މެސީގެ ދެލަނޑާއެކު ނިއުޔޯކް ރެޑް ބުލްސް އަތުން އިންޓަ މިއާމީއަށް ފަސޭހަ މޮޅެއް

އެމެރިކާގެ މޭޖަރ ލީގް ސޮކަރގައި ރޭ ފަތިހު ރަށުން ބޭރިގައި ކުޅުނު މެޗުގައި ނިއުޔޯކް ރެޑް ބުލްސް އިން ލަނޑެއް ކާމިޔާބުކޮށް ލީޑު ހޯދާފައިވަނިކޮށް ފަހަތުން އަރައި 5-1 ގެ ނަތީޖާއަކުން އިންޓަ މިއާމީ މޮޅުވެއްޖެއެވެ.

ލީގުގައި އިންޓަ މިއާމީ އެންމެ ފަހުން ކުޅުނު މެޗުގައި 3-0 ގެ ނަތީޖާއަކުން ސިންސިނާޓީ އަތުން ބަލިވެފައިވާއިރު، ނިއުޔޯކް ރެޑް ބުލްސް އެންމެ ފަހުން ކުޅުނު މެޗުގައި އެޓީމުން ވަނީ 5-3 ގެ ނަތީޖާއަކުން ނިއު އިންގްލެންޑް ރިވޮލިއުޝަން ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ނިއުޔޯކް ރެޑް ބުލްސް އިންނެވެ. މިލަނޑު ފުރަތަަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު އެލެގްޒެންޑަރ ހެކް އެވެ.

ނަމަވެސް އޭގެ 10 މިނެޓް ފަހުން އިންޓަ މިއާމީގެ ޑިފެންޑަރު ޖޯޑީ އަލަބާ ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީ އެއްވަރުކޮށްދީފައެވެ. މިއީ އެޓީމުގެ ކެޕްޓަން ލިއޮނަލް މެސީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އިންޓަ މިއާމީ އިން މެޗުގެ ލީޑުހޯދި ލަނޑު އޭގެ ތިން މިނެޓްފަހުން ކާމިޔާބުކޮށްދިނީ ޒުވާން މިޑްފީލްޑަރު ޓެލާސްކޯ ސެގޯވިއާ އެވެ. އަދި ފުރަތަމަ ހާފުގެ އިތުރު ވަގުތުގެ ތެރޭގައި ސެގޯވިއާ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މެޗުގެ ދެވަނަ ހާފުގައި އިންޓަ މިއާމީ އިން އިތުރު ދެލަނޑު ކާމިޔާބުކުރިއިރު، މި ދެލަނޑުވެސް އެޓީމަށް ކާމިޔާބުކޮށްދިނީ ކެޕްޓަން ލިއޮނަލް މެސީ އެވެ. މިއާއެކު މެޗުގެ ކުޅުން ނިމިގެންދިޔައީ 5-1 ގެ ތަފާތުބޮޑު ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މިނަތީޖާއެކު ލީގުގައި ކުޅުން 21 މެޗުން އިންޓަ މިއާމީއަށް 41 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ ފަސްވަނައިގައެވެ. އަދި މިމެޗުން ބަލިވި ނިއުޔޯކް ރެޑް ބުލްސް ލީގުގައި ކުޅުނު 24 މެޗުން އެޓީމަށް 33 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލުގެ ނުވަވަނައިގައެވެ.