އިޓްލޮސްގެ ނިންމުން ބަދަލު ކުރެވޭނެ ހާލަތްތައް އާޒިމާ، ރިފްޢަތަށް ކިޔައިދެއްވައިފި

އިޓްލޮސްގެ ނިންމުމަކީ ފަހު ނިންމުން ކަމަށާއި، އެ ނިންމުން ދެން ބަދަލު ނުކުރެވޭނެ ކަމަށް، ބަންޑާރަ ނާއިބު އިބްރާޙީމް ރިފްޢަތު ވިދާޅުވުމާއި ގުޅިގެން، އެ ނިންމުން ބަދަލު ކުރެވޭނެ ހާލަތްތައް ކުރީގެ ބަންޑާރަ ނާއިބު ޢާއިޝަތު އާޒިމާ ޝަކޫރު ކިޔައިދެއްވައިފިއެވެ.

ޖަރުމަނުގެ ހެމްބާގުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)ގެ މައި އޮފީހުގައި މިދިޔަ މަހުގެ 28 ވަނަ ދުވަހު ވަނީ، ރާއްޖޭން ވަކާލާތުކުރި ގޮތަށް، ކަނޑުގެ ސަރަހައްދުގެ އިން ވަކިކުރުމުގައި ބޮޑަށް ބަލަން ޖެހޭނީ ޗާގޯސްގެ ރަށްތަކުގެ އައްސޭރިފަށުން ފެށިގެން ކަަމަށް ވަނީ ހުކުމްކޮށްފަ އެވެ. 
މި ހުކުމާ އެކު ދެކުނުގެ އިގްތިސާދީ ސަރަހައްދުން ބައެއް ގެެއްލުނު ކަމަށް އިދިކޮޅު ފަރާތްތަކުން ބުނާ ބުނުމަށް ތާއީދުކޮށް، ބައެއް ސިޔާސީ ޕާޓީތަކުގެ އިތުރަށް ކުރީގެ ބައެއް ވަޒީރުންނާއި ބަންޑާރަނައިބުން މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި ވަނީ އެ ހުކުމް އިސްތިއުނާފް ކުރެވެން އޮތް ނަމަ އެކަން ކުރާނެ ކަމަށް ވިދާޅުވެފަ އެވެ.

އެކަމާއި ގުޅިގެން އޮންލައިން ނޫހަކަށް މައުލޫމާތު ދެއްވަމުން ރިފްޢަތު ވަނީ، ރާއްޖެ އާއި ޗާގޯސްއާ ދެމެދު ފުށުއަރާ ކަނޑުގެ ސަރަހައްދުގެ އިން ވަކިކުރުމުގެ މައްސަލައިގައި ބައިނަލްއަގުވާމީ ކަނޑުގެ ގާނޫނާ ބެހޭ ޓްރައިބިއުނަލުން ކުރި ހުކުމަކީ އިސްތިއުނާފީ ހައްގު ލިބިދޭ ހުކުމެއް ނޫން ކަމަށާއި، އެ ނިންމުން އެއްވެސް މަރުހަލާއެއްގައި ބަދަލުނުކުރެވޭނެ ކަމަށް ވިދާޅުވެފަ އެވެ.

ރިފްޢަތުގެ ވާހަކަ ތަކަށް ރައްދު ދެއްވައި އާޒިމާ ފޭސްބުކުގައި ހިއްސާ ކުރެއްވި ޕޯސްޓެއްގައި ވަނީ، އިޤުތިޞާދީ ޚާއްޞަ ސަރަހައްދުގެ މައްސަލަ އިޓްލޮސްގައި ނިންމަވައިލެއްވީ އެ ޓްރައިބިއުނަލުގެ އިޖުރާއީ އުސޫލުތަކާއި ހުކުމްތައްވެސް ވިދާޅުނުވެ ނުބައްލަވައިތޯ އޭނާ އާއި ސުވާލު ކުރައްވާފައެވެ.

އާޒިމާގެ އެ ޕޯސްޓުގައި ވަނީ އެ ޓްރައިބިއުނަލުގެ އިޖުރާއީ އުސޫލުތަކުގެ ފޮޓޯއެއްވެސް ހިއްސާ ކުރައްވާފައެވެ.

އަދި އެ އުސޫލުގެ 126 ވަނަ މާއްދާ އާއި 127 ވަނަ މާއްދާގެ ދަށުން ކުރެވޭނެ ގިނަ ކަންކަން ހުރި ކަމަށްވެސް އާޒިމާ ވިދާޅުވި އެވެ.

އެ އުސޫލުތަކުގެ 126 ވަނަ މާއްދާގައި ބުނެފައިވަނީ، އިޓްލޮސްގެ ނިންމުމެއްގެ ދާއިރާ (ސްކޯޕް) ނުވަތަ މާނައާމެދު ޚުޞޫމަތެއް އުފެދޭ ހާލަތުގައި އެ މައްސަލައިގެ ނިންމުން ތަފުސީރުކުރަން ހުށަހެޅޭނެ ކަމަށެވެ.

އަދި 127 ވަނަ މާއްދާގައި ބުނެފައިވަނީ ހުކުމްކުރި މަރުހަލާގައި އިޓްލޮސްއަށް އަދި މައްސަލައިގެ ޚަޞްމުންނަށް އޭގެ ތަބީއަތުގައި އެނގިފައި ނެތް ވާޤިއާއެއް އެނގިއްޖެ ހާލަތުގައި އިޓްލޮސްގެ ނިންމުމެއް މުރާޖައާކުރަން އެ ޓްރައިބިއުނަލަށް ހުށަހެޅިދާނެ ކަމަށެވެ.

"اللهގެ ރަޙުމަތްފުޅުން ރާއްޖޭގެ ސަރަހައްދުން ގެއްލުވައިލި ބައި އަނބުރާ ހޯދޭނެ. ޤައުމުގެ ހައްގުގައި ތެދުވާނެ މީހުން މަދެއް ނުވާނެ." އާޒިމާ ވިދާޅުވި އެވެ.