ރައީސް ޔާމީން ގެ އިސްތިއުނާފް އަޑު އެހުން ބުރާސްފަތި ދުވަހަށް ތާވަލްކޮށްފި!
ކުރީގެ ރައީސް އަބްދުالله ޔާމީންގެ މައްޗަށް އިއްވާފައިވާ ޖަލު ހުކުމް އެމަނިކުފާނުގެ ފަރާތުން ހައިކޯޓުގައި އިސްތިއުނާފު ކޮށްފައި ވާތީ އެމައްސަލައިގެ އަޑުއެހުމެއް އަންނަ ބުރާސްފަތި ދުވަހު ބާއްވަން ތާވަލް ކޮށްފައިވާކަމަށް އެމަނިކުފާނުގެ އިސް ގާނޫނީ ވަކީލް ޑރ.މުހައްމަދު ޖަލީމް އަހްމަދު ވިދާޅުވެއްޖެއެވެ.
ވ. އާރަށް މައްސަލާގައި ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި، އެމަނިކުފާނުގެ މައްޗަށް ކްރިމިނަލް ކޯޓުން އިއްވި 11 އަހަރުގެ ޖަލު ހުކުމް ހައިކޯޓުގައި އިސްތިއުނާފު ކޮށްފައިވާއިރު، މައްސަލަ ކުރިއަށް ނުދާތީ އިދިކޮޅު ލީޑަރޝިޕުން މިއަދުވެސް ވަނީ ހައިކޯޓަށް ވަޑައިގެންފައެވެ.
އެއަށްފަހު ނޫސްވެރިންނާއި ބައްދަލު ކުރައްވައި ވާހަކަދައްކަވަމުން، ޔާމީނުގެ ޑރ. ޖަމީލް ވިދާޅުވީ، އެ މައްސަލައިގެ އަޑުއެހުމެއް މި ބުރާސްފަތި ދުވަހަށް ތާވަލްކޮށްފައިވާ ކަމަށް ހައިކޯޓުން މައުލޫމާތު ދީފައިވާ ކަމަށެވެ. އެހެންކަމުން, ދާދި އަވަހަށް މައްސަލަ ނިމިގެންދާނެ ކަމަށް ބެލެވޭ ކަމަށްވެސް ޖަމީލް ވިދާޅުވި އެވެ.
ހައިކޯޓުގައި އޮތް ރައީސް ޔާމީންގެ މައްސަލަ އަށް ހުރަސް އެޅުނީ ފަނޑިޔާރުން ޗުއްޓީ އަށް ވަޑައިގަތުމުންނެވެ. މައްސަލައިގެ ޝަރީއަތައް ފުރަތަމަ ހުރަސް އެޅުނީ ރައީސް ޔާމީންގެ މައްސަލަ ބައްލަވާ ތިން ފަނޑިޔާރުންގެ ތެރެއިން އެއް ފަނޑިޔާރު ކަމަށްވާ ހުޒައިފާ މުހައްމަދު އިމަޖެންސީ ޗުއްޓީއެއް ނެންގެވުމުންނެވެ. ފަނޑިޔާރު ހުޒައިފާގެ ޗުއްޓީ ނިމުނުއިރު ފަނޑިޔާރު މުހައްމަދު ސަލީމް ޗުއްޓީ އަށް ވަޑައިގެންފައި ވުމުން މައްސަލަ ތާވަލް ނުކުރެވި ދިގުލައިގެން ދިޔައީ އެވެ.
ޑރ. ޖަމީލް ވިދާޅުވީ، ހައިކޯޓުގެ މައްސަލަ ލަސް ވުމުގެ ސަބަބުން އިއާދަ ނުކުރެވޭ ވަރުގެ ބޮޑު ގެއްލުމެއް ލިބިގެން ގޮސްފައިވާ ކަމަށެވެ.
"ދިވެހި ރައްޔިތުންގެ ގާތްގަނޑަކަށް އެއްލައްކަ ތިރީހަކަށް ހާސް މީހުންގެ ސަޕޯޓާއި އެކީގައި ކެންޑިޑެސީ ހުށަހަޅާފައިވާ، ރައީސް ޔާމީން ގެ އިންތިހާބީ ހައްގު ގެއްލިގެން މި ދިޔައީ. އެއީ އިއާދަ ކުރެވޭނެ ގެއްލުމެއް ނޫން. އަޅުގަނޑުމެންގެ މުޅި ޕާޓީ އެ އިހްތިޖާޖު ގައި މި އޮތީ، އެއީ އަޅުގަނޑުމެންގެ ދޫކޮށްލާނެ އިހްތިޖާޖު އެއްނޫން. އަޅުގަނޑުމެން ގަބޫލު ކުރަނީ ރާއްޖޭގައި އޮތް އެންމެ ބޮޑު ޕާޓީ، ޕީޕީއެމްގެ ރިޔާސީ ކެންޑިޑޭޓް ބައިވެރި ނުވާ އިންތިހާބަކީ އިންކްލޫސިވް އިންތިހާބެއް ނޫން. އަދި ފެއަރ އިންތިހާބެއް ނޫން ކަމަށް އަޅުގަނޑުމެން ގަބޫލު ކުރަނީ" ޑރ. ޖަމީލް ވިދާޅުވި އެވެ.
މިއާއެކު ޖަމީލް ވިދާޅުވީ ހައިކޯޓަށް ވަޑައިގެންނެވީ، ހައިކޯޓުގެ މައްސަލަ ލަސްވުމާއި ގުޅިގެން އެމަނިކުފާނަށް ލިބެމުންދާ ގެއްލުމާއި ޢާއިލާ ތަހައްމަލް ކުރަމުންދާ ވޭނުގެ ސަބަބުން ކަމަށެވެ. އަދި އެކަމަށް ނިމުމެއް އަންނާނީ ހައިކޯޓުގައި އޮތް އަޑުއެހުން ނިންމައިގެން ކަމަށްވެސް ޖަމީލް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
