އަންނަ ދައުރުގައި ދޮށީ އުމުރު މީހުންނަށްޓަކައި ކޮށްދޭނެ ކަންކަން ރައީސް ޞާލިހު ހާމަކުރައްވައިފި

އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ކުރިއަށް އޮތް ދައުރަށް އިންތިހާބުވެ ވަޑައިގެންފި ނަމަ، ދޮށީ އުމުރުގެ މީހުންނަށް ކޮށްދޭން ނިންމަވާފައިވާ ކަންކަން ހާމަކުރައްވައިފިއެވެ.

ރިޔާސީ ކެންޕެއިނަށް ގދ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ދެއްވަދޫއަށް ވަޑައިގެން ދެއްކެވި ވާހަކަފުޅުގައި ރައީސް ޞާލިހު ވިދާޅުވީ, ރާއްޖޭގަ އާބާދީ މިސްރާބު ޖަހާފައިވަނީ ދޮށީ އުމުރުގެ އާބާދީއަކާއި ދިމާއަށް ކަަމަށެވެ. އެގޮތުން އެވްރެޖް ދިވެއްސެއްގެ އުމުރު 80 އަހަރުގައި މިހާރު ހުރިކަން އެމަނިކުފާނު ފާހަގަކުރައްވާފައިވެއެވެ.

އެހެންކަމުން، ސަރުކާރުން އެކަމަށް ތައްޔާރުވެ، ދޮށީ އުމުރުގައި، ހަމަޖެހިގެން އުފަލުގައި އާއިލާއާއި އެކުގައި އުޅެވޭނެ ގޮތްތަކެއް ހޯދައިދޭން ޖެހޭ ކަމަށް ރައީސް ވިދާޅުވި އެވެ. އަދި ދޮށީ އުމުރުގެ ކޮންމެ މީހަކީވެސް މުހިންމު މީހެއްގެ ގޮތުގައި އެމްޑީޕީގެ ސިޔާސަތުތައް އެކުލަވާލެވޭނެކަމަށް އެމަނިކުފާނު ވިދާޅުވި އެވެ.

އެގޮތުން ރައީސް ޞާލިހު ފާހަގަކުރެއްވި ކަންކަމުގެ ތެރޭގައި؛

1) ވަޒީފާއިން މުސްކުޅި ކުރާ އުމުރަށް އަންނައިރު, ޓްރާންސިޝަނަލް ޓު ވޯކްނިޒާމް ތައާރަފްކޮށް، ސައިކޯ ސޯޝަލް ސަޕޯޓްދީ މި ބަދަލަށް މީހުން ތައްޔާރު ކުރުން.

2) ވަކި އުމުރަކުން މަތީ މީހުންނަށް އިތުރު ޕޮއިންޓް ލިބޭ ވަޒީފާތައް ތަޢާރަފް ކުރުން

3) އަމިއްލަ މަަސައްކަތް ކުރަން ބޭނުންވާ ދޮށީ އުމުރުގެ މީހުންނަށް މަލީ އެހީތެރިކަން ލިބޭނެ ގޮތް ހޯދައި ދިނުން

4) ދޮށީ އުމުރާއި ގުޅިގެން ދާންމަތިވާ ފަރާތްތަކަށް ސިއްހީ އެހީތެރިން ފޮނުވައި ދިނުން

5) ދޮށީ އުމުރުގެ އާބާދީ ބޮޑެތި ރަށްރަށުގައި އެމީހުންނަށް ހާއްސަ ޚިދުމަތްތަކާއެކު މަރުކަޒުތަކާއި ކުލަބްތައް ގާއިމް ކުރުން. އެގޮތުން ޑްރޮޕްއިން ސެންޓްރުގެ ޚިދުމަތާއި އިޖުތިމާއީ ހަރަކާތްތައް ތައާރަފް ކުރުން

6) ހެލްތު ސްކްރީން ހެދުމާއި، ދުޅަހެޔޮކަމާއި ހަށިހެޔޮ ކަންމަތީ ހުރުމަށް ބޭނުންވާ މައުލޫމާތު ފޯރުކޮށްދިނުން.

ރައީސް ޞާލިހު ވިދާޅުވީ، ދޮށީ އުމުރުގެ މީހުންގެ ހިލްމާއި އިލްމުގެ ބޭނުން ފުރިހަމަ ގޮތުގައި ކުރެވޭނެ މަގު އަންނަ ދައުރުގައި ފަހިކޮށްދެއްވާނެ ކަމަށެވެ. އަދި އެމީހުންނަށް ރައްކާތެރި ކަމާއިއެކު، ހަށިހެޔޮ، ދުޅަހެޔޮ ވެއްޓެއް ޤާއިމް ކޮށްދެއްވާނެ ކަމަށްވެސް ރައީސް ޞާލިހު ވިދާޅުވި އެވެ.