ރައީސްގެ މޮޓޯ ކޭޑަށް ހުރަސްއެޅި މައްސަލާގައި ކޮމާންޑިންގ އޮފިސަރުގެ އިޙުމާލެއް ނެތް: އެމްއެންޑީއެފް
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދަތުރުފުޅު ކުރެއްވި މޮޓޯކޭޑަށް ބަޔަކު ހުރަސް އެޅި މައްސަލާގައި، ރައީސުލްޖުމްހޫރިއްޔާގެ ސަލާމަތީ ކަންކަމުގެ އެންމެ އިސް ވެރިއެއްގެ ގޮތުގައި އޭރު ހުންނެވި ކާނަލް ޢަބްދުالله އިބްރާހީމްގެ އެއްވެސް އިޙްމާލެއް ނެތްކަމަށް ޤައުމީ ދިފާއީ ބާރުން ނިންމައިފި އެވެ.
ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް މާރިޗް 20 ވަނަ ދުވަހުގެ ރޭ ހުޅުމާލޭގައި ހުންނަ ޢުމަރު ޒާހިރު އޮފީސް ޢިމާރާތުގައި ބޭއްވެވި ޖަލްސާގައި ބައިވެރިވެ ވަޑައިގެންނެވުމަށްފަހު ރައީސުލްޖުމްހޫރިއްޔާ މާލެ ވަޑައިގެންނެވި ވަގުތު، އިދިކޮޅު ޕީޕީއެމްގެ ސަޕޯޓަރުން ވަނީ ބޮޑު ތަކުރުފާނުމަގު ޕީޕީއެމް އޮފީސް ސަރަހައްދުން ރައީސުލްޖުމްހޫރިއްޔާގެ މޮޓޯކޭޑަށް ހުރަސް އަޅައި ހަމަނުޖެހުން ހިންގާފައެވެ.
ރައީސުލްޖުމްހޫރިއްޔާގެ މޮޓޯކޭޑަށް ހުރަސްއެޅި މައްސަލައާއި ގުޅިގެން އެމްއެންޑީއެފްގައި ޢަމަލުކުރަމުން އަންނަ އުސޫލާއި އެއްގޮތްވާ ގޮތުގެ މަތިން، ޕްރެޒިޑެންޝަލް ގާޑްސްގެ ކޮމާންޑިންގ އޮފިސަރގެ މަޤާމުގައި ހުންނެވި ކާނަލް ޢަބްދުالله އިބްރާހިމް މަޤާމުގެ މަސްޢޫލިއްޔަތާއި ޒިންމާތަކުން އެކަހެރިކުރެއްވިއެވެ. އަދި އެކަމާއި ގުޅޭ ޚާއްޞަ އިންކުއަރީއެއް ހެދިއެވެ.
މިކަމާއި ގުޅިގެން ދިވެހިރާއްޖޭގެ ޤައުމީ ދިފާޢީ ބާރުން މިއަދު ނެރުއްވި ބަޔާނުގައި ވަނީ، ކާނަލް ޢަބްދުالله އިބްރާހީމް މަސްޢޫލިއްޔަތުތަކުން ވަގުތީ ގޮތުން އެކަހެރިކުރެއްވީ އިންކުއަރީއަށް އެއްވެސް ފަރާތެއް ނުފޫޒެއްނެތި އިންސާފުވެރިކަމާއެކު ހިންގުމަށްކަމަށެވެ.
އެ މައްސަލަ ބެލިބެލުމުން ކޮމާންޑިން އޮފިސަރުގެ އެއްވެސް އިޙްމާލެއް ފެންނާން ނެތްކަން ހާމަވެފައިވާކަމަށް އެމްއެންޑީއެފުން ވަނީ ބުނެފަ އެވެ.
ކާނަލް ޢަބްދުالله އިބްރާހީމް ވަގުތީ ގޮތުން މަސްޢޫލިއްޔަތުތަކުން އެކަހެރި ކުރެއްވުމުން، ވަގުތީ ގޮތުން ޕްރެޒިޑެންޝަލް ގާޑްސްގެ ކޮމާންޑިންގ އޮފިސަރގެ ޒިންމާ ޙަވާލުކުރެއްވީ މޭޖަރ އިބްރާހީމް ޙަލީމާއެވެ. އަދި އެފަހުން ކާނަލް ޢަބްދުالله އިބްރާހީމަށް ވަނީ މަގާމުގެ ކުރިއެރުން ވެސް ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
