އައު ސަރުކާރަށް ޖެއްސުންކޮށް ފުރައްސާރައެއް ނުކުރާނަން؛ އެއްބާރުލުން ދޭނަން: އަސްލަމް
އިންތިޚާބީ ސަރުކާރަށް ބޭނުންވާ ފުރިހަމަ އެއްބާރުލުން ދެއްވާނެ ކަމަށާ އަދި ޖެއްސުންކޮށް، ފުރައްސާރަ ނުކުރާނެ ކަމަށް އެމްޑީޕީގެ ޕަރލިމެންޓްރީ ގްރޫޕްގެ ލީޑަރު މުޙައްމަދު އަސްލަމް ވިދާޅުވެއްޖެއެވެ.
އެމްޑީޕީގެ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ޕީޖީ ލީޑަރު އަސްލަމް ވިދާޅުވީ، އެޕާޓީގެ މަސްޢޫލިއްޔަތަކީ އައު ސަރުކާރު ޒިންމާދާރުކުރުވުންކަމަށެވެ. އަދި މަޖިލީހުން ކުރަން އޮތް އެންމެ މުހިންމު މަސައްކަތަކީ އަންނަ އަހަރަށް ލަފާކުރާ ދައުލަތުގެ ބަޖެޓް ފާސް ކުރުން ކަން ފާހަގަކުރައްވައި އަސްލަމް ވިދާޅުވީ، ބަޖެޓް ފާސް ކުރުމުގައި އަލަށް އިންތިޚާބު ވެފައިވާ ރައީސުލްޖުމްހޫރިއްޔާއާއި އާ ސަރުކާރުން ބޭނުންވާ އެއްބާރުލުން ދެއްވާނެ ކަމަށެވެ.
އެކަންކަމުގައި އާ ސަރުކާރުގެ މަސައްކަތްތަކަށް ދަތިކޮށް ހުރަސްއެޅުމަކީ، އެއްވެސް ޙާލެއްގައި އެމްޑީޕީގެ ރޫޙެއް ނޫންކަމަށްވެސް އަސްލަމް ވިދާޅުވެފައެވެ.
"ބަޖެޓު އެކުލަވަން ކުރާ މަސައްކަތުގައި އައު ސަރުކާރަށް ދަތިކުރުމުގެ ރޫހެއް ނެތް. ޖެއްސުންކޮށް ފުރައްސާރައެއް ނުކުރާނަން. ފުރިހަމަ އެއްބާރުލުން ލިބޭނެ."
މުހައްމަދު އަސްލަމް
މީގެއިތުރުން، އިންތިޚާބީ ރައީސުލްޖުމްހޫރިޔާ ހުވާ ކުރުމުގެ ރަސްމިއްޔާތަށް ބޭނުންވާ އެއްބާރުލުންވެސް ދެއްވާނެ ކަމަށްވެސް އަސްލަމް ވިދާޅުވިއެވެ.
ބަޖެޓް އެކުލަވާލުމުގެ ކަންކަމުގައި އިންތިޚާބީ ރައީސުލްޖުމްހޫރިއްޔާގެ އޮފީހުންވެސް ވަނީ މަސައްކަތްތައް ފައްޓަވާފައެވެ. އެގޮތުން ދަޢުލަތުން މިހާރު ފަށައިގެން ކުރިއަށްގެންދާ މަސައްކަތްތަކާއި، މާލީ ތަފްސީލްތައް އެއްކުރުމުގެ މަސައްކަތް ވަނީ ފައްޓަވާފައެވެ.
ޑރ. މުއިއްޒުގެ ސަރުކާރު އެކުލަވާލައި އައްޔަން ކުރައްވާ ވަޒީރުންގެ މަޖިލީހުގެ މެމްބަރުންނަށް ރުހުން ދެއްވަނީ ރައްޔިތުންގެ މަޖިލީހުންނެވެ. ކެބިނެޓަށް ރުހުން ދެއްވުމާއި އަދިވެސް މަޖިލިސް ތެރެއިން ޤާނޫނު ތަކަށް ގެންނަންޖެހޭ ބަދަލުތައް ގެނައުމުގައި އިންތިޚާބީ ރައީސް ޑރ. މުއިއްޒު ވަނީ މަޖިލީހުގެ އެއްބާރުލުން ލިބިގެންދާނެކަމަށް އުންމީދު ކުރައްވާކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
