ބެލެންޑޯ އެވޯޑަށް ވާދަކުރާ 30 ކުޅުންތެރިންގެ ލިސްޓުގައި ސިޓީގެ 7 ކުޅުންތެރިއަކު

މިއަހަރުގެ ބެލެންޑޯ އެވޯޑަށް ވާދަކުރާ 30 ކުޅުންތެރިންގެ ލިސްޓް މިރޭ އިއުލާން ކޮށްފިއެވެ.

މިލިސްޓުގައި އެންމެ ގިނައިން ހިމެނެނީ ޕްރެމިއާ ލީގާއި، އެފްއޭ ކަޕްގެ އިތުރުން މިދިޔަ ސީޒަނުގެ ޔުއެފާ ޗެމްޕިއަންސްލީގުގެ ޗެންޕިއަން މެންޗެސްޓާ ސިޓީގެ ކުޅުންތެރިންނެވެ. އެގޮތުން ސިޓީގެ 7 ކުޅުންތެރިއަކު މިލިސްޓުގައި ހިމެނޭ އިރު، ދެވަނައަށް އެންމެ ގިނައީ ރެއާލް މެޑްރިޑް އަދިި ބަޔާން މިއުނިކްގެ ކުޅުންތެރިންނެވެ. މިއިން ކޮންމެ ޓީމެއްގެ ތިން ކުޅުންތެރިން މިލިސްޓުގައި ހިމެނޭ އިރު، ޕްރެމިއާ ލީގަށް ނިސްބަތްވާ 12 ކުޅުންތެރިއަކު މިފަހަރުގެ ލިސްޓުން ޖާގަ ހޯދާފައިވެއެވެ.

މީގެއިތުރުން މިއީ 20 އަހަރުގެ ތެރޭގައި ބެލެންޑޯ އެވޯޑަށް ވާދަކުރާ 30 ކުޅުންތެރިންގެ ލިސްޓުން ކްރިސްޓިއާނޯ ރޮނާލްޑޯއަށް ޖާގަ ނުލިބުނު ފުރަތަމަ ފަހަރެވެ. ރޮނާލްޑޯގެ އިތުރުން މިފަހަރުގެ ލިސްޓުން ބަކީވި އެންމެ ފާހަގަކޮށްލެވޭ ކުޅުންތެރިއަކީ މިދިޔަ ސީޒަނުގައި މެންޗެސްޓާ ޔުނައިޓެޑުގައި މޮޅު ކުޅުމެއް ދެއްކި އިގިރޭސި ފޯވާޑް މާކަސް ރަޝްފޯޑް އެވެ.

ރަޝްފޯޑް ވަނީ މިދިޔަ ސީޒަނުގައި ކުޅުނު 56 މެޗުގައި 30 ލަނޑު ކާމިޔާބުކުރުމުގެ އިތުރުން އިތުރު 11 ލަނޑު ޖެހުމަށް އެހީތެރިވެދީފައެވެ. އަދި މީގެއިތުރުން ރަޝްފޯޑް ވަނީ މިދިޔަ ސީޒަނުގައި މެންޗެސްޓާ ޔުނައިޓެޑާއެކު އިގިރޭސި ލީގުކަޕް ކާމިޔާބުކޮށް، އެފްއޭ ކަޕާއި ޔުއެފާ ޔޫރޮޕާ ލީގުގެ ފައިނަލުގައި ކުޅުމުގެ އިތުރުން ޕްރެމިއާ ލީގުގެ ތިންވަނަ ޔުނައިޓެޑަށް ހޯދައި ދިނުމުގައި މުހިންމު ދައުރެއް އަދާކޮށްދީފައެވެ.

މީގެއިތުރުން މިފަހަރުގެ ލިސްޓުން އެންމެ ފާހަގަކޮށްލެވެނީ ސައުދީ ޕްރޮފެޝަނަލް ލީގުގެ އިތުރުން އެމެރިކާގެ މޭޖާ ލީގު ސޮކާގައި ކުޅޭ ކުޅުންތެރިއަކު ފުރަތަމަ ފަހަރަށް ބެލެންޑޯ އެވޯޑަށް ވާދަކުރާ 30 ކުޅުންތެރިންގެ ލިސްޓް ހިމެނުމެވެ.