"ފާއިތުވެދާ ކޮންމެ މިނެޓަކީ މިހާރު އަހަރެމެންގެ އެންމެ ފަހު ވަގުތުކޮޅު"

ފާއިތުވެގެންދާ ކޮންމެ މިނެޓަކީ ޣައްޒާގެ ރައްޔިތުންގެ އެންމެ ފަހު ވަގުތުކޮޅު ކަމަށާއި  އޮތް ހަމައެކަނި ގޮތަކީ "މަރު ގަބޫލުކުރުން" ކަމަށް ޣައްޒާގެމެޑިކަލް އެއިޑް ފޯ ފަލަސްތީނު (އެމްއޭޕީ) ގެ އެޑްވޮކޭޝަން އެންޑް ކޮމިއުނިކޭޝަންސް އޮފިސަރު ތަރުނީމް ހައްމާދު ވިދާޅުވެއްޖެއެވެ.

"އަޅުގަނޑަށް ހީވަނީ، އަޅުގަނޑުމެންނަށް ބާކީ އޮތީ އެއް ގޮތެއްހެން، އެއީ މަރު ޤަބޫލުކުރުން. އަޅުގަނޑުމެން އެހެން ހިސާބަކަށް ބަދަލުވިޔަސް ބަދަލުވިޔަސް އެކަން ބަދަލެއް ނުވާނެ. މިހާރު ކޮންމެ މިނެޓަކީ އަހަރެމެންގެ އެންމެ ފަހު މިނެޓް"

ހައްމާދު ވިދާޅުވި އެވެ.

ހައްމާދުގެ ގޭގައި އާއިލާގެ 45 މީހަކު ހިޔާވަހިކަން ހޯދަމުންދާއިރު، އޭގެ ތެރޭގައި 15 ކުޑަކުދިން ހިމެނޭކަމަށް ސީއެންއެން އިން ވަނީ ރިޕޯޓްކޮށްފައެވެ.  ހައްމާދުގެ ގެ ހުންނަނީ ޣައްޒާގެ ދެކުނާއި ވަކިކުރާ ހިސާބުގައެވެ، އައި އިސްރާއީލުގެ ޓެންކްތަކާ ދެތިން މޭލު ދުރެވެ. ޣައްޒާގެ މައި އުތުރުން ދެކުނަށް ދާ މަގާއި ކަނޑުގެ އައްސޭރިފަށުން ވެސް ބޮމާއި ޓެންކް ބޮން ގޮއްވާ އަޑު ކެނޑިނޭޅި އިވޭކަމަށް ހައްމާދު ވިދާޅުވި އެވެ.

"އެއްވެސް އެހީއެއް ނުވަތަ ކާނާއެއް ނުދެވޭ، ތަކެތީގެ އަގުތައް އުޑުމައްޗަށް އަރަމުންދެޔޭ ބުނުމަކީ ވެސް އަންޑަސްޓޭޓްމަންޓް އެއް. ކުރިން ލޮނު ކިލޯއެއްގެ އަގަކީ 0.25 ޑޮލަރު. މިހާރު އެއީ 4.25 ޑޮލަރެވެ. ފުށް ކިލޯއެއްގ އަގަކީ މިހާރު 60 ޑޮލަރު. ކުރިން 7 ޑޮލަރު.”

ހައްމާދު ވިދާޅުވިއެވެ.

އަންގާރަ ދުވަހު ނޯވޭގެ ރެފިއުޖީ ކައުންސިލްގެ ސެކްރެޓަރީ ޖެނެރަލް ޖޭން އެގޭލެންޑް ވިދާޅުވީ ޣައްޒާގައި އެހީގެ ހުރިހާ އޮޕަރޭޝަންތަކެއް ގާތްގަނޑަކަށް ހުއްޓާލަން އެ ޖަމިއްޔާއަށް މަޖުބޫރުވެފައި ވަނީ ބޮން ގޮއްވުމާއި ހަލަބޮލިކަމާއި ބިރުވެރިކަމުގެ ސަބަބުން ކަމަށެވެ.

ހަނގުރާމައިގެ ތެރޭގައި ޣައްޒާގައި މިހާތަނަށް ގާތްގަނޑަކަށް 16،000 މީހުން ޝަހީދުވެފައިވާ ކަމަށް ޣައްޒާގެ ހެލްތު މިނިސްޓްރީން ބުނެ އެވެ.