ޖެހުނު ހިސާބު ގޯސް! މި ނިކުންނަނީ ބުރަ މަސައްކަތުން އިންތިހާބު ކާމިޔާބު ކުރަން: ފައްޔާޒު

ރިޔާސީ އިންތިހާބުގެ ފުރަތަމަ ބުރުގައި ޖެހުނު ހިސާބު ގޯސް ކަމަށާއި އިތުރަށް ކުރަންޖެހޭ ކަންކަން ސާފުކުރެވި ދެވަނަ ބުރުގައި ނުކުންނާނީ ބުރަ މަސައްކަތުން އިންތިހާބު ކާމިޔާބު ކުރުމަށް ކަމުގައި އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

އިއްޔެ ބޭއްވުނު ރިޔާސީ އިންތިހާބުގެ ފުރަތަމަ ބުރުގެ ވޯޓުގައި ވެރިކަން ކުރާ މައި ޕާޓީ އެމްޑީޕީއަށް އިދިކޮޅު ޕީޕީއެމް ޕީއެންސީއާއި ވާދަކޮށް ލިބިފައިވަނީ އެ ޕާޓީން އަންދާސާ ކުރި ވަރަށްވުރެ ބޮޑުތަނުން ދަށް ނަތީޖާއެކެވެ.

އެގޮތުން އެ ޕާޓީން ބުނަމުން އައީ މި އަހަރުގެ ރިޔާސީ އިންތިހާބު ކާމިޔާބު ކުރާނީ އެއްބުރުން ކަމަށާއި އިންތިހާބުގައި 56 އިންސައްތައަށްވުރެ އެންމެ ވޯޓެއްވެސް މަދު ނުވާނެ ކަމުގައި ފައްޔާޒު އަމިއްލަފުޅަށް ވެސް ވަނީ އެތަށް ޕޯޑިއަމެއްގައި ވިދާޅުވެފައެވެ.

އެހެންނަމަވެސް، އަންދާޒާ ކުރެވުނު ވަރަށް ވޯޓު ލިބިފައި ނުވާތީ، އެކަމާއި ގުޅިގެން މިއަދު ކުރެއްވި ޓުވީޓެއްގައި ފައްޔާޒު ވިދާޅުވީ، ކެމްޕެއިން ރުކުރުވާލައި އެ ޕާޓީން ނިކުންނާނީ ބުރަމަސައްކަތުން ދެވަނަ ބުރު ކާމިޔާބު ކުރުމަށް ކަމުގައެވެ.

އިރާދަކުރެއްވިއްޔާ ކެމްޕޭން ރުކުރުވާލާ އަޅުގަޑުމެން މި ނިކުންނަނީ ބުރަ މަސައްކަތާއެކު މި އިންތިހާބު ކާމިޔާބު ކުރަން, މިރާއްޖެ އަނިޔާވެރިކަމާ ދިމާލައް އަނބުރާ ދިޔަނުދިނުމަށް ކުރަންޖެހޭ ކަންކަން ކުރަން

ފައްޔާޒު އިސްމާއީލް

ރިޔާސީ އިންތިހާބުގެ ފުރަތަމަ ބުރުގެ ވަގުތީ ނަތީޖާ މިހާރު އިއުލާނުކޮށްފައިވާއިރު، ފުރަތަމަ ބުރުގެ ނަތިޖާއިން 45.1 އިންސައްތައިން ކުރިހޯދައިފައިވަނީ، ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒެވެ. ނަތީޖާ ދައްކާގޮތުން ދެވަނައިގައި އުޅެނީ 38.2 އިންސައްތަ ވޯޓުން އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ޞާލިހެވެ. 
ރިޔާސީ އިންތިހާބުގެ ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން އިއުލާނުކޮށްފައިވާއިރު، މިހާރު އުފެދިފައިވާ ބޮޑު ސުވާލަކީ އިންތިހާބުގެ ދެވަނަ ބުރުގައި ފުރަތަމަ ބުރުން ނާކާމިޔާބުވި ކެންޑިޑޭޓު ދެވަނަ ބުރުގައި ކޯލިޝަން ހަދާނީ ކޮން ކެނޑިޑޭޓަކަށް ކަމުގައެވެ.