ޑިމޮކްރެޓްސް ގެ މެންބަރެއް، ގޭގައި ހުރެ، ރައީސް ޞާލިހާއި ދެކޮޅަށް ޝުއޫރު ފާޅުކުރަމުންދަނިކޮށް ހައްޔަރުކޮށްފި!

ދ. ކުޑަހުވަދޫ އަށް ރައީސް އިބްރާހިމް މުޙައްމަދު ޞާލިޙް އިއްޔެ ކުރެއްވި ދަތުރުފުޅާ ގުޅުވައި ދަ ޑިމޮކްރެޓްސްގެ އިންޓެރިމް ކައުންސިލްގެ މެންބަރު އަދި ކުޑަހުވަދޫ ކައުންސިލްގެ މެންބަރު އަޙްމަދު މަޢުރޫފްގެ އަމިއްލަ ގޭގައި ޝުޢޫރު ފާޅުކުރައްވަމުން ދަނިކޮށް ހައްޔަރުކޮށްފިއެވެ.

އަހުމަދު މައުރޫފް, އަމިއްލަ ގޭގެ ޓެރެސްގައި, މައިކް އަކާއި ތާޅަފިއްޔެއް ބޭނުން ކޮށްގެން ޝުޢޫރު ފާޅުކުރައްވަމުން ދަނިކޮށް ހައްޔަރުކުރި ކުރުން ކުށްވެރި ކޮށް ދަ ޑިމޮކްރެޓްސްއިން ނެރުނު ބަޔާނެއްގައި ބުނީ، ރައީސް ޞާލިޙް ވެރިކަމަށް ވަޑައިގަތީ ހިޔާލު ފާޅުކުރުމުގެ މިނިވަންކަމާއި، އެއްވެ އުޅުމުގެ މިނިވަންކަން ހިމާޔަތްކުރުމަށް ވައުދުވަމުން ކަމަށެވެ.

ނަމަވެސް ދެވަނަ ދައުރެއް ހޯއްދެވުމަށްކަމަށް ވިދާޅުވެ ދިވެހިރާއްޖޭގެ އެކި ކަންކޮޅުތަކަށް ކުރައްވަމުންގެންދަވާ ކެމްޕެއިން ދަތުރުފުޅުތަކުގައި ކޮންމެ ރަށަކުންހެން ރައްޔިތުން ނުކުމެ، އިހުތިޖާޖުކޮށް، މިވެރިކަމާމެދު ނުރުހުން ފާޅުކުރަމުންދާ ދިއުން ސަލާމަތީ ބާރުތައް ނަހަމަގޮތުގައި ބޭނުންކުރައްވައިގެން ހުއްޓުވަމުން ގެންދަވާ ކަމަށް އެ ޕާޓީން ބުނެފައިވެއެވެ.

މިއާއެކު އެޕާޓީން ބުނީ، އެންމެ ފަހުން ފުވައްމުލަކު ސިޓީއަށްވެސް ރައީސް ޞާލިޙް އަރައިވަޑައިގަތީ، ރަޔަޓުގިޔަރުގައި ތިބި ފުލުހުންނާއި، ސިފައިން ލައްވާ ރައްޔިތުންގެ އޮބަހައްޓައިގެން ކަމަށާ ދ. ކުޑަހުވަދޫ އިންވެސް ރޭ ފެނުނީ އެ މަންޒަރު ކަމަށެވެ.

ޑިމޮކްރެޓްސް އިން ވަނީ ދިވެހިރާއްޖޭގެ އެކި ކަންކޮޅުގައި މި ސަރުކާރާ ދެކޮޅަށް ސުލްހަވެރިގޮތުގައި އަޑު އުފުލަމުންދާ ރައްޔިތުން ހައްޔަރުކުރުންފަދަ އަނިޔާވެރި، ހުދުމުހުތާރު އަމަލުތައް ހުއްޓާލުމަށް ގޮވާލާފައެވެ.