ފުރަތަމަ 100 ދުވަހުގެ ތެރޭ, ފަނޑިޔާރުންގެ މުސާރައަށް %75 ކުރިއެރުމެއް ގެންނާނަން: ޤާސިމް

ދިވެހިރާއްޖޭގެ ވެރިކަމަށް އިންތިޚާބު ކުރައްވައިފިނަމަ، ވެރިކަމުގެ ފުރަތަމަ 100 ދުވަހުގެ ތެރޭގައި ފަނޑިޔާރުންގެ މުސާރަ މިހާރަށްވުރެ 75 ޕަސެންޓު ބޮޑު ކުރުމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް ވައުދުވެ ވަޑައިގެންފި އެވެ.

ގާސިމް މިފަދައިން ވިދާޅުވީ ޖޭޕީގެ މެނިފެސްޓޯ އިފްތިތާހު ކުރުމަށް ރޭ މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ގާސިމް ވިދާޅުވީ ޝަރުއީ ނިޒާމް އިސްލާހު ކުރާ ވާހަކައަކީ ކޮންމެ ސަރުކާރަކުން ވެސް ދައްކާ ވާހަކައެއް ކަމަށާއި ނަމަވެސް ވެރިކަމާއި ހަމައަށް އާދެވުމުން އެ ނިޒާމް އިސްލާހް ކުރުމަށް އެއްވެސް މަސައްކަތެއް ކުރައްވާތަން ނުފެންނަ ކަމަށް ވިދާޅުވިއެވެ.

"މިއަދު އަޅުގަނޑުމެންގެ ބަޖެޓް 40 ބިލިއަނަށް އަރައިގެންދާއިރު ސްޕްރީމް ކޯޓާއި ހައި ކޯޓަށް ވަކި އިމާރާތެއް ނެހެދިގެން އުޅެނީ ކީއްވެގެންތޯ. ޖުޑުޝަރީގެ ކަންތައް ކިހިނެއްތޯ ރަނގަޅަށްދާނީ ފަނޑިޔާރު ގޭގެ އެކި ކޯޓުތައް ހީވަނީ ކޮތަރު ކޮށްޓެއްހެން. އެކަށީގެންދާ ޓްރޭނިންނާއި ތަރިބިއްޔަތު ފަނޑިޔާރުންނަކަށް ނުލިބޭ."

ޖޭޕީގެ ރިޔާސީ ކެންޑިޑޭޓް ގާސިމް އިބްރާހިމް

މިއާއެކު ފިނޭންސް މިނިސްޓަރު ކަމުގައި ގާސިމް ހުންނެވި އިރު ފަނޑިޔާރުންގެ މުސާރަ ބޮޑު ކުރި ގޮތަށް މިއަދާ ހަމައަށް ކުރިއެރުމެއް ދީފައި ނުވާ ކަން ފާހަގަ ކުރައްވައި އޭނާ ވަނީ ވެރިކަމުގެ ފުރަތަމަ 100 ދުވަހުގެ ތެރޭގައި ފަނޑިޔާރުންގެ މުސާރަ ބޮޑު ކުރަން ވައުދުވެވަޑައިގެންފައެވެ.

"އަޅުގަނޑުގެ ވެރިކަމުގެ ފުރަތަމަ 100 ދުވަސް ވާއިރު ފަނޑިޔާރުންގެ މުސާރަ މިހާރު އޮތް ވަރަށް ވުރެ 75 ޕަސެންޓް އިތުރު ކޮށްދޭނަން."

ޖޭޕީގެ ރިޔާސީ ކެންޑިޑޭޓް ގާސިމް އިބްރާހިމް

މީގެ އިތުރުން ފަޑިޔާރުގޭގައި މަސައްކަތްކުރަން ބޭނުންވާ ފަރާތްތަކަށް ޓްރޭނިން ދިނުމާއި އެމީހުނަށް ބޭނުންވާ ވަސީލަތްތައް ހަމަކޮށްދެއްވާނެ ކަމަށް ވެސް ވައުދުވެވަޑައިގެންނެވިއެވެ. އަދި އެ މުއައްޒަފުންނަށް ވެސް 35 ޕަސެންޓް މުސާރައިގެ ކުރިއެރުމެއް ދެއްވާނެ ކަމަށް ގާސިމް ވިދާޅުވި އެވެ.

އަދި ސްޕްރީމްކޯޓާއި ހައި ކޯޓާއި އަދި އެ ނޫން އެހެން ގާޖައިގެ ދަތިކަން ދިމާވެފައިވާ ކޯޓުތަކުގެ ބަދަލުގައި ވެރިކަމުގެ ދެ އަހަރު ނިމުމުގެ ކުރިން އާ ކޯޓުތައް އިމާރާތްކޮށްދެއްވާނެ ކަމަށްވެސް ގާސިމް ވަނީ ވައުދުވެވަޑައިގެންފައެވެ.