ދިއްފުށީގައި މަދިރި އާލާވާ ތަންތަން ނައްތާލުމަށް ހާއްސަ ހަރަކާތެއް ސްޓެލްކޯއިން ކުރިއަށް ގެންގޮސްފި
ކ. ދިއްފުށީގައި މަދިރި އުފެދި އާލާވާ ތަންތަން ނައްތާލުމުގެ ގޮތުން ސްޓެލްކޯއިން ހާއްސަ ހަރަކާތެއް ކުރިއަށް ގެންގޮސްފިއެވެ.
އެގޮތުން މިކަމާއި ގުޅިގެން ސްޓެލްކޯއިން ކޮށްފައިވާ ޓްވީޓެއްގައި ބުނެފައިވަނީ އިއްޔެ ހިންގުނު މި ހަރަކާތަކީ ދިއްފުށީގެ ކައުންސިލާއި، ސިއްހީމަރުކަޒާއި، ސުކޫލް އަދި އިންޖީނުގޭގެ މުވައްޒަފުން ގުޅިގެން ކުރިއަށް ގެންދްވުނު ހަރަކާތެއް ކަމަށެވެ.
މިއާއިއެކު މުޖުތަމައުގެ ދުޅަހެޔޮކަމަށް ކުރެވޭ މިފަދަ ކަންކަމުގައި، އެ ކުންފުނީގެ މުވައްޒަފުންގެ ފުރިހަމަ ބައިވެރިވުން އަބަދުވެސް އޮންނަކަމީ ލިބޭ އުފަލެއް ކަމަށް ސްޓެލްކޯއިން ވަނީ ފާހަގަކޮށްފައެވެ.
ދިއްފުށީގައި ސްޓެލްކޯގެ ފަރާތުން މި ހަރަކާތުގައި އިސްކޮށް ހަރަކާތްތެރިވި ހަސަން ޝާފިއު ވޮއިސް އަށް ދެއްވި ބަސްދީގަތުމެއްގައި ވިދާޅުވެފައިވަނީ އެ ރަށުގައި އެހެލާފައި ހުރި ބޭނުންނުކުރާ ދޯންޏާއި، ލޯންޗް އަދި ބޯޓް ފަހަރުތަކުގައި ފެން ހެދުމުގެ ސަބަބުން ވަރަށް ބައިވަރު މަދިރި ފަނި އަޅާފައިވާ ކަމަށެވެ.
އެހެންކަމުން 3 ޓީމްއަކަށް ބަހާލައިގެން ކުރިއަށް ގެންދެވުނު މި ހަރަކާތުގައި ދޯނި އެހެލާ ސަރަހައްދުގެ އިތުރުން ރަށު ތެރެއިންވެސް މަދިރި އާލާވާނެ ތަންތަނުން ފެން ހިއްކުމާއި، ކެމިކަލް އަޅަން ޖެހޭ ތަންތަނަށް ކެމިކަލް އެޅުމުގެ އިތުރުން ހުސްކުރި ދަޅު ފަދަ ފެން ހެދޭ ތަކެތި ނައްތާލުމުގެ މަސައްކަތް ކުރިއަށް ގެންގޮސްފައިވާ ކަމަށެވެ.
މިއާއިއެކު ޝާފިއު ވިދާޅުވެފައިވަނީ ވިއްސާރަ މޫސުމާއި ދިމާކޮށް ރަށުގައި މަދިރި އަލާވާލެއް އިތުރުވުމާއި ޑެންގޫ ފަދަ ބަލިތައް ފެތުރޭތީވެ ރަށުގެެ ކައުންސިލާއި ސްޓެލްކޯ ގުޅިގެން މަހަކު އެއްފަހަރު މިގޮތަށް ސާފު ކުރުމުގެ ހަރަކާތް ކުރިއަށް ގެންދިޔުމަށް ރާވަމުންދާ ކަމަށެވެ.
"އާންމުކޮށް އެހެންނޫނިއްޔާ މި ވާގޮތަކީ އަހަރެއްގެ ތެރޭގައި އެއްދުވަހު ސާފު ކުރީމަކާ މީގެ އަސްލު ހައްލެއް ނުލިބެ. މަހަކު އެއްދުވަހު ނަމަވެސް ނިކުމެ އާންމުކޮށް މިކަން ކުރާ ގޮތަށް އަޅުގަނޑުމެން ނިންމާފައި މިއޮތީ." ޝާފިއު ފާހަގަކުރެއްވިއެވެ.
ދިއްފުށީގެ އިތުރުން މާފުށީގައިވެސް މިފަދަ ހަރަކާތެއް ކުރިއަށް ގެންގޮސްފައިވާ ކަމަށް އެ ކުންފުނިން މައުލޫމާތު ދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
