އިސްރާއީލަށް އަމާޒުކޮށް، ފަލަސްތީނުން މިސައިލް ހަމަލާތަކެއް ދީފި

އިސްރާއީލުގެ ވެރި ރަށް، ޓެލް އަވީވް އަށް އަމާޒުކޮށް، ހަމާސް ޖަމާއަތުން މިސައިލް ހަމަލާތަކެއް ދީފިއެވެ.

ޓެލް އަވީވް އަށް އަމާޒުކޮށް ބޮޑެތި ހަމަލާތަކެއް ދީފައިވާކަމަށް ހަމާސް އިން ބުނެފައިވާއިރު، މި ހަމަލާ ތަކާއި ގުޅިގެން ޔަހޫދީ ފައުޖުން ވަނީ ހަމަލާ އަތުވެދާނެ ކަމުގެ އިންޒާރު ދިނުމުގެ ގޮތުން ސައިރެން ވެސް އިއްވާފައެވެ.

ޖެނުއަރީ މަހަށް ފަހު ހަމާސް އިން ޓެލް އަވީވް އަށް އަމާޒުކޮށް ދިން މި ހަމަލާއާއި ގުޅޭގޮތުން އިސްރާއީލުގެ ބައެއް ނޫސްތަކުން ރިޕޯޓް ކުރާ ގޮތުގައި، ޣައްޒާގެ ދެކުނުގެ ސިޓީއެއް ކަމަށްވާ ރަފާއިން ފޮނުވާލި 8 ހަމަލާއެއް ވަނީ އިސްރާއީލަށް ވަދެފައެވެ.

ޖުމްލަ 10 ހަމަލާއެއް ހަމާސް އިން ފޮނުވާލިއިރު، ޔަހޫދީ ފައުޖަށް އަޔަން ޑޯމް ބޭނުންކޮށްގެން މަތަކުރެވުނީ އޭގެ ތެރެއިން ބައެއް ހަމަލާތަކެވެ.

މީޑިއާ ރިޕޯޓްތައް ބުނާ ގޮތުން ތެލް އަވީވްގެ އިތުރުން ހަރްޒްލިއާ އާއި ޕެޓާ ޓިކްވާ ފަދަ ގިނަ ސިޓީތަކަށާއި އަވަށްތަކަށް ރޮކެޓް ސައިރަންގެ އަޑު އިވިފައިވާއިރު، މި ހަމަލާތަކުގައި ހަރްޒްލިއާ ގައި ހުރި ގެއަކަށް ގެއްލުންވެ، އިމާރާތްތަކަކާއި ދާދި ކައިރީގައި ހުރި ހުސްބިމަކަށް ވެސް ހަމަލާ ވަނީ އަމާޒުވެފައެވެ.

މިހާތަނަށް ހަމަލާތަކުގެ ސަބަބުން އެއްވެސް މީހަކަށް އަނިޔާވެފައިވާކަން ރިޕޯޓްކޮށްފައި ނުވި ނަމަވެސް، ހަމަލާތަކުން ސަލާމަތްވުމަށް މަސައްކަތްކުރި 2 އަންހެނަކަށް ވަނީ އެކި ވަރުގެ އަނިޔާތައްް ލިބިފައެވެ.

ހަމާސް އިން އިސްރާއީލަށް އަމާޒުކޮށް ހަމަލާތައް ފޮނުވާލިއިރު، މިއަދު ރަފާޙް އާއި މިސްރާއި ދެމެދު އޮންނަ ކަރެމް ޝެލޮމް ބޯޑަރު ހުރަސްކޮށް، ޣައްޒާ އަށް އެހީގެ ތަކެތި ވައްދަން ފަށާފައިވާކަން ވެސް ފާހަގަކޮށްލަން ޖެހެއެވެ.