ކުރިއަށް އޮތް 5 އަހަރު ތެރޭ މަތި ކޮމަންޑޫގައި 300 ހައުސިން ޔުނިޓު އަޅާނަން: ރައީސް

ކުރިއަށް އޮތް 5 އަހަރު ދުވަސްތެރޭގައި މަތިކޮމަންޑޫގައި 300 ހައުސިން ޔުނިޓު އަޅުއްވާދެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވައުދުވެވަޑައިގެންފި އެވެ.

ރައީސް ޞާލިހު މިފަދައިން ވިދާޅުވެފައިވަނީ އެމަނިކުފާނުގެ ރިޔާސީ ކެމްޕޭނު ފެއްޓެވުމަށް ށ. ކޮމަންޑޫގައި ބޭއްވި ޖަލްސާއެއްގައި ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

ރައީސް ޞާލިހު ވިދާޅުވީ މަތި ކޮމަންޑޫއަށް ބޭނުންވާ އަސާސީ ކަންކަން ފުރިހަމަކޮށްދިނުމަށް ސަރުކާރުން މަސައްކަތްތައް ކުރަމުންދާ ކަމަށެވެ.

އެގޮތުން މި ރަށަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ ދަތިކަންކަމަށް ކައުންސިލުން ވެސް ރައީސްގެ ސަމާލުކަމަށް ގެނެސްފައިވާކަމަށް ރައީސް ޞާލިހު ވިދާޅުވި އެވެ.

އެމަނިކުފާނު ވިދާޅުވީ ދެ ކޮަމަންޑޫ ދޭތެރޭގައި އޮތް ބިން ހިއްކާ ދެ ކޮމަންޑޫ ގުޅާލުމާއެކު ބޯހިޔާވަހިކަމަށް ބޭނުންވާ ބިމުގެ މައްސަލައަށް އެކަށީގެންވާ ޙައްލުތަކެއް ލިބިގެންދާނެކަމަށް ޤަބޫލުކުރައްވާ ކަމަށެވެ.

އެކަން ފާހަގަކުރައްވާ ރައީސް ޞާލިހު ވިދާޅުވީ ކުރިއަށް އޮތް ފަސް އަހަރުތެރޭ މަތި ކޮމަންޑޫގައި 300 ހައުސިން ޔުނިޓު އަޅުއްވާ ދެއްވާ ބޯހިޔާވަހިކަމުގެ މައްސަލަ ޙައްލުކޮށްދެއްވާނެ ކަމަށެވެ.

"މަތިކޮމަންޑޫގައި އަސާސީ ޚިދުމަތްތައް ޤާއިމްކުރުން އަޅުގަނޑުމެންގެ ޕްލޭނުގައި އެބައޮތް. އޭގެ ތެރޭގައި ރައްޔިތުންގެ ފަރާތުން ކައުންސިލްގެ ރައީސް އެ ވިދާޅުވިގޮތަށް މަތިކޮމަންޑޫގައި 300 ހައުސިން ޔުނިޓު އަޅުގަނޑުމެން ކުރިއަށް އޮތް 5 އަހަރު ދުވަހުގެ ތެރޭގައި އަޅާދޭނަން"

ރައީސް ޞާލިހު

ރައީސް ޞާލިހު ވިދާޅުވީ ދެ ކޮމަންޑޫ ގުޅާލުމަށް އެމަނިކުފާނު ވީ ވައުދު ފުއްދުމުގެ އަމަލީ މަސައްކަތް މި ޖަލުގައި މަސް ތެރޭގައި ފެށިގެންދާނެ ކަމަށެވެ.

އެގޮތުން ސަރުކާރުގެ އާ ޑްރެޖަރު މި މަހުގެ ފަހު 10 ގައި އޮންނާނީ ކޮމަންޑޫގައި ކަމަށާއި، ޖުލައި މަހުގެ ނިޔަލަށް ދެ ކޮމަންޑޫ ގުޅާލުމުގެ މަސައްކަތް ނިމިގެންދާނެކަމަށް ރައީސް ޞާލިހު ވިދާޅުވި އެވެ.

ދެކޮމަންޑޫ ދޭތެރޭގައި އޮތް ބިން ހިއްކުމުގެ މަސައްކަތް ސަރުކާރުން ކުރަން ނިންމި ސަބަބަކީ ވެސް ކޮމަންޑޫއަށް ދިމާވެފައިވާ ބިމުގެ ދަތިކަން ޙައްލުކޮށް ގިނަ ބަޔަކަށް ބޯހިޔާވަހިކަން ފޯރުކޮށްދިނުމަށްކަން ރައީސް ޞާލިހުގެ ވާހަކަފުޅުގައި ފާހަގަކުރެއްވި އެވެ.