެންނެވީ ޢާމުލް ފީލް އޭ ކިޔުނު އަހަރުގެ ރަބީޢުލް އައްވަލް މަހުގެ ތެރޭގައި ކަމަށެވެ. އަދި އޭރު ދުނިޔެ ހާލަތު އޮތީ ވަރަށް ވެސް ދަށު ދަރަޖައެއްގައި ކަމަށާ، މުޅި ދުނިޔެ އޮތީ ޖަހާލަތާއި އަނދިރި ކަމުގެ ތެރޭގައި ކަމަށްވާއިރު، ތައުހީދުގެ ސާފު ސީދާ އަގީދާ އަކީ ކޮން އެއްޗެއްކަން ދަންނަ މީހަކުވެސް އޭރު ނެތް ކަމަށް ޚުތުބާގައި ވަނީ ފާހަގަކޮށްފަ އެވެ.

އެފަދަ ނިކަމެތި ހާލަތެއްގައި މުޅި ދުނިޔެ އޮއްވާ ރަސޫލާ ޞައްލައްالله ޢަލައިހި ވަސައްލަމް ދުނިޔެއަށް ވަޑައިގެންފައިވާ ކަމަށާ، އެކަލޭގެފާނު ދުނިޔޭގެ އަލިކަން ދެކެވަޑައިގެންނެވީ ޔަތީމު ޙާލު ކޮޅުގައި ނަމަވެސް އެކަލޭގެފާނަށް ތަރުބިއްޔަތު ލިބިވަޑައިގެންނެވީ ސީދާ އިލާހީ އިނާޔަތްތެރި ކަމުގެ ދަށުގައި ކަމަށް ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނީ، އުމުރުފުޅުން 40 އަހަރުފުޅުގައި ރަސޫލާ ޞައްލައްالله ޢަލައިހި ވަސައްލަމް އަށް ދީނަށް ގޮވައިލެއްވުމުގެ މަތިވެރި ޒިންމާ ހަވާލުކުރެއްވުމާއި އެކު، އެ ޒިންމާވެސް އެންމެ ފުރިހަމަ ގޮތުގައި އަދާކުރެއްވުމުގެ މަސައްކަތް ފެއްޓެވި ކަމަށެވެ. އެކަމުގެ ތެރެއިން، އެކަމަށް ހުރަސް އެޅުމަށް މުޝްރިކުން އެކަލޭގެފާނަށް ނުކުރާ އުނދގުލެއް ނެތްއިރު، އެ ލޮބުވެތި ނަބިއްޔާ ޞައްލައްالله ޢަލައިހި ވަސައްލަމްގެ  ފުރާނަފުޅަށް ނުރައްކައުވާ ދަރަޖައަށް ވެސް މުސްލިމުންގެ ޢަމަލުތައް ދިޔަކަން ޚުތުބާގައި ފާހަގަކޮށްފައިވެ އެވެ.

އެހެންނަމަވެސް، ރަސޫލާ ޞައްލައްالله ޢަލައިހި ވަސައްލަމް ކުރައްވަން ފެއްޓެވި މަސައްކަތަށް ހުއްޓުމެއް އަޔަ ނުދެއްވައި ކުރިއަށް ގެންދެވިކަމަށާ، 23 އަހަރު ވަންދެން އެ ޒިންމާ އަދާކުރެއްވުމަށް ފަހު، އެކަލޭގެފާނު މިދުނިޔެ ދޫކުރެއްވި އިރު ދުނިޔެ އޮތީ އެހެން ދުނިޔެ އަކަށް ބަދަލު ވެފައި ކަމަށް ޚުތުބާގައި ބުންޏެވެ.

ތޭވީސް އަހަރު ކެނޑިނޭޅި ކުރެއްވި މަސައްކަތްޕުޅަށް ފަހު ސުވަރުގެ ވަޑައިގަތީ، މާތް الله އެކަލޭގެފާނުގެ ކޮނޑުފުޅުގައި އެޅުއްވި ވަރުގަދަ މަސްއޫލިއްޔަތު ފުރިހަމަ ގޮތުގައި އުފުއްލަވާފައެވެ. އެކަލޭގެފާނުގެ ރިސާލަތު ފުރިހަމައަށް އަދާކުރައްވާފައެވެ. ދުނިޔެ އެހެން ދުނިޔެއަކަށް ބަދަލުކުރައްވާ ފައެވެ.

ހުކުރު ޚުތުބާ

ޚުތުބާގައި އިތުރަށް ބުނު، އިސްލާމީ ރިސާލަތާއެކު ދުނިޔެ ދެކެން ފެށޫ މުޅިން އައު ދައުރެއް ކަމަށެވެ. އަދި އޭރު ޖަހާލަތުގެ އަނދިރިކަން ފެތުރިފައި އޮތް ދުނިޔެ، ޢިލްމުގެ ނޫރުން އަލިވެ އުޖާލާވެ، އަނިޔާއާއި ބޭއިންސާފުގެ ބަދަލުގައި އަދުލު އިންސާފު އާއްމުވެގެން ދިޔަކަމަށް ވެސް ޚުތުބާގައި ބުނެފައިވެއެވެ. ހަމަ އެހެންމެ، އެކަލޭގެފާނު ސުވަރުގެ ވަޑައިގެންނެވިއިރު، ދެކޮޅުވެރިކަމާއި ނޭއްގާނީ ކަންކަމާއި ބަދަލުގައި އެކވެރިކަމާއި، ސުލްޙަ މަސަލަސްކަން ގާއިމުވެ ތައުޙީދުގެ ބިންގަލުގެ މަތީގައި އީމާންކަމުގެ އިމާރާތްތައް އާރާސްތު ވެގެންގޮސްފައިވާ ކަމަަށް ޚުތުބާގައި ފާހަގަކޮށްފައިވެ އެވެ.

ކީރިތި ރަސޫލާ ދުނިޔެ ދޫކުރައްވައި ވަޑައިގަތީ، އަހަރެމެން އޭގައި ހިފަހައްޓައިފި ނަމަ އަހަރެމެންނަށް ދުވަހަކުވެސް މަގު ނޯޅޭނެ ދެ އެއްޗެއް އަހަރެމެންގެ ތެރެއަށް ދޫކުރައްވާ ފައެވެ. އެއީ ކިރިތި ގުރުއާނާއި އިތުރު އެކަލޭގެފާނުގެ މާތްވެގެންވާ ސުންނަތެވެ.

ޚުތުބާގައި ބުނީ އުއްމަތުގެ ބާއްޖަވެރިކަމަށްޓަކައި، ރަސޫލާ ޞައްލައްالله ޢަލައިހި ވަސައްލަމް ކުރެއްވި މިންނެތް މަސައްކަތްޕުޅަކީ، ދުލަކުން ގަލަމަކުން ބަޔާން ކުރެވޭ ވަރަށްވުރެ ގިނަ ކަންތައްތައް ކަމަށެވެ. އެކަމަށްޓަކައި ޝުކުރު އަދާކުރުމުގެ ގޮތުން އަހަރެމެންނަށް ކުރެވެން އޮތް  ކަމަކީ އެ ގެނެސްދެއްވި ހދާޔަތާއި ޝަރީއަތަށް ފުރިހަމަ ގޮތުގައި ބޯލެނބުން ކަމަށްވެސް ޚުތުބާގައި ބުނެފައިވެއެވެ.