ޑިއެގޯ ކޮސްޓާ އެނބުރި ޕްރިމިއާ ލީގަށް

މީގެ ކުރިން އިނގިރޭސި ވިލާތުގެ ޗެލްސީއަށް ކުޅުނު ސްޕެއިން އަށް ނިސްބަތްވާ ޑިއެގޯ ކޮސްޓާ އެނބުރި ޕްރިމިއާ ލީގުގެ ވުލްވްސް އާއި ގުޅުމަށް އެއްބަސްވެެއްޖެއެވެ.

މިވަގުތު ޓީމެއް ނެތި ހުރި ޑިއެގޯ ކޮސްޓާ ވުލްވްސް އާއި ގުޅެން މިދިޔަ ހަފްތާ އެއްބަސްވި ނަމަވެސް މި ޓްރާންސްފާ ދިގުލައިގެން ގޮސްފައިވަނީ އިނގިރޭސި ވިލާތުގެ ވޯކް ޕާމިޓް ހޯދުމަށް ވުލްވްސް އިން ހުށައެޅި ހުށައެޅުން ގަބޫލު ނުކުރުމުންނެވެ. ޓީމަކާއި ނުލާ ގިނަ ދުވަސް ވެފައިވާ ކަމަށް ބުނެ ޕާމިޓު ނުލިބުމުން ވުލްސްއިން ވަނީ އެ މައްސަލަ އެޕީލް ކޮށްފައެވެ. އަދި މިއަދުގެ ވަގުތެއްގައި ކޮސްޓާގެ ވޯކް ޕާމިޓް ގެ ކަންކަން ހަމަޖެހިފައިވާ ކަމަށް ރިޕޯޓުތައް ވަނީ ބުނެފައެވެ.

މިވަގުތު އިނގިރޭސި ވިލާތުގައި ވުލްވްސް އާއި އެކު ޓްރައަލް އެއް ފުރިހަމަ ކުރަމުންދާ ކޮސްޓާ އެ ޓީމާއި ގުޅޭނީ އެއް އަހަރުގެ މުއްދަތަކަށް ކަމަށް މައުލޫމާތު ލިބެއެވެ.

33 އަހަރުގެ ކޮސްޓާ އެންމެ ފަހުން ވާދަވެރި މެޗެއް ކުޅިފައިވަނީ މިދިޔަ އަހަރުގެ ޑިސެމްބަރު މަހުއެވެ. މި އަހަރުގެ ޖެނުއަރީ މަހު ބްރެޒިލްގެ އެތުލެޓިކޯ މިނެއިރޯ ދޫކޮށްލިފަހުން ކޮސްޓާ އެއްވެސް ޓީމަކާއި ގުޅިފައެއް ނުވެއެވެ.

ޗެލްސީ އާއި އެތްލެޓިކޯ މެޑްރިޑުން ވިދާލި ޑިއެގޯ ކޮސްޓާ އަކީ ޔޫރަޕުގެ ފުޓްބޯޅާގައި ވަރަށް ފާހަގަ ކޮށްލެވޭ އެއް ފޯވާޑެވެ.