ޑިމޮކްރެޓްސްއިން މަޝްވަރާ ދިނީ ޤައުމީ އެއްބައިވަންތަކަމުގެ ސަރުކާރެއް އުފެއްދުމަށް: އަބްދުއްރަހީމް
ޤައުމީ އެއްބައިވަންތަކަމުގެ ސަރުކާރެއް އުފެއްދުމަށް ޑިމޮކްރެޓްސްއިން މަޝްވަރާ އަރުވާފައިވާކަމަށް އިންތިޚާބީ ރައީސް ޑރ މުހައްމަދު މުއިއްޒު އެކުލަވާލި އިންތިޤާލީ ކޮމެޓީގެ ޑިރެކްޓާ ޖެނެރަލް އަދި އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި އަބްދުއްރަހީމް ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައި ވަނީ ޑރ މުއިއްޒުގެ ސަރުކާރު ހިންގުމާއި ގުޅޭގޮތުން ދަ ޑިމޮކްރެޓްސްއާއި އެކު ކުރެވުނު މަޝްވަރާތަކަށް ފަހު ނޫސްވެރިންނާއި ވާހަކަދައްކަވަމުން ނެވެ.
އަބްދުއްރަހީމް ވިދާޅުވީ ރަނގަޅު ސަރުކާރެއް ހިންގުމާއި ގުޅޭގޮތުން ދަ ޑިމޮކްރެޓްސްގެ ލަފާ މަޝްވަރާ މިހާރު އަރުވާފައިވާ ކަމަށެވެ.
އެގޮތުން އެބޭފުޅުންނަކީ ވެސް ރަނގަޅު ސަރުކާރެއް ހިންގުމުގެ ގިނަ ތަޖުރިބާތަކެއް ލިބިވަޑައިގެން ތިއްބެވި ބޭފުޅުންކަމަށާއި، އެގޮތުން ހެޔޮވެރިކަމެއް ކުރެވޭނެ ގޮތްތަކާއި ގުޅޭގޮތުން އަދި ޤައުމީ އެއްބައިވަންތަކަމުގެ ސަރުކާރެއް އެކުލަވާލުމަށް ޑިމޮކްރެޓްސްގެ ފަރާތުން މަޝްވަރާ އަރުވާފައިވާކަމަށް އަބްދުއްރަހީމް ވިދާޅުވި އެވެ.
"އެބޭފުޅުންނަށް ކުރެވިފައި ހުރި ތަޖުރިބާ އަޅުގަނޑުމެންނާއި ހިއްސާކުރެއްވީ. ދިމާވެފައި ހުރި އެކި މައްސަލަތަކާއި، އަދި ހަމައެއާއެކީގައި ދެން އޭގެ އަލީގައި ކުރިއަށް ދިއުމުގައި ކުރިއަށް ދާންވީ ގޮތް އެބޭފުޅުން އަޅުގަނޑުމެންނާއި ހިއްސާކުރެއްވީ. އެބޭފުޅުންވެސް ބައިވެރިވެގެން މިކަން ރަނގަޅުކުރަން ބޭނުންވާ ވާހަކަ. ޤައުމީ އެއްބައިވަންތަކަމުގެ ސަރުކާރެއްގެ ގޮތުގައި ހިނގާ ވަރަށް ރަނގަޅު ސަރުކާރެއް އޮންނަން އެބޭފުޅުން ބޭނުންފުޅުވާ ވާހަކަ ތަކުރާރުކޮށް ރައީސް ނަޝީދުގެ ފަރާތްޕުޅުން ވެސް ވިދާޅުވީ"
އަބްދުއްރަހީމް އަބްދުﷲ
އަބްދުއްރަހީމްގެ އިތުރުން ޑިމޮކްރެޓްސްގެ ފަރާތުން މަޝްވަރާތަކުގައި ބައިވެރިވެވަޑައިގެން ހަސަން ލަތީފު މީޑިއާއަށް ވިދާޅުވީ ޑރ މުއިއްޒުގެ ސަރުކާރު ހިންގުމަށް ދޭންޖެހޭ ހުރިހާ އެހީތެރިކަމެއް ދިނުމަށް ޑިމޮކްރެޓްސް ތައްޔާރަށް ތިބިކަމަށެވެ.
ޑރ މުއިއްޒުގެ ސަރުކާރަކީ ބާރުވެރި ރައްޔިތުންނަށް ޚިދުމަތްތަކެއް ދެވޭނެ ސަރުކާރެއްގެ ގޮތުގައި އުފެދި ހަމަޖެހޭ ސަރުކާރެއް އުފެެއްދުމަށް ޑިމޮކްރެޓްސްގެ ވިސްނުންތަކެއް ގެންގުޅޭކަމަށް ހަސަން ލަތީފު ވިދާޅުވި އެވެ. އަދި ސަރުކާރަށް މަޖިލީސްތެރެއިން ވެސް ދޭންޖެހޭ އެހީތެރިކަން ދިނުމަކީ މުހިންމު ކަމެއް ކަމަށާއި، އެކަންކަން ކުރެވޭނެ ގޮތްތަކާއި ދޭތެރޭ އެ ޕާޓީންވެސް ވިސްނުންތަކެއް ގެންގުޅޭކަމަށް ހަސަން ލަތީފު ވިދާޅުވި އެވެ.
އަބްދުއްރަހީމްއާއެކު ކުރިއަށް ގެންދެވުނު މި ބައްދަލުވުމުގެ ބޭނުމަކީ ޑރ މުއިއްޒުގެ ސަރުކާރާއި ޑިމޮކްރެޓްސް ގުޅިގެން މަސައްކަތްކުރެވޭނެ ގޮތްތަކެއް ހޯދުންކަމަށް ހަސަން ލަތީފު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
