ހުވަދު އަތޮޅުގައި އާރުޓީއެލް ފެރީގެ ޚިދުމަތް ފެށުމަށް ތައްޔާރުވަނީ

ހުވަދުއަތޮޅުގައި އާރްޓީއެލް ފެރީގެ ޚިދުމަތް ފެށުމަށް ތައްޔާރުވުމުގެ ގޮތުން، އެ އަތޮޅުތަކުގެ ހުރިހާ ރަށެއްގެ ކައުންސިލްތަކާއިއެކު، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ އިން މަޝްވަރާ ބައްދަލުވުންތަކެއް ފަށައިފިއެވެ.

މި ބައްދަލުވުންތަކުގައި ޕްލޭނިން މިނިސްޓްރީގެ އިތުރުން އެމްޓީސީސީ ވެސް ބައިވެރިވެފައިވާއިރު މި ބައްދަލުވުންތަކުގައި އެ ސަރަޙައްދުގެ ރޫޓްތައް ކަނޑައެޅިފައިވާގޮތާއި، ދަތުރުތައް ހަމަޖެއްސުމާއި، ޓަރމިނަލާއި، ފެރީ ސްޓޮޕްތަކުގެ މަސައްކަތް ކުރިއަށްދާނެގޮތުގެ މަޢުލޫމާތުތައް ވަނީ ހިއްސާކޮށްފައެވެ.

އެގޮތުން ޕްލޭނިން މިނިސްޓްރީއިން ބުނެފައިވަނީ ހުވަދޫގައި އާރްޓީއެލް ދަތުރުތައް ފުރަތަމަ ފަށާއިރު 6 ސްޕީޑް ފެރީ ބޭނުންކުރާނެކަމަށެވެ. ނަމަވެސް ޚިދުމަތް ފުރިހަމަވާއިރު ޖުމްލަ 9 ފެރީ ބޭނުންކުރާނެކަމަށާއި މި ފެރީތައް ބަންނަނީ އަލްޝާލީ މެރިންއާ ހަވާލުކޮށްގެން ކަމަށް މިނިސްޓްރީއިން ބުނެފައިވެއެވެ.

މި ފެރީތަކުގެ ފުރަތަމަ ފެރީ ބަނދެ ނިމި، މިދިޔަ މަހު ވަނީ ޓެސްޓުކޮށްފައެވެ.

ޤައުމީ ފެރީގެ ނިޒާމްގެ ޚިދުމަތް މި އަތޮޅުގައި ޖުލައި ކުރީ ކޮޅުު ފެށުމަށް ސަރުކާރުން މަސައްކަތްކުރަމުންދާއިރު މި ޚިދުމަތް ދޭނީ މައިގަނޑު 7 ރޫޓަކަށް ބަހާލައިގެންނެވެ. މީގެ ތެރޭގައި ކޫއްޑޫ، ކާޑެއްދޫ އެއަރޕޯޓަށް ޚާއްޞަ ރޫޓު ހިމެނެއެވެ.