40 އަހަރަށްވުރެ ގިނަ ދުވަހު ޚާރިޖީ ވުޒާރާގައި މަސައްކަތް ކުރެއްވި އާބިދާ ނިޔާވެއްޖެ

ރާއްޖޭގެ ހާރިޖީ ވުޒާރާގައި 40 އަހަރަށް ވުރެ ގިނަ ދުވަހު މަސައްކަތް ކުރެއްވި އާބިދާ އަހްމަދު ނިޔާވެއްޖެއެވެ.

އާބިދާ ނިޔާވީ ރޭ ދަންވަރުގެ ވަގުތެއްގައެވެ. ނިޔާވިއިރު އުމުރަކީ 66 އަހަރެވެ.

އާބިދާ ނިޔާވުމާއި ގުޅިގެން ޚާރިޖީ ވަޒީރު އަބްދުالله ޝާހިދު ކުރެއްވި ޓުވީޓެއްގައި ވިދާޅުވީ، އާބިދާ އަކީ ޚާރިޖީ ޓީމުގެ އެއް ތަނބު ކަމަށެވެ.

"ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު މިނިސްޓްރީއަށް ޚިދުމަތްކުރައްވާފައިވޭ. އާބިއަކީ އެންމެންގެ އެކުވެރިއެއް." ޝާހިދު ވިދާޅުވި އެވެ.

ޝާހިދު ވިދާޅުވީ، އާބިގެ ހަނދާން އެ މިނިސްޓްރީގެ މުވައްޒަފުންގެ ހިތްތަކުން ދުވަހަކުވެސް ފިލައިގެންނުދާނެ ކަމަށާ އޭނާ ނެތްކަމުގެ އިހުސާސް އަބަދުވެސް ވާނެ ކަމަށެވެ. 
މިއާއެކު ޝާހިދު ވަނީ އާބިދާގެ ފާފަފުއްސަވައި ސުވަރުގޭގެ ދާއިމީ ނިޢުމަތް މިންވަރުކުރެއްވުމަށާ، އާއިލާއަށާއި ގާތްތިމާގެ އެންމެނަށް މި ހިތްދަތި ދަނޑިވަޅުގައި ކެތްތެރިކަން ދެއްވުމަށް އެދި ދުޢާ ކުރައްވާފައެވެ.

އާބިދާގެ ކަށުނަމާދު އޮތީ މިއަދު އަސްރު ނަމާދަށް ފަހު އާސަހަރާ މިސްކިތުގައެވެ.