މާވަށު މޫސަ މަރާލުން: މޯޑް އަލުން މާވަށަށް

މާވަށުގައި އިއްޔެ ހެނދުނު ހިނގި ހަމަނުޖެހުމެއް ބޮޑުވެ ވަޅީގެ ހަމަލާއެއް އަމާޒުވެ އެ ރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމް ވަނީ މަރުވެފަ އެވެ. މޫސައަށް ހަމަލާ ދިނުމުގެ ތުހުމަތު އޮތީ ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމް (މޯޑް) އަށެވެ.

ހަމަލާއާ ގުޅިގެން ފަރުވާ ދިނުމަށް ސިއްހީ މަރުކަޒަށް ގެންދިޔައިރުވެސް މޫސަ ވަނީ މަރުވެފަ އެވެ. ހަމަނުޖެހުން ހިނގާ މޫސައަށް ވަޅިން ހަމަލާ ދިނުމަށް ފަހު މޯޑް ފުލުހަށް ހާޒިރުވީ އަމިއްލައަށެވެ. އެ ހާދިސާ ހިނގާފައިވާ ކަން މާވަށުގައި ތިބި ފުލުހުންގެ ސަމާލު ކަމަށް ފުރަތަމަ ގެނައީވެސް އޭނާ އެވެ.

އެ ހިސާބުން ފެށިގެން ފުލުހުން ވަނީ މަރުގެ އެ މައްސަލައިގެ ތަހުގީގަށް އޭނާ ހައްޔަރު ކޮށްފަ އެވެ. އަދި ތަހުގީގު ފަށާފަ އެވެ. މޫސައަށް ހަމަލާ ދިން ވަޅި މޯޑް އެއްލާނީ މޫދަށެވެ. އިއްޔެ ހަވީރު ފުލުހުން ވަނީ މޯޑްއާއެކު އެ ސަރަހައްދަށް ގޮސް މޫދުން ވަޅި ހޯދާފަ އެވެ.

ވަޅި އެއްލާލި ސަރަހައްދު ވެސް ފުލުހުންނަށް ބުނެދިނީ އޭނާ އެވެ.

އޭގެ ފަހުން ރޭގެ ވަގުތެއްގައި މޯޑް ވަނީ ލ. ފޮނަދޫއަށް ގެންގޮސްފަ އެވެ. އަދި މިއަދު މެންދުރު ކުރީ 11 ޖަހާކަންހާއިރު އަލުން އޭނާ ވަނީ މާވަށަށް ގެނެސްފަ އެވެ. އޭނާ ގެނައީ ކޯޓަށެވެ. ބެލެވެނީ އެއީ މުއްދަތު މަޖިލީހަށް ގެނައީ ކަމަށެވެ.

މަރުގެ ތަހުގީގާއި ގުޅޭގޮތުން ފުލުހުން އަދި މާގިނަ މައުލޫމާތެއް ހިއްސާއެއް ނުކުރެ އެވެ. ފުލުހުން މިއަދު ބުނީ މޯޑްގެ ބަންދާއިމެދު ގޮތް ނިންމަން ކޯޓަށް ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފައިވާ ކަމަށެވެ.

މޫސަގެ ހަށިގަނޑު މާލެއަށް

ރޭގެ ވަގުތެެއްގައި މޫސަގެ ހަށިގަނޑު ވަނީ މާވަށުން ފޮނަދޫއަށް ގެންގޮސްފަ އެވެ. އަދި މިއަދުގެ ވަގުތެއްގައި އޭނާގެ ހަށިގަނޑު ވަނީ މާލެ ގެނެސްފަ އެވެ.

ފުލުހުން ބުނި ގޮތުގައި މޫސަގެ ހަށިގަނޑު މާލެ ގެނައީ ތަހުގީގަށް ސާމްޕަލް ނެގުމަށެވެ. ނަމަވެސް އިތުރު ތަފްސީލެއް ނުދެ އެވެ.

އިއްޔެގެ ހާދިސާއާ ގުޅޭގޮތުން މާވަށުގައި ތަފާތު ވާހަކަތައް ދެކެވެ އެވެ. އެ ރަށުގެ ބައެއް މީހުން ބުނާ ގޮތުގައި މޯޑްއާ މޫސަ އަކީ ދެ އެކުވެރީންނެވެ.

މޯޑް އަކީ އެ ރަށު މީހަކާ ކުރީން ކައިވެނިކޮށްގެން އުޅުނު މީހެކެވެ. އަދިވެސް އެ މީހާއާ ގުޅުން އޮވެ އެވެ. އެ މީހުން ޕްލޭން ކޮށްފައި އޮތީ އަލުން ކައިވެނި ކުރާށެވެ.

އިއްޔެގެ ހާދިސާ ހިނގަން މެދުވެރިވީ މަސްތުވާތަކެއްޗާއި ގުޅުންހުރި ކަމަކާއި ގުޅިގެން ކަމަށް ވާހަކަ ދެކެވެ އެވެ. ފުލުހުން އެކަމާއި ގުޅޭގޮތުން އެއްވެސް އެއްޗެއް ނުބުނެ އެވެ.