ކޯޗާ މައްސަލަ ޖެހި، ރޮނާލްޑޯ ޕޯޗުގަލް ޓީމު ދޫކޮށް ހިނގައްޖެ

ޔުއެފާ ނޭޝަންސް ލީގުގައި ޑެންމާކާ ދެކޮޅަށް ކުޅެން އޮތް މެޗުގެ ކުރިން، ޕޯޗުގަލްގެ ކޯޗު ޖޯޖް ޖީސަސްއާ ދެމެދު އުފެދުނު މައްސަލަތަކަކާ ގުޅިގެން ކެޕްޓަން ކްރިސްޓިއާނޯ ރޮނާލްޑޯ ޓީމުގެ ކޭމްޕް ދޫކޮށް ހިނގައްޖެއެވެ.

މިކަން ކަށަވަރުކޮށްދެމުން އުމުރުން 41 އަހަރުގެ ރޮނާލްޑޯ އިންސްޓަގްރާމްގައި ބުނީ، ގައުމީ ޓީމުގެ ކޯޗުގެ ނޫސްވެރިންގެ ބައްދަލުވުމަށްފަހު، ޕޯޗުގަލްގެ ފުޓްބޯޅަ ފެޑެރޭޝަންގެ ރައީސް ޕެޑްރޯ ޕްރޮއެންސާއާ ވާހަކަދެއްކުމަށްފަހު ކޭމްޕް ދޫކޮށްދާން ނިންމާފައިވާ ކަމަށެވެ. އަދި ޓީމު ދޫކޮށް ދާންޖެހުނު އަސްލު ސަބަބު ކުރިއަށް އޮތް ތަނުގައި ސަޕޯޓަރުންނަށް ހާމަކުރާނެ ކަމަށްވެސް އޭނާ ބުންޏެވެ.

ރިޕޯޓްތައް ބުނާ ގޮތުގައި މައްސަލަ ގޯސްވީ މިދިޔަ އާދީއްތަ ދުވަހު ނޯވޭއާ ދެކޮޅަށް ކުޅުނު މެޗުގައި ބެންޗުން ކުޅެން އަރުވާނެ ކަމަށް ބުނެ، ކޯޗު ޖީސަސް އޭނާ ކުޅެން ނާރުވައި ބެހެއްޓުމުންނެވެ. އެ މެޗަށްފަހު އަނިޔާއެއް ނެތް ނަމަވެސް ހޯމަ އަދި އަންގާރަ ދުވަހު އޭނާ ޓީމުގެ ފަރިތަކުރުންތަކުގައި ބައިވެރިނުވެ ވަކިން ޖިމްގައި ވަގުތު ހޭދަކުރިއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި ކޯޗު ޖީސަސް ވަނީ ރޮނާލްޑޯ ފަރިތަކުރުންތަކުގައި ބައިވެރިވާން ދެކޮޅު ހެދިކަމަށް ދެކެވޭ ވާހަކަތައް ދޮގުކޮށްފައެވެ. އަދި އޭނާ މިއަދުގެ ފަރިތަކުރުންތަކުގައި ބައިވެރިވާނެ ކަމަށް ކޯޗު ބުނި ނަމަވެސް، ޕޯޗުގަލް ފެޑެރޭޝަނުން ވަނީ އެ ފަރިތަކުރުންތަކުގައި ރޮނާލްޑޯ ބައިވެރިނުވާކަން ކަށަވަރުކޮށްދީފައެވެ.

ޕޯޗުގަލްގެ ނޫހެއް ކަމަށްވާ "އަ ބޯލާ" އިން އާންމުކުރި ވީޑިއޯއަކުން ފެންނަ ގޮތުގައި، ކޯޗުގެ ނޫސްވެރިންގެ ބައްދަލުވުމަށްފަހު ކޯޕަންހޭގަންގެ ޕާކެން ސްޓޭޑިއަމުން ރޮނާލްޑޯ ވަނީ ފެޑެރޭޝަންގެ ކާރެއްގައި އެތަން ދޫކޮށް ގޮސްފައެވެ. އަދި ސްޕެއިންގެ މާކާ ނޫހުން ރިޕޯޓްކޮށްފައިވާ ގޮތުގައި އޭނާ ދަތުރުކުރަނީ ޕްރައިވެޓް ޖެޓެއްގައި މެޑްރިޑަށެވެ. ޓީމު ހޮޓަލަށް އެނބުރި ދިޔައިރު ޓީމާއެކު ރޮނާލްޑޯ އަދި ކޯޗު ޖީސަސްވެސް ނެތް ކަމަށް ޚަބަރުތައް ބުނެއެވެ.

މި މައްސަލަ ހައްލުކުރުމަށްޓަކައި ޕޯޗުގަލްގެ ފުޓްބޯޅަ ފެޑެރޭޝަންގެ ރައީސް ޕްރޮއެންސާ ވަނީ އަންގާރަ ދުވަހު ކުއްލި ގޮތަކަށް ޑެންމާކަށް ވަޑައިގެންފައެވެ.

ގައުމީ ޓީމަށް ކުޅެދިން 234 މެޗުން 146 ގޯލު ޖަހައި، ޕޯޗުގަލްގެ ތާރީޚުގައިވެސް އެންމެ ގިނަ މެޗު ކުޅެ އަދި އެންމެ ގިނަ ގޯލު ޖެހި ކުޅުންތެރިޔާގެ ޝަރަފު އޮތް ރޮނާލްޑޯ، މިދިޔަ ހަފްތާގައި ބުނެފައިވަނީ ކޯޗު އޭނާ ބޭނުން ނުވާނަމަ ކޮންމެ ވަގުތަކުވެސް ޓީމު ދޫކޮށްލަން ތައްޔާރަށް ހުރި ކަމަށެވެ.