އިޓްލޮސްގެ ރިޕޯޓު 3 ފަހަރު ކިޔައިފިން، ރައީސްގެ ސިޓީއަށް ހަވާލާދީފައެއް ނެތް: ޝަރީފު

ޗާގޯސްއާއި ދިވެހިރާއްޖެއާއި ދެމެދު ފުށުއަރާ ކަނޑުގެ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އަށް ހުށައެޅި މައްސަލަ ނިންމިއިރު އެ ކޯޓުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީއަަށް ހަވާލާ ދީފައި ނުވާކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބރު އިބްރާހިމް ޝަރީފު ވިދާޅުވެއްޖެ އެވެ.

ޝަރީފު ވިދާޅުވީ މި ދިޔަ އޭޕްރިލް މަހުގެ 28 ވަނަ ދުވަހު އިޓްލޮއިން އިން ފުށުއަރާ ސަރަހައްދުގެ މައްސަލަ ނިންމި ގޮތުގެ ރިޕޯޓު އޭނާ 3 ފަހަރު އެއްކޮޅުން އަނެއްކޮޅަށް ކިޔުއްވާފައިވާ ކަމަށެވެ. އެ ރިޕޯޓުގައި އޮތް އެއްޗެއް ފަހުމުވާ ވަރަށް އޭނާއަށް އިނގިރޭސި ބަސް ވެސް އެނގިލައްވާ ކަމަށާއި، އެ މައްސަލަ ނިންމިއިރު ރައީސް ޞާލިހު ފޮނުވިކަމަށް ބުނާ ސިޓީއާއި ހަވާލާ ދީފައި ނުވާކަމަށް ޝަރީފު ވިދާޅުވި އެވެ.

"އިޓްލޮސް އިން ބަލާފައި އޮތީ އަންކްލޮސް އާއި އިން ބެހުމުގެ އެކި މައްސަލަތަކުގައި ނިންމާފައި ހުރި ޕްރިސިޑެންސްތަކުގެ މައްޗަށް. އެއްވެސް މީހަކުގެ ސިޓީއަކަށް ނޫން. އަދި ދެ ފަރާތުން ވަކާލާތު ކުރި ގޮތާއި ފާހަގަކުރި ނުގުތާތަކަށް ބަލާ ޖަޖު ނިންމި ގޮތަކަށް ނިންމީ"

މަރަދޫ ދާއިރާގެ މެމްބަރު އިބްރާހިމް ޝަރީފު

ޝަރީފު އެ ވިދާޅުވު ގޮތަށް އިޓްލޮސްގައި އޮތް މައްސަލަ ނިންމާފައިވަނީ ރާއްޖެއިން ވަކާލާތު ކުރި ގޮތަށެވެ. އެއީ ފުށުއަރާ ސަރަަހައްދު ރާއްޖެއިން ބުނާ ޕޮއިންޓަކުން (ސޮލަމަން ރީފް) އިން ފެށިގެން ހަމަޔަށް ބައި ކުރުމަށެވެ.

ކޯޓުގައި ވަކާލާތު ކުރަމުން ދިޔައިރު ދިވެހިރާއްޖޭގެ މަސްލަހަތު ހިމާޔަތްކުރުމަށް ރާއްޖެ ތަމްސީލުކުރި ގާނޫނީ ޓީމުން އެއްވެސް އެއްޗެއް ވިދާޅުވެފައި ނުވާކަމަށް ކުރީގެ ބަންޑާރަ ނައިބު ޑރ މުހައްމަދު މުނައްވަރު އަދި އާޒިމާ ޝުކޫރުވެސް ވަނީ ވިދާޅުވެފަ އެވެ. އަދި އިޓްލޮސްގައި ދިވެހި ސަރުކާރުގެ ފަރާތުން ނަގާފައިވާ ޕޮސިޝަނަކީ ވެސް ޤާނޫނާއި ޚިލާފު ޕޮސިޝަނެއްކަމަށް އެ ފަރާތްތައް ފާހަގަކުރައްވަ އެވެ.

ހަމަޔަށް ބައި ނުކޮށް، ރާއްޖެއަށް މަންފާވާ ގޮތަށް ބަހަން ދިވެހި ދައުލަތުގެ ފަރާތުން ހުށައަޅާފައި ނުވުމަކީވެސް ޤާނޫނީ ބޭފުޅުން އެންމެ ބޮޑަށް ކަންބޮޑުވުން ފާޅުކުރަމުން އަންނަ ނުކުތާއެވެ.

އެގޮތުން ޗާގޯސް އަކީ މިނިވަން ދައުލަތެއް ނޫން ކަމަށާއި، ފުށުއަރާ ސަރަހަދެއް ހަމައަށް ބައިކުރަން ޖެހޭނީ ގައުމުތަކުގައި މެދުގައި ކަމަށާއި، އެ ސަރަހައްދަކީ ދިވެހިން މަސްވެރިކަން ކުރަމުން އަންނަ ސަރަހައްދަކަށް ވެފައި، މޮރިޝަސްއަކީ މަސްވެރި ގައުމަކަށް ނުވާއިރު، ދާ އަޅަން ލައިސެންސް ދޫކުރާ ގައުމަކަށް ވުމުން، އެތަން އެމީހުންނަށް ލިބިއްޖެނަމަ ރާއްޖޭގެ އިގްތިސާދަށް ކުރާނެ ނޭދެވޭ އަސަރުތަކުގެ ވާހަކައަކީ ދިވެހި ދައުލަތުން ކޯޓުގައި ދައްކަން ޖެހޭނެ ވާހަކަތަކެއްގެ ގޮތުގައި ފަންނީ އެކިއެކި ބޭބޭފުޅުން ގެންދަވަނީ ވާހަކަ ދައްކަމުންނެވެ.

އޭގެ އިތުރުން ރައީސުލްޖުމްހޫރިއްޔާގެ ސިޓީފުޅާއި، އެ މައްސަލައާއި ގުޅުމެއް ނެތް ނަމަ މޮރިޝަސްއިން އިޓްލޮސްއަށް އެ ސިޓީ ހުށައަޅަން ނުޖެހުނީސް ކަމަށާއި، ކޯޓުގައިވެސް އެ ސިޓީއާއި ހަވާލާދީ ވާހަކަދައްކާފައިވާއިރު، ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިއުމުގައި ރައީސް ޞާލިހުގެ އެ ސިޓީ ވަރަށް ބޮޑު ދައުރެއް އަދާކޮށްފައިވާކަމަށް ޑރ މުނައްވަރު ވަނީ ވިދާޅުވެފަ އެވެ.