ހީވަނީ އަމީނީ މަގު ނިމުމުގެ ކުރިން މި ސަރުކާރު ނިމޭނެހެން: ޑރ މުއިއްޒު

މާލެ ސިޓީ ކައުންސިލްގެ އަތުން އަތުލުމަށްފަހު ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އާއި ހަވާލުކޮށްގެން ކުރިއަށް ގެންދާ މާލޭގެ އަމީނީ މަގު ޒަމާނީ ފެންވަރަކަށް ތަރައްގީކުރުމުގެ މަޝްރޫއު ނިމުމުގެ ކުރިން މި ސަރުކާރު ނިމިދާނެކަމަށް ހީފުޅުވާކަމަށް މާލެ ސިޓީގެ މޭޔަރު ޑރ މުޙައްމަދު މުޢިއްޒު ވިދާޅުވެއްޖެ އެވެ.

ޑރ މުޢިއްޒު މިފަދައިން ވިދާޅުވެފައި ވަނީ އަމީނީ މަގުގެ މަސައްކަތް ނުނިމި ދިގުލައިގެން ދިއުމާއި ގުޅިގެން ރައްޔިތުންނަށް ކުރިމަތިވަމުންދާ އުނދަގޫތަކުގެ ވާހަކަތައް ހިއްސާކުރައްވާ ސަންގުގެ ޚަބަރަށް ފަހު ޕްރޮގްރާމުގައި ވާހަކަ ދައްކަވަމުން ނެވެ.

ޑރ މުއިއްޒު ވިދާޅުވީ މާލެ ސިޓީ ކައުންސިލުން 39 މިލިއަން ރުފިޔާއަށް ތަރައްގީކުރަން އޮތް މަގެއް ޕްލޭނިން މިނިސްޓްރީ މެދުވެރިކޮށް އާރުޑީސީއާއި ހަވާލުކުރީ އެ އަގަށްވުރެ ތިން ގުނަ އަގުބޮޑުކޮށް ކަމަށެވެ.

އެގޮތުން މިހާރު އެ މަސައްކަތް ކުރަމުންދަނީ 84 މިލިއަން ރުފިޔާއަށް ކަމަށާއި، އެ އަގުގައި އެ މަސައްކަތް އާރުޑީސީއާއި ހަވާލުކުރީ ކުރު މުއްދަތެއްގެ ތެރޭގައި ނިންމާނެކަމަށް ބުނަމުން ކަމަށެވެ.

"84 މިލިއަން ރުފިޔާ ޚަރަދުކުރޭ ނޫން ތޯ މި މަޝްރޫއަށް (އަމީނީ މަގަށް). 39 މިލިއަނަށް ވާން އޮތް ކަމެއް. ސްކޯޕަކަށް، މި ދެންނެވީ މަޝްރޫއުގައި ކުރަން ހުރި ކަމަކަށް އިތުރެއް ނުވެއޭ. ހަމަ އަޅަންހުރި ހޮޅައަކަށް ހޮޅިއެއް އަދިވެސް އެ އަޅަނީ. އަޅުގަނޑުމެންނާއި އާރުޑީސީއާއި އެއްބަސްވި ސްކޯޕް އެ އޮތީ. އެންމެ ހޮޅިއެއް އިތުރެއްވެސް ނުވޭ، ތާރުގެ ބޯމިން އިތުރެއް ނުވޭ، ނޫނިއްޔާ އޭގެ ދަށަށްދާ ފަށަލަތައް އިތުރެއް ނުވޭ، އެއްވެސް ކަމެއް އިތުރެއް ނުވޭ، ހަމަ އޮތް ގޮތަށް 39 މިލިއަނުން 84 އަކަށް ބޮޑުވީ"

މާލެ ސިޓީގެ މޭޔަރު ޑރ މުޙައްމަދު މުޢިއްޒު

ޑރ މުއިއްޒު ވިދާޅުވީ އަވަސް މުއްދަތެއްގެ ތެރޭގައި މަސައްކަތް ނިންމަން އަގުބޮޑުކޮށް ކޮންޓްރެކްޓު ކުރި ނަމަވެސް އެ މަސައްކަތް ދިގުލައިގެންދާތީ ރައްޔިތުންގެ ގިނަ ޝަކުވާތަކެއް މާލެ ސިޓީ ކައުންސިލާއި ހިއްސާ ކުރަމުންދާ ކަމަށެވެ.

