ޖޭޕީގެ މެނިފެސްޓޯ އިފްތިތާހް ކުރުން މިރޭ!

މި އަހަރު ސެޕްޓެމްބަރު މަހު ބާއްވާ ރިޔާސީ އިންތިހާބުގައި ވާދަކުރައްވާ ޖުމްހޫރީ ޕާޓީ (ޖޭޕީ)ގެ ކެންޑިޑޭޓު އަދި މާމިގިލީ ދާއިރާގެ މެންބަރު ގާސިމް އިބްރާހިމްގެ މެނިފެސްޓޯ ލޯންޗް ކުރުން މިރޭ ބާއްވާ ގޮތަށް ނިންމައިފިއެވެ.

ޖޭޕީން ބުނީ އެޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް އާއި ރަނިންގމޭޓް އެ ޕާޓީގެ ޑެޕިއުޓީ ލީޑަރު ޑރ. އަމީން އިބްރާހިމްގެ މެނިފެސްޓޯ ލޯންޗް ކުރުމުގެ ރަަސްމިއްޔާތު މިރޭ 9:30 ގައި ކުނޫޒުގައި ބާއްވާ ގޮތަށް ހަމަޖައްސައިފިއެވެ.

ޤާސިމްގެ ރިޔާސީ ކެމްޕޭންގެ ސްލޯގަން އަކީ "ހާސްކަނޑާލާ! ހަމަޖެހޭނެ!" އެވެ. އެބޭފުޅާގެ މެނިފެސްޓޯ ގައި ހިމަނާނެ ބައެއް މުހިންމު ކަންކަން މީގެ ކުރިން ގާސިމް އިއުލާން ކުރައްވާފައިވާއިރު، އެއިން އެންމެ ފާހަގަކޮށްލެވޭ އެއް ކަމަކީ ފަސް އަހަރު ތެރޭގައި 100 މިލިއަނަރުން އުފެއްދެވުމަށް ވެވަޑައިގެންނެވި ވައުދެވެ.

މީގެ އިތުރުން، ރާއްޖެއިން ބޭރުން ފަރުވާ ހޯދަން ބޭނުންވާ ބަލި މީހާއާއި އޭނާގެ އެހީތެރިޔާގެ ހުރިހައި ޚަރަދެއްވެސް އާސަންދަ އިން ކުރާ ގޮތަށް ހަމަޖައްސައިދިނުމާއި، ރިޔާސީ ދައުރު ނިމުމުގެ ކުރިން މުޅި ރާއްޖޭގައި 30،000 ހައުސިން ޔުނިޓު އަޅުއްވާނެ ކަމަށް ވެވަޑައިގެންނެވި ވައުދު ފާހަގަކޮށްލަންޖެހެއެވެ.

ހަމަ އެހެންމެ، ހުރިހާ ޒުވާނުންނަށްވެސް ވަޒީފާ ހޯދައިދިނުމާއި، މަސްތުވާތަކެތީގެ މައްސަލައަށް ހައްލެއް ހޯދައިދެއްވާނެ ކަމަށްވެސް ޖޭޕީން ވަނީ ވައުދުވެފައެވެ.