ޤާސިމްގެ މެނިފެސްޓޯ ބިނާވެފައިވާ 9 އަސާސް ހާމަކޮށްފި!
ޖުމަހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ މެނިފެސްޓޯ ބިނާވެފައިވާ މައިގަނޑު 9 އަސާސް ހާމަކޮށްފި އެވެ.
އެ އަސާސްތައް ހާމަކުރައްވާފައިވަނީ މި ރިޔާސީ އިންތިޚާބުގައި ޤާސިމްގެ ރަނިންމޭޓު ޑރ އަމީން އިބްރާހީމެވެ.
ޤާސިމްގެ މެނިފެސްޓޯ އިފްތިތާހުކުރުމަށް ބޭއްވި ޖަލްސާގައި ވާހަކަދައްކަވަމުން އަމީނު ވިދާޅުވީ، އެ މެނިފެސްޓޯއަކީ ވަރަށް ފަންނީ ބޭފުޅުން ކުރައްވާފައިވާ ވަރަށް އަގުހުރި މަސައްކަތްޕުޅުތަކެއް ކަމަށެވެ. އަދި މެނިފެސްޓޯ އެކުލަވާލާފައިވަނީ ރާއްޖޭގެ އެކި ކަންކޮޅުތަކުން މީހުންގެ ޚިޔާލާއި މަޝްވަރާ ހިމަނާ އިދާރާތަކުން ލިބުނު މައުލޫމާތުތަކުގެ މައްޗަށް ބިނާކޮށްގެން ކަމަށެވެ.
ޤާސިމްގެ މެނިފެސްޓޯއަކީ ގައުމަށް މިހާރު ދިމާވެފައިވާ ވަރަށް ގިނަ މައްސަލަތަކުގެ ޙައްލު ލިބިގެންދާނެ މެނިފެސްޓޯއެއް ކަމަށާއި، އެއީ ވަރަށް ވަރުގަދަ ޕްލޭނެއްގެ ގޮތުގައި އަމީނު ސިފަކުރެއްވި އެވެ.
ޤާސިމްގެ މެނިފެސްޓޯ ބިނާވެފައިވާ އަސާސްތައް!
-އިސްލާމްދީނާއި މިނިވަންކަމާއި އިސްތިގުލާލު ރައްކާތެރިކުރުން
-އަދުލު އިންސާފު ޤާއިމްކުރުން
-ދަރަނިން ނެއްޓި އިޤްތިޞާދީ ދުވެލި މެކުހަށްޖެހުން
-ތަރައްގީގެ ފޮނި މީރުކަން ރާއްޖޭގެ ހުރިހާ ކަންކޮޅަކަށް ގެންގޮސްދިނުން
-ސިނާއަތްތަކާއި ވިޔަފާރީގެ ނަފާ ފަރުދުންގެ ޖީބަށް
-ކަށަވަރު ބޯހިޔާވަހިކަމާއި ސްމާޓު ރާއްޖެއެއް އުފެއްދުން
-ސިއްޙީ ފަރުވާއާއި އޯގާތެރިކަން
-ފެންވަރު ރަނގަޅު ތައުލީމުގެ ހިތްހަމަޖެހުން ރާއްޖޭގެ ހުރިހާ ކަންކޮޅުތަކަށް ކަށަވަރުކުރުން
-އަންހެނުންނާއި ޒުވާނުންނާއި އިސްރަށްވެހިންގެ ދުޅަހެޔޮކަމުގެ އުފާވެރިކަން ގެނެސްދިނުން
ޤާސިމްގެ މެނިފެސްޓޯ ބިނާވާ އަސާސްތައް އަމީނު ހިއްސާކުރެއްވުމަށް ފަހު ވިދާޅުވީ، އެ މެނިފެސްޓޯގައި ހުރި ކަންކަން ފުއްދިދާނެ ކަމާއިމެދު ސުވާލު ނޫފެއްދުމަށް އެދިލައްވާކަމަށެވެ.
އެއީ ޤާސިމްގެ އަރިހުގައި އޮތް ޓީމަކީ މި ރިޔާސީ އިންތިޚާބުގައި ރިޔާސީ ކެންޑިޑޭޓެއްގެ ފަހަތުގައި އޮތް އެންމެ އިލްމީ ޤާބިލު ޓީމުކަމަށާއި، އެ ޓީމާއެކު މެނިފެސްޓޯގައި ހުރި ވައުދުތައް ފުއްދޭނެކަމުގެ ފުރިހަމަ ޔަގީންކަން އޮތުމުންކަމަށް އޭނާ ވިދާޅުވި އެވެ.
ކުރިއަށް އޮތް ތަނުގައި ޤާސިމްގެ ޓީމުގެ ބޭފުޅުން ރައްޔިތުންނާއި ގާތުން ބައްދަލުކުރައްވާނެ ކަމަށާއި، އަދި ވައުދުތައް ފުއްދުމަށް ގެންގުޅުއްވާނެ ޕްލޭނު ވެސް ވަރަށް ސާފުކޮށް ތިލަކޮށްދެއްވާނެ ކަމުގެ ޔަގީންކަން އަމީނު ދެއްވި އެވެ.
އަދި ޤާސިމްގެ ޕްލޭނާއި އެއްގޮތަށް ރާއްޖެއަކީ ފުދުންތެރި ބަޔަކު ދިރިއުޅޭ އުފާވެރި އަމާން ގައުމަށް ހެދިދާނެކަމުގެ ޔަގީންކަން އޮތްކަމަށް ވެސް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
