ފެމިލީ ކޯޓުގެ ޤާޟީކަމަށް ކުރިމަތިލުމުގެ ފުރުޞަތު ހުޅުވާލައިފި

ފެމިލީ ކޯޓުގެ ޤާޟީކަމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ޖުޑިޝަލް ސަރވިސް ކޮމިޝަނުން ކުރި އިއުލާނެއްގައި ބުނީ، ފެމިލީ ކޯޓަށް ޤާޟީއަކު ބޭނުންވާ ކަމަށާއި މި މަހުގެ 22 ވަނަ ދުވަހުގެ ކުރިން އެ މަގާމަށް އެދި ހުށަހަޅަން ޖެހޭނެ ކަމަށެވެ.

މުސާރައާއި އިނާޔަތްތައް ހިމެނޭހެން 46،375 ރުފިޔާ ލިބޭ މި މަގާމުގައި ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތިން މެޑިކަލް އިންޝުއަރެންސް އާއި ފޯނު އެލަވަންސް ލިބޭނެއެވެ.

މި މަގާމަށް އެދި ހުށަހަޅާ މީހަކީ އުމުރުން 25 އަހަރު ފުރިފައިވާ، އިސްލާމީ ޝަރީޢާ ނުވަތަ ޤާނޫނު ނުވަތަ ޤާނޫނާއި އިސްލާމީ ޝަރީޢާގެ ރޮނގުން ފުރަތަމަ ޑިގްރީ ޙާޞިލުކޮށްފައިވާ މީހަކަށް ވާން ޖެހެއެވެ. އަދި ފަނޑިޔާރުކަމުގައި ނުވަތަ ޤާނޫނީ ވަކީލުކަން ކުރުމުގައި ނުވަތަ މިދެކަމުގައި މަދުވެގެން ދެ އަހަރު ދުވަހުގެ ތަޖުރިބާ ހުންނަން ޖެހެއެވެ.

މި މަޤާމަށް އެދި ހުށަހަޅާނީ މި މަހުގެ 22 ވަނަ ދުވަހުގެ 12:00 ގެ ކުރިން އެ ކޮމިޝަނުގެ ފަހިރެސް ޕޯޓަލް މެދުވެރިކޮށް ކަމަށް ޖުޑިޝަލް ސަރވިސް ކޮމިޝަންގެ އިއުލާނުގައި ވެއެވެ.