ކަނޑުގެ ސަރަހައްދު ވިއްކާލި މައްސަލައިގައި ޕީޕީއެމުން ރައީސް ނަޝީދާއި މަޝްވަރާކޮށްފި!

ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހުގެ ސަރުކާރުގެ އިހުމާލުން ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔަކަމަށް ބުނާ މައްސަލައާއި ގުޅިގެން ޕްރޮގްރެސިވް ކޮންގްރެސް ކޯލިޝަނުން އެމްޑީޕީގެ ރައީސް މުޙައްމަދު ނަޝީދާއި، އެމަނިކުފާނު އުފައްދަވާފައިވާ ފިކުރެއްގެ ދިރުން ގޮތްޕާއެކު މަޝްވަރާ ބައްދަލުވުމެއް ކުރިއަށް ގެންގޮސްފި އެވެ.

އެ ފަދަ ބައްދަލުވުމެއް ކުރިއަށް ގެންގޮސްފައިވާކަން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވަނީ ހާމަކުރައްވާފަ އެވެ. އަދި އެ ބައްދަލުވުމަށްފަހު ނަންގަވާފައިވާ ފޮޓޯއެއް ވެސް އަބްދުއްރަހީމް ވަނީ ޓްވީޓާގައި ހިއްސާކުރައްވާފަ އެވެ.

އަބްދުއްރަހީމް ހިއްސާކުރެއްވި އެ ފޮޓޯގައި އޭނާގެ އިތުރުން ޕީޕީއެމްގެ ނައިބުރައީސް އަހުމަދު ޝިޔާމާއި، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ހުންނެވިތަން ފެނިގެން ދެއެވެ. އަދި ނަޝީދުގެ އަރިހުގައި އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމުރު ވަނީ ބައްދަލުވުމުގައި ބައިވެރިވެވަޑައިގެންފަ އެވެ.

ދިވެހިރާއްޖޭގެ ދެކުނުގެ ކަނޑުގެ ސަރަހައްދު ކަނޑައެޅުމާއި ގުޅޭގޮތުން އިޓްލޮސްއަށް ހުށައެޅުނު މައްސަލައިގައި ދިވެހި ސަރުކާރުން ވަކާލާތުކޮށްފައިވާ ރައްޔިތުންގެ މަސްލަހަތު އިސްކޮށްގެން ނޫންކަން ފާހަގަކޮށް ކުރީގެ ބަންޑާރަ ނައިބުންނާއި، ކުރީގެ ބައެއް ވަޒީރުން އަދި ބައެއް ސިޔާސީ ޕާޓީތަކުން ވަނީ ކަންބޮޑުވުން ފާޅުކޮށްފަ އެވެ.

އަދި އެ މައްސަލައިގައި ދެން އިތުރަށް ކުރެވެން ހުރި ކަންކަން ބަލާ ރައްޔިތުންގެ ހައްގުގައި ސަރަހައްދު ހިމާޔަތް ކުރުމަށް ކުރެވެން ހުރި ކަންކަން ގުޅިގެން ކުރިއަށް ގެންދިއުމަށް ބައެއް ޕާޓީތަކުން ވަނީ ނިންމަވާފައެވެ.

އެގޮތުން ސިޔާސީ ގޮތުން ޚިޔާލުފަތާތުވުންތައް ހުރި ނަމަވެސް އެކަންކަން އެއް ފަރާތްކޮށް ކަނޑުގެ ސަރަހައްދު ގެއްލިގެން ދިޔަ މި މައްސަލައިގައި ގުޅިގެން މަސައްކަތް ކުރުމަށް ޕީޕީއެމްއާއި، ޖޭޕީއާއި، އެމްއާރުއެމް އަދި އެމްޑިޕީގެ ފިކުރެއްގެ ދިރުން ގޮފިން ވަނީ ނިންމާފަ އެވެ.

މި މައްސަލައިގައި ގުޅިގެން މަސައްކަތް ކުރުމަށް އިދިކޮޅު ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު އިރުޝާދުދެއްވާފައިވާކަމަށް ޕީޕީއެމުން ވަނީ ހާމަކޮށްފަ އެވެ.

އެހެންކަމުން އިދިކޮޅުން ނަޝީދާއި ބައްދަލުކޮށް މި މައްސަލައިގައި ކުރިއަށްދާނެ ގޮތަކާއި ގުޅިގެން މަޝްވަރާކޮށްފައިވަނީ އެ އިރުޝާދުގެ ދަށުންކަމަށް ބެލެވެއެވެ.

ޕީޕީއެމުން ވަނީ މީގެކުރިންވެސް ސިޔާސީ ޕާޓީތަކާއެކު މި މައްސަލައިގައި ކުރިއަށްދާނެ ގޮތަކާއި ގުޅޭގޮތުން މަޝްވަރާ ބައްދަލުވުމެއް ބާއްވާފަ އެވެ.

މި ބައްދަލުވުންތަކުގައި ސިޔާސީ ޕާޓީތަކުން ނިންމަވާފައިވާ ކަންކަން ހާމަކުރައްވާފައި ނުވި ނަމަވެސް، ރައްޔިތުންގެ ފަރާތުން މި މައްސަލަ އިސްތިއުނާފު ކުރެވޭނެ ގޮތެއް އޮތް ތޯ ބަލައި، އެކަން ކުރައްވާނެކަމުގެ ޔަގީންކަން ޕީޕީއެމުން ވަނީ ދީފައެވެ. އަދި އިޓްލޮސްގެ މި ނިންމުން ބޮލާލާ ޖައްސަވާނެކަމަށް ރައީސް ޔާމިންވެސް ވިދާޅުވެފައިވާ ކަމަށް އިދިކޮޅުން ބުނެއެވެ.