އެގޮތުން މަގު ބަންދުކޮށްފައި ހުރުމުގެ ސަބަބުން އެ ސަރަހައްދުގައި ދިރިއުޅޭ ފަރާތްތަކާއި ވިޔަފާރިތަކަށް އެކިވަރުގެ ދަތިތަކާއި ކުރިމަތިވާތީ ރަސްމީ ސިފައިގައިވެސް އަދި ފޯނުން ގުޅައިގެންވެސް ޝަކުވާތައް ހުށައަޅަމުންދާކަން މޭޔަރު ފާހަގަކުރެއްވި އެވެ.

އޭގެ އިތުރުން އަމީނީ މަގުގައި މަސައްކަތް ކުރަމުންދާ ގޮތުން ނަފްސާނީ ގޮތުންވެސް މީހުންނަށް އަސަރުކުރަމުންދާތީ އެކަމުގެ ކަންބޮޑުވުންތައްވެސް ހިއްސާކުރަމުންދާކަމަށް މޭޔަރު ވިދާޅުވި އެވެ.

މޭޔަރު މުއިއްޒު ވިދާޅުވީ ރައްޔިތުންގެ ފަރާތުން ހުށައަޅާ ޝަކުވާތަކަށް ޙައްލު ހޯއްދަވާދެއްވުމަށް އެކަން ޕްލޭނިން މިނިސްޓްރީއާއި އާރުޑީސީގެ ސަމާލުކަމަށް ވެސް ގެނެސްފައިވާނެ ކަމަށެވެ.

އެހެން ނަމަވެސް، މިހާރަށް ކަނޑައަޅާފައިވާ މުއްދަތަކަށްވެސް އެ މަސައްކަތް ނިންމާލެވޭނެކަމަށް ޤަބޫލު ނުކުރައްވާކަމަށާއި، މިހާރު މަންޒަރު ފެންނަގޮތަށް ބަލާއިރު އަމީނީ މަގުގެ މަސައްކަތް ނިމުމުގެ ކުރިން މި ސަރުކާރު ނިމޭނެކަމަށް ޤަބޫލުފުޅު ކުރައްވާކަމަށް މޭޔަރު މުއިއްޒު ވިދާޅުވި އެވެ.

"އާރުޑީސީއަށްވެސް ޕްލޭނިން މިނިސްޓްރީއަށް ވެސް އަޅުގަނޑުމެންގެ ފަރާތުން އެބަ އަންގަން ރައްޔިތުންގެ ފަރާތުން އަންނަ ޝަކުވާތައް. އެކަމަކު އެއްވެސް ކުރިއެރުމެއް ނާދޭ. ދެން މަޖިލީހުގައި މިނިސްޓަރު މި ވިދާޅުވަނީ ސެޕްޓެމްބަރަށް ނިމޭނެއޭ. ދެން މިހާރު އެ ވިދާޅުވަނީ ނޮވެމްބަރަށް ނިމޭނެއޭ. އަޅުގަނޑަށް ހީވަނީ އެއަށްވުރެ ކުރިން ސަރުކާރު ކަންނޭގެ ނިމޭނީ"

މާލެ ސިޓީގެ މޭޔަރު ޑރ މުޙައްމަދު މުޢިއްޒު

އަމީނީ މަގުގެ މަސައްކަތް ޕްލޭނިން މިނިސްޓްރީ މެދުވެރިކޮށް އާރުޑީސީ އާއި ހަވާލުކޮށްފައި ވަނީ 7 މަސް ދުވަހުން މަސައްކަތް ނިންމުމަށެވެ. އެ މަސައްކަތް ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވީ މާލެ ސިޓީގެ މޭޔަރު ޑރ މުޙައްމަދު މުޢިއްޒަށް 7 އަހަރު ދުވަސްތެރޭ ނުނިންމުނު އަމީނީ މަގު 7 މަސްތެރޭ ނިންމާނެކަމަށެވެ.

އެހެން ނަމަވެސް އެ ވިދާޅުވި މުއްދަތުގައި އެ މަސައްކަތް ނުނިމޭނެތީ ޕްލޭނިން މިނިސްޓްރީން ވަނީ މިހާރު އެ މަސައްކަތް ނިންމަންޖެހޭ މުއްދަތު އިތުރުކޮށްދީފަ އެވެ.