އާރަށުގައި ބައްދަލުކޮށް ފައްޔާޒު ޗެއާޕާސަންކަމުން ވަކިކުރުމަށް ދަނީ މަޝްވަރާކުރަމުން: އާޒިމް
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންކަމުގެ މަޤާމުން އިކޮނޮމިކް މިނިސްޓަރު ފައްޔާޒު އިސްމާއިލް ވަކިކުރުމަށް އާރަށުގައި މަޝްވަރާކުރަމުންދާކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.
މިއަދު ހަވީރު 5:33 ގައި އާޒިމް ކުރެއްވި ޓްވީޓެއްގައި ވިދާޅުވީ އެމްޑީޕީގެ ޕާލަމެންޓްރީ ގުރޫޕުގެ މެމްބަރުންތަކެއް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އަރިހަށް އާރަށަށް ވަޑައިގެން އެމްޑީޕީގެ ޗެއާ ޕާސަންކަމުން ފައްޔާޒު ވަކިކުރުމަށް މަޝްވަރާކުރަމުންދާ ކަމަށެވެ.
އެ މަޝްވަރާ ބައްދަލުވުމުގައި އެމްޑީޕީގެ ޕާލަމެންޓްރީ ގުރޫޕުގެ 37 މެމްބަރުން ބައިވެރިވެވަޑައިގަންނަވާ ކަމަށް އާޒިމް ވިދާޅުވި އެވެ.
"މިވަގުތު: އެމްޑީޕީގެ މަޖިލިސް މެމްބަރުން އާރަށުގައި ރައީސުލްޖުމްހޫރިއްޔާ ޞާލިހަށް ދަންނަވަމުން އެބަގެންދޭ އެމްޑީޕީގެ ޗެއާޕާސަން ފައްޔާޒު މަގާމުން ދުރުކޮށް ދިނުމަށް. މި ބައްދަލުވުމަށް ގޮސްތިބީ 37 މެމްބަރުން"
އަލީ އާޒިމް
ރިޔާސީ އިންތިޚާބުގައި ފައްޔާޒު ޖެއްސެވި ބައެއް ހިސާބުތައް ދިމާނުވުމާއި ގުޅިގެން ގިނަ ފާޑުކިޔުންތަކެއް ވަނީ އަމާޒުވެގެން ގޮސްފައެވެ. އެގޮތުން ރިޔާސީ އިންތިޚާބު އެއްބުރުން ރައީސް ޞާލިހަށް ކާމިޔާބު ކުރެވިދާނެކަމަށް ކަށަވަރުކަމާއެކު ފައްޔާޒު އޭރު ވިދާޅުވަމުން ގެންދެވި ނަމަވެސް، އެއީ އޯވާ ކޮންފިޑެންސް ވުން ކަމަށް އެ ޕާޓީން ވަނީ ފަހުން ބުނެފައެވެ.
އޭގެ އިތުރުން ރިޔާސީ އިންތިޚާބުގައި ބޮޑެތި ގޯސްތަކެއް ހެދިފައިވާކަމަށް ވެސް އެމްޑީޕީން ބުނެފއިވެއެވެ.
ރިޔާސީ އިންތިޚާބަށްފަހު އެމްޑީޕީން އެންމެ ފުރަތަމަ ބޭއްވި ގައުމީ މަޖިލީހުގައި މަޝްވަރާ ކުރެވުނު ކަންތައްތަކަށް ވެސް ބައެއް ފަރާތްތަކުން ފާޑުކިޔުންތައް އަމާޒުކޮށްފައި ވެއެވެ. އަދި އެމްޑީޕީ ދެން ކުރިއަށް ގެންދެވޭނީ ޕާޓީގެ ލީޑަޝިޕަށް ބޮޑެތި ބަދަލުތަކެއް އައިސްގެންކަމަށް ވެސް އެ ޕާޓީގެ ކަންކަން ގާތުން ބަލަމުންދާ ބައެއް ފަރާތްތަކާއި، ސިޔާސީ ޕާޓީތަކުން ވެސް ދަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
