ކެނޑިނޭޅި އަނިޔާދެމުން ދާއިރު ރައީސް ޔާމީން އެ އިސްކުރެއްވީ ޤައުމު: އިދިކޮޅު ލީޑަރުން
ސަރުކާރުން ކެނޑިނޭޅި އަނިޔާދެމުން ދާއިރު ވެސް ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމު އިސްކުރެއްވީ ޤައުމާއި ރައްޔިތުންކަމަށް އިދިކޮޅު ކޯލިޝަންގެ ލީޑަރުން ވިދާޅުވެއްޖެ އެވެ.
އެ ބޭފުޅުން މިފަދައިން ވިދާޅުވެފައި ވަނީ މި އަހަރުގެ ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން މާލޭ ސިޓީގެ މޭޔަރު ޑރ މުޙައްމަދު މުއިއްޒު ރިޔާސީ އިންތިޚާބުގައި ވާދަކުރައްވަނީ ރައީސް ޔާމީނުގެ ފުރިހަމަ ތާއީދާއި އެކުގައިކަމަށާއި، އަދި އެމަނިކުފާނަށް އިދިކޮޅު ހުރިހާ ލީޑަރުންގެ ސަޕޯޓު އޮތްކަން ހާމަކުރުމަށް ރޭ ޕީޕީއެމް އޮފީހުގައި ބޭއްވި ޕްރެސް ކޮންފަރެންސް ގައި ވާހަކަދައްކަވަމުން ނެވެ.
އެގޮތުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ، ޕީޕީއެމްގެ ރިޔާސީ ކެންޑިޑޭޓު ރައީސް ޔާމިނަށް އިންތިޚާބުގައި ވާދަކުރުމުގެ ފުރުސަތު ނަގާލާ ސަރުކާރުން ދަނީ ކެނޑިނޭޅި ރައީސް ޔާމިނަށް އަނިޔާވެރިވަމުން ކަމަށެވެ.
އެހެން ނަމަވެސް މި ހައްސާސް ދަނޑިވަޅުގައި ވެސް ރައީސް ޔާމީން އިސްކުރެއްވީ ޤައުމާއި ރައްޔިތުންގެ މަސްލަހަތުކަމަށާއި، އެމަނިކުފާނަށް ލިބެމުންދާ އަނިޔާތަކަށް ބެއްލެވުމެއް ނެތި، ރިޔާސީ އިންތިޚާބުގައި ޕީޕީއެމް-ޕީއެންސީ ކޯލިޝަނުން ވާދަކުރުމަށް އެމަނިކުފާނު ނިންމެވި ނިންމެވުމަކީ ރައްޔިތުންގެ ހައްޤުގައި ނިންމެވި ނިންމުމެއްކަމަށް އަބްދުއްރަހީމް ވިދާޅުވި އެވެ. އަދި އެކަމަށްޓަކައި އޭނާ ވަނީ ރައީސް ޔާމިނަށް އިދިކޮޅު ލީޑަރުންގެ ނަމުގައި ވަރަށް ޚާއްސަ ޝުކުރެއް އަދާކުރައްވާފަ އެވެ.
"ރައީސް ޔާމިނަށް ވަރަށް ޚާއްސަ ޝުކުރެއް ދަންނަވަން ބޭނުން. އެއީ، މި ސަރުކާރުގެ އެ ނުރައްކާތެރި އަނިޔާގައި އެމަނިކުފާނު ދުވަސްތައް ހޭދަކުރައްވަމުން ގެންދަވާއިރުވެސް އެމަނިކުފާނަށް ލިބިވަޑައިގަންނަވާ އަނިޔާއަށްވުރެ ބޮޑަށް ޤައުމާއި ރައްޔިތުންނަށް އިސްކަން ދެއްވާ މި އިންތިޚާބުގައި އަޅުގަނޑުމެން ވާދަކުރުމަށް ފުރުސަތު ދެއްވި ދެއްވުން އެއީ އަޅުގަނޑު ދަންނަވާނީ އަޅުގަނޑުމެން އެމަނިކުފާނަށް ޝުކުރުދެންނެވުން ހައްޤު ކަމެކޭ"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ އިދިކޮޅު ލީޑަޝިޕު އޮތީ ބަދަހިކޮށް ކަމަށެވެ. އެބޭފުޅުން ކުރިއަށް ވަޑައިގަންނަވާނީ ރައީސް ޔާމީނުގެ އިރުޝާދުފުޅާއި އެކުގައި ކަމަށާއި، އެބޭފުޅުން ރިޔާސީ އިންތިޚާބު ކާމިޔާބު ކުރުމަށް ފެށި މަސައްކަތް ހުއްޓާލާނީ ރައީސް ޔާމީން މިނިވަންކޮށް އަނބުރާ އެބޭފުޅުންގެ ސަފަށް ގެންނެވުމަށް ފަހުގައި ކަމަށް އަބްދުއްރަހީމް ވިދާޅުވި އެވެ.
އެއާއެކު އޭނާ ވަނީ ރައީސް ޔާމިނުގެ ހައްޤުގައި އެމަނިކުފާނު އެންޑޯސްކުރެއްވި ޕީޕީއެމް-ޕީއެންސީގެ ކެންޑިޑޭޓު ޑރ މުއިއްޒު އިންތިޚާބު ކުރުމަށް މިހާރުން މިހާރަށް ސަޕޯޓަރުން މަސައްކަތް ފައްޓެވުމަށް ވެސް ގޮވާލައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